ອຸຕຸເຕືອນ! ແຕ່ລະພາກຈົ່ງກຽມພ້ອມຮັບມື ພາຍຸ ຢາກິ ທີ່ຈະເຮັດໃຫ້ຝົນຕົກໜັກຕິດຕໍ່ກັນຫລາຍວັນ ແລະ ມີດິນເຈື່ອນ ນໍ້າຖ້ວມຊຸ

ວັນທີ 5 ກັນຍາ 2024 ນີ້, ກົມອຸຕຸນິຍົມ ແລະ ອຸທົກກະສາດ ແຈ້ງເຕືອນໄພ ວ່າ: ພາຍຸໝູນເຂດຮ້ອນ ຢາກິ (YAKI) ຫົວທີ 11 ປະຈໍາປີ 2024 ຍັງເຄື່ອນທີ່ຢູ່ທາງຕອນເໜືອຂອງທະເລຈີນໃຕ້, ຄາດຄະເນວ່າພາຍຸຫົວນີ້ ຈະເພີ່ມກໍາລັງແຮງຂຶ້ນກາຍເປັນລົມພາຍຸໄຕ້ຝຸ່ນຈະເຄື່ອນທີ່ຜ່ານເກາະໄຮໜານ ໃນໄລຍະ 2-3 ວັນຕໍ່ໜ້ານີ້. ຈາກນັ້ນ ຈະອ່ອນກໍາລັງ ລົງກາຍເປັນພາຍຸດີເປຼຣຊັນຈະເຄື່ອນທີ່ຜ່ານ ພາກເໜືອຂອງ ສສ ຫວຽດນາມ ແລະ ສປປ ລາວ ຕາມລໍາດັບ. ຊຶ່ງຈະເຮັດໃຫ້ ມີຝົນຕົກ ຟ້າຮ້ອງ ຟ້າເຫລື້ອມ ໃນລະດັບຄ່ອຍຢູ່ທົ່ວໄປ ແລະ ຕົກລະດັບປານກາງ ຫາ ໜັກ ພ້ອມຈະມີລົມພັດແຮງຢູ່ບາງທ້ອງຖິ່ນ ເຊັ່ນ ແຂວງ ຜົ້ງ ສາລີ, ຫົວພັນ, ຊຽງຂວາງ, ອຸດົມໄຊ, ບໍ່ແກ້ວ, ຫລວງນໍ້າທາ, ຫລວງພະບາງ, ໄຊຍະບູລີ, ນະຄອນຫລວງວຽງຈັນ, ໄຊສົມບູນ, ວຽງຈັນ, ບໍ ລິຄໍາໄຊ, ຄໍາມ່ວນ ແລະ ສະຫວັນນະເຂດ ໃນໄລຍະທີ 6-9 ກັນຍາ 2024 ນີ້.

ດັ່ງນັ້ນ, ຈຶ່ງແຈ້ງເຕືອນເຖິງປະຊາຊົນບັນດາເຜົ່າ, ອົງການປົກຄອງທ້ອງຖິ່ນ ແລະ ອົງການຈັດຕັ້ງທຸກພາກສ່ວນໃນແຕ່ລະພາກ ລວມທັງ ນະຄອນຫລວງວຽງຈັນ ຈົ່ງມີສະຕິລະມັດລະວັງ ແລະ ກຽມພ້ອມຮັບມື ຕໍ່ສະພາບຝົນຕົກໜັກຕິດຕໍ່ກັນຫລາຍວັນ ທີ່ຈະເຮັດໃຫ້ມີດິນເຈື່ອນ ນໍ້າຖ້ວມຊຸ, ນໍ້າຖ້ວມຍື່ງ ແລະ ນໍ້າຖ້ວມອັ່ງໃນຕົວເມືອງ.