ພາຍຸໄຕ້ຝຸ່ນຊານຊານພັດຖະຫລົ່ມຍີ່ປຸ່ນ ອົບພະຍົບປະຊາຊົນ 4 ລ້ານກວ່າຄົນ
ປະຊາຊົນເກືອບ 4 ລ້ານຄົນຢູ່ພາກໃຕ້ຂອງຍີ່ປຸ່ນໄດ້ຮັບຄໍາສັ່ງໃຫ້ອົບພະຍົບອອກຈາກພື້ນທີ່ ເນື່ອງຈາກອິດທິພົນຂອງພາຍຸໄຕ້ຝຸ່ນຊານຊານທີ່ພັດຂຶ້ນຝັ່ງເຊົ້າວັນທີ 29 ສິງຫາ ສົ່ງຜົນເຮັດໃຫ້ເກີດລົມພັດແຮງ, ຝົນຕົກໜັກ ແລະ ຄື້ນພາຍຸພັດເຂົ້າຝັ່ງ ລວມທັງເກີດເຫດການໄຟຟ້າດັບ ກະທົບປະຊາຊົນນັບແສນຄົນຢູ່ເກາະຄິວຊູ.
ກົມອຸຕຸນິຍົມວິທະຍາຂອງຍີ່ປຸ່ນອອກປະກາດເຕືອນສຸກເສີນລະດັບສູງ ໂດຍຄາດວ່າພາຍຸອາດເຮັດໃຫ້ເກີດນໍ້າຖ້ວມ ແລະ ດິນເຈື່ອນຮຸນແຮງໃນພື້ນທີ່ສ່ວນຫລາຍຂອງເກາະຄິວຊູ ເຊິ່ງເປັນເກາະສໍາຄັນທີ່ຢູ່ທາງໃຕ້ສຸດຂອງປະເທດ.
ຖ້ຽວບິນຫລາຍຮ້ອຍຖ້ຽວຖືກຍົກເລີກ, ບໍລິການລົດໄຟຊິນຄັນເຊນຢຸດໃຫ້ບໍລິການ ແລະ ບໍລິສັດຂະໜາດໃຫຍ່ເຊັ່ນ: Toyota, Honda, Mazda ແລະ Nissan ປິດໂຮງງານເພື່ອຄວາມປອດໄພ. ຂະນະດຽວກັນ, ທາງການຍີ່ປຸ່ນໄດ້ເຕືອນເຖິງ “ສະຖານະການທີ່ເປັນໄພຕໍ່ຊີວິດ” ທີ່ອາດເກີດຂຶ້ນໃນບາງພື້ນທີ່ຂອງແຂວງໂອອິຕະ. ພ້ອມແນະນໍາໃຫ້ປະຊາຊົນ 57,000 ກວ່າຄົນ ອົບພະຍົບເພື່ອຄວາມປອດໄພທັນທີ.
ເຖິງວ່າພາຍຸໄຕ້ຝຸ່ນຊານຊານຈະອ່ອນກໍາລັງລົງພາຍຫລັງຂຶ້ນຝັ່ງ, ແຕ່ຍັງເຮັດໃຫ້ເກີດຝົນຕົກໜັກຕໍ່ເນື່ອງໃນຫລາຍພື້ນທີ່ ໂດຍສະເພາະຢູ່ເຂດຄິວຊູ ເຊິ່ງຄາດວ່າຈະມີປະລິມານນໍ້າຝົນສູງເຖິງ 1 ແມັດໃນບາງພື້ນທີ່ ເຮັດໃຫ້ເກີດຄວາມກັງວົນເລື່ອງນໍ້າຖ້ວມ ແລະ ດິນເຈື່ອນເພີ່ມອີກໃນທ້າຍອາທິດນີ້.
ອ້າງອີງ:
