ອິດສະລາແອນບຸກເຂດເວສແບງເປັນມື້ທີສອງ ສັງຫານຜູ້ກໍ່ການຮ້າຍເພີ່ມອີກ 5 ຄົນ
ກອງທັບອິດສະລາແອນປະຕິບັດການດ້ານຄວາມໝັ້ນຄົງໃນເຂດເວສແບງເປັນມື້ທີສອງຕໍ່ເນື່ອງກັນ ໂດຍມີການສັງຫານຜູ້ກໍ່ການຮ້າຍອີກຢ່າງໜ້ອຍ 5 ຄົນ.
ວັນທີ 29 ສິງຫາ, ສໍານັກຂ່າວຕ່າງປະເທດລາຍງານວ່າ: ກອງທັບອິດສະລາແອນອອກຖະແຫລງການກ່ຽວກັບປະຕິບັດການດ້ານຄວາມໝັ້ນຄົງຢູ່ເມືອງທຸລຄາເຣມ ໃນເຂດເວສແບງ ໃນວັນທີ 29 ສິງຫາ ແລະ ສາມາດສັງຫານຜູ້ສົງໄສເປັນສະມາຊິກກຸ່ມກໍ່ການຮ້າຍໄດ້ອີກຢ່າງໜ້ອຍ 5 ຄົນ.
ປະຕິບັດການດັ່ງກ່າວເຊິ່ງເກີດຂຶ້ນເປັນມື້ທີສອງຕໍ່ຈາກວັນທີ 28 ສິງຫາຜ່ານມາ ເຊິ່ງເຈົ້າໜ້າທີ່ຝ່າຍຄວາມໝັ້ນຄົງວິສາມັນຜູ້ສົງໄສເປັນກຸ່ມກໍ່ການຮ້າຍຢ່າງໜ້ອຍ 9 ຄົນ ເພີ່ມຈໍານວນຜູ້ເສຍຊີວິດຕອນນີ້ເປັນຢ່າງໜ້ອຍ 14 ຄົນ.
ຖືເປັນຄັ້ງທໍາອິດນັບແຕ່ການລຸກຮື້ອິນຕິຟາດາຄັ້ງທີສອງ ລະຫວ່າງປີ 2000-2005 ທີ່ກອງທັບອິດສະລາແອນປະຕິບັດການພ້ອມກັນໃນຫລາຍເມືອງຂອງເຂດເວສແບງ ໂດຍປະຕິບັດການຄັ້ງນີ້ໃຊ້ທັງການໂຈມຕີພາກພື້ນດິນ ແລະ ການໂຈມຕີທາງອາກາດ.
ທ່ານ ອິດສະລາແອນ ຄັດ ລັດຖະມົນຕີກະຊວງການຕ່າງປະເທດອິດສະລາແອນ ກ່າວວ່າ: ພາລະກິດດ້ານຄວາມໝັ້ນຄົງຂອງທະຫານຄັ້ງນີ້ມີຈຸດປະສົງເພື່ອທໍາລາຍໂຄງລ່າງພື້ນຖານດ້ານການກໍ່ການຮ້າຍທີ່ໄດ້ຮັບການສະໜັບສະໜູນຈາກອີຣານ.
ສ່ວນກຸ່ມປາແລັສຕິນ ອິສລາມິກ ຈີຮັດ (PIJ) ເຊິ່ງເປັນກອງກໍາລັງຕິດອາວຸດຂະໜາດໃຫຍ່ອັນດັບສອງຂອງປາແລັສຕິນ ໂດຍເປັນພັນທະມິດກັບກຸ່ມຮາມັດ ແລະ ມີຖານທີ່ໝັ້ນຢູ່ທາງຕອນເໜືອຂອງເຂດເວສແບງ ອອກຖະແຫລງການປະນາມອິດສະລາແອນຕ້ອງການເປີດເສິກຄູ່ຂະໜານກັບສົງຄາມຢູ່ເຂດກາຊາ.
ທັງນີ້, ສະຖານະການຢູ່ເຂດເວສແບງທະວີຄວາມຮຸນແຮງ ຄູ່ຂະໜານໄປກັບສົງຄາມຢູ່ເຂດກາຊາ ເຊິ່ງຍືດເຍື້ອມາແຕ່ວັນທີ 7 ຕຸລາ 2023 ໂດຍມີຜູ້ເສຍຊີວິດຢູ່ເຂດເວສແບງແລ້ວ 637 ຄົນ. ຂະນະທີ່ພົນລະເມືອງອິດສະລາແອນເສຍຊີວິດຢ່າງໜ້ອຍ 19 ຄົນ ສ່ວນຫລາຍເປັນທະຫານ.
