ນ້ຳຖ້ວມຄັ້ງໃຫຍ່ຢູ່ເຢເມນ ມີຜູ້ເສຍຊີວິດເກືອບ 100 ຄົນ ບ້ານເຮືອນເປ່ເພເສຍຫາຍຫລາຍໝື່ນຫລັງ
ມີຜູ້ເສຍຊີວິດແລ້ວເກືອບ 100 ຄົນ ຈາກນໍ້າຖ້ວມຄັ້ງໃຫຍ່ຢູ່ເຢເມນ ເຊິ່ງສ້າງຄວາມເສຍຫາຍເປັນວົງກວ້າງໃນຮອບກວ່າ 1 ເດືອນຜ່ານມາ.
ວັນທີ 2 ກັນຍາ, ສໍານັກງານຂ້າຫລວງໃຫຍ່ຜູ້ລີ້ໄພແຫ່ງສະຫະປະຊາຊາດ (UNHCR) ລາຍງານວ່າ: ອຸທົກກະໄພຄັ້ງໃຫຍ່ຮອບໃໝ່ຢູ່ເຢເມນ ເຊິ່ງເກີດຂຶ້ນໃນກາງເດືອນກໍລະກົດຜ່ານມາ ສົ່ງຜົນເຮັດໃຫ້ມີຜູ້ເສຍຊີວິດແລ້ວ 97 ຄົນ ແຕ່ອາດຫລາຍກວ່ານີ້ໃນຄວາມເປັນຈິງ.
ທັງນີ້, ເຂດມັລຮານ ຢູ່ທາງຕາເວັນຕົກຂອງປະເທດໄດ້ຮັບຜົນກະທົບຫລາຍທີ່ສຸດ ໂດຍເຮືອນຫລາຍກວ່າ 56,000 ຫລັງ ໄດ້ຮັບຄວາມເສຍຫາຍ ແລະ ຫລາຍກວ່າ 1,000 ຄອບຄົວຕ້ອງອົບພະຍົບ. ຂະນະທີ່ການລໍາລຽງການຊ່ວຍເຫລືອເຂົ້າສູ່ພື້ນທີ່ຍັງເປັນໄປຢ່າງຍາກລໍາບາກ ເນື່ອງຈາກໂຄງລ່າງພື້ນຖານຫລາຍແຫ່ງໄດ້ຮັບຄວາມເສຍຫາຍ.
ສົງຄາມກາງເມືອງຢູ່ເຢເມນເຊິ່ງຍືດເຍື້ອມາເກືອບ 1 ທົດສະວັດ ສົ່ງຜົນເຮັດໃຫ້ຊາວເຢເມນຫລາຍກວ່າ 4.5 ລ້ານຄົນ ຫລື 14% ຂອງປະຊາກອນທົ່ວປະເທດ ຕ້ອງຍ້າຍຖິ່ນຖານພາຍໃນປະເທດ ແລະ ການສູ້ຮົບຍັງຍືດເຍື້ອເຮັດໃຫ້ສະຖານະການຢູ່ເຢເມນກາຍເປັນໜຶ່ງໃນວິກິດດ້ານມະນຸດສະທໍາຄັ້ງຮ້າຍແຮງທີ່ສຸດຂອງໂລກທີ່ສົ່ງຜົນກະທົບຕໍ່ຄອບຄົວໃນປະເທດແຫ່ງນີ້ປະມານ 85%.
