ທ່ານ ທຣຳ ຮຽກຮ້ອງໃຫ້ ສປປ ເກົາຫລີ ເຈລະຈາເລື່ອງນິວເຄຼຍ
ປະທານາທິບໍດີ ທຣຳ ກ່າວລະຫວ່າງຢ້ຽມຢາມ ສ.ເກົາຫລີ ວ່າ: ພ້ອມໃຊ້ກຳລັງເພື່ອຢຸດການໂຈມຕີຂອງ ສປປ ເກົາຫລີ ແຕ່ກໍສະແດງທ່າທີເປັນມິດ ໂດຍການຮຽກຮ້ອງໃຫ້ ສປປ ເກົາຫລີ ເຮັດຂໍ້ຕົກລົງເພື່ອຢຸດການຜະເຊີນໜ້າ.
ສຳນັກຂ່າວຕ່າງປະເທດລາຍງານຈາກນະຄອນຫລວງເຊອຸນ ປະເທດ ສ.ເກົາຫລີ ໃນວັນທີ 7 ພະຈິກວ່າ: ປະທານາທິບໍດີ ໂດນັນ ທຣຳ ຂອງອາເມລິກາ ຖະແຫລງລະຫວ່າງຢ້ຽມຢາມນະຄອນຫລວງເຊອຸນ ຫລັງຫາລືກັບປະທານາທິບໍດີ ມຸນ ແຈອິນ ຂອງ ສ.ເກົາຫລີ ວ່າ: ທ່ານພ້ອມຈະສັ່ງໃຊ້ກຳລັງທະຫານເຕັມສ່ວນ ບໍ່ວ່າຈະຈຳເປັນຂະໜາດໃດ. ທັງນີ້ກໍເພື່ອຫາທາງຢຸດ ສປປ ເກົາຫລີ ບໍ່ໃຫ້ເປັນໄພຄຸກຄາມຕໍ່ຊີວິດຄົນອີກຫລາຍລ້ານຊີວິດ. ເຖິງຢ່າງໃດກໍຕາມ, ຜູ້ນຳອາເມລິກາໄດ້ສະແດງທ່າທີເປັນມິດຫລາຍກວ່າຜ່ານມາ ໂດຍຮຽກຮ້ອງໃຫ້ ສປປ ເກົາຫລີ ປະຕິບັດໃນສິ່ງທີ່ຖືກຕ້ອງ. ນອກຈາກນັ້ນ ຜູ້ນຳອາເມລິກາຍັງກ່າວອີກວ່າ: ສ.ເກົາຫລີ ໄດ້ຕົກລົງຈະຊື້ອາວຸດມູນຄ່າຫລາຍພັນລ້ານໂດລາສະຫະລັດຈາກອາເມລິກາ ເພື່ອໃຊ້ປ້ອງກັນໄພຄຸກຄາມຈາກ ສປປ ເກົາຫລີ.
ປະທານາທິບໍດີ ທຣຳ ແລະ ພັນລະຍາ ເດີນທາງເຖິງນະຄອນຫລວງເຊອຸນ ໃນວັນທີ 7 ພະຈິກ ຕາມກຳນົດການຢ້ຽມຢາມ ສ.ເກົາຫລີ ເປັນເວລາ 2 ວັນ ທ່າມກາງບັນຫາສຳຄັນຂອງການແກ້ໄຂບັນຫານິວເຄຼຍ ສປປ ເກົາຫລີ. ຈາກນັ້ນຜູ້ນຳອາເມລິກາຈະເດີນທາງຢ້ຽມຢາມປະເທດຈີນເປັນລຳດັບຕໍ່ໄປ.
