ຫວຽດນາມ ກຽມສົ່ງວັກຊີນອະຫິວາໝູອາຟຣິກາ 150,000 ໂດສ ໃຫ້ຟີລິບປິນ
August 28, 2024 - 4:42 PM
ວັນທີ 28 ສິງຫາ 2024, ສໍານັກຂ່າວແຫ່ງຊາດຫວຽດນາມ (VNA) ລາຍງານວ່າ: ບໍລິສັດເອແວກ ຫວຽດນາມ ເຊິ່ງເປັນຜູ້ພັດທະນາ ແລະ ຜະລິດວັກຊີນປ້ອງກັນພະຍາດອະຫິວາໝູອາຟຣິກາ (ASF) ກຽມສົ່ງວັກຊີນຈໍານວນ 150,000 ໂດສ ໄປໃຫ້ຟີລິບປິນ ເຊິ່ງເປັນຮອບທໍາອິດຕາມຂໍ້ຕົກລົງສັ່ງຊື້ທັງໝົດ 600,000 ໂດສ.
ທັງນີ້, ຫວຽດນາມປະກາດຜົນສໍາເລັດໃນການພັດທະນາວັກຊີນຕ້ານພະຍາດ ASF 2 ຊະນິດ ເພື່ອນໍາໃຊ້ພາຍໃນປະເທດ ໃນເດືອນກໍລະກົດ 2023 ຖືເປັນປະເທດທໍາອິດຂອງໂລກທີ່ດໍາເນີນການດັ່ງກ່າວ.
ຂ່າວຂອງ VNA ໃຫ້ຮູ້ອີກວ່າ: ເອແວກ ຫວຽດນາມ ຢູ່ລະຫວ່າງຂໍຮັບການພິຈາລະນາອະນຸມັດວັກຊີນປ້ອງກັນ ASF ຈາກອິນເດຍ, ອິນໂດເນເຊຍ, ມາເລເຊຍ, ເນປານ, ມຽນມາ ແລະ ໄນຈີເຣຍ. ພ້ອມທັງຢືນຢັນປະສິດທິພາບຂອງວັກຊີນທັງສອງລາຍການ ເຊິ່ງມີການນໍາໃຊ້ພາຍໃນຫວຽດນາມແລ້ວ 2.3 ລ້ານກວ່າໂດສ ຈົນຮອດປັດຈຸບັນ.
