ອິດສະລາແອນປະທ້ວງທົ່ວປະເທດ ແຄ້ນພົບສົບ 6 ຕົວປະກັນຢູ່ເຂດກາຊາ
ຊາວອິດສະລາແອນຢູ່ນະຄອນຫລວງເທວອາວີບ, ເຢຣູຊາເລັມ ແລະ ຫລາຍເມືອງທົ່ວປະເທດ ອອກມາຊຸມນຸມຕາມຖະໜົນ ເພື່ອປະທ້ວງ ແລະ ສະແດງຄວາມບໍ່ພໍໃຈ ຫລັງມີລາຍງານກອງທັບພົບສົບຕົວປະກັນຊາວອິດສະລາແອນ 6 ຄົນທີ່ຖືກກຸ່ມຮາມັດກັກຂັງໄວ້ຢູ່ເຂດກາຊາ.
ສື່ທ້ອງຖິ່ນຂອງອິດສະລາແອນລາຍງານວ່າ: ກຸ່ມຜູ້ປະທ້ວງຢູ່ເມືອງຕ່າງໆ ລວມກວ່າ 5 ແສນຄົນ ຮຽກຮ້ອງໃຫ້ທ່ານ ເບັນຈາມິນ ເນທັນຢາຮູ ນາຍົກລັດຖະມົນຕີ ເຮັດຫຍັງຫລາຍກວ່ານີ້ ເພື່ອບັນລຸຂໍ້ຕົກລົງຢຸດຍິງ ແລະ ນໍາເອົາຕົວປະກັນທີ່ເຫລືອອີກປະມານ 101 ຄົນກັບປະເທດ. ຂະນະທີ່ທາງການອິດສະລາແອນປະເມີນວ່າ: ມີຕົວປະກັນເສຍຊີວິດໄປແລ້ວປະມານ 1 ໃນ 3.
ຢູ່ນະຄອນຫລວງເທວອາວີບ ມີກຸ່ມຜູ້ປະທ້ວງບາງສ່ວນປິດຖະໜົນຫລວງ. ຂະນະທີ່ຕໍາຫລວດຕ້ອງໃຊ້ແກັສນໍ້າຕານສະຫລາຍການຊຸມນຸມ ແລະ ຈັບຜູ້ປະທ້ວງຫລາຍຄົນ, ແຕ່ຍັງບໍ່ມີລາຍງານຜູ້ບາດເຈັບ.
ນອກຈາກນີ້, ຍັງມີການນັດພັກວຽກປະທ້ວງ ໂດຍສະຫະພາບແຮງງານເອກະຊົນ, ພະນັກງານໂຮງໝໍ, ໂຮງຮຽນ, ສາຍການບິນ, ບໍລິສັດລົດໂດຍສານ, ທະນາຄານ ແລະ ລູກຈ້າງລັດ ຕ່າງພ້ອມໃຈກັນພັກວຽກເພື່ອກົດດັນໃຫ້ລັດຖະບານບັນລຸຂໍ້ຕົກລົງຢຸດຍິງ ແລະ ປ່ອຍຕົວປະກັນ ເຊິ່ງສົ່ງຜົນເຮັດໃຫ້ໂຮງຮຽນຫລາຍແຫ່ງຕ້ອງປິດຊົ່ວຄາວ. ຂະນະທີ່ສະໜາມບິນເບັນກູຣຽນຢູ່ນະຄອນຫລວງເທວອາວີບຕ້ອງປິດໃຫ້ບໍລິການຖ້ຽວບິນຂາອອກ ແລະ ເຮັດໃຫ້ຖ້ຽວບິນຫລາຍຖ້ຽວຕ້ອງເລື່ອນໃຫ້ບໍລິການ.
ອ້າງອີງ:
- https://www.bbc.com/news/live/c75nekwkd4yt
- https://www.channelnewsasia.com/world/israel-protests-strikes-hostages-killed-gaza-hamas-war-4580731
- https://www.aljazeera.com/news/2024/9/1/israelis-protest-union-calls-strike-after-six-more-captives-killed-in-gaza
