ນ້ຳຖ້ວມໜັກຫລາຍພື້ນທີ່ຂອງໄນຈີເຣຍ ມີຜູ້ເສຍຊີວິດແລ້ວ 170 ກວ່າຄົນ ບໍ່ມີບ່ອນຢູ່ອາໄສ 2 ແສນຄົນ
ທ່ານ ມານໂຊ ເອເຊເຄຍ (Manzo Ezekiel) ໂຄສົກສໍານັກງານແກ້ໄຂສະຖານະການສຸກເສີນແຫ່ງຊາດ (NEMA) ຂອງໄນຈີເຣຍ ລາຍງານຜົນກະທົບຈາກນໍ້າຖ້ວມໜັກໃນຫລາຍພື້ນທີ່ຂອງປະເທດໃນຫລາຍອາທິດຜ່ານມາ ສົ່ງຜົນເຮັດໃຫ້ມີຜູ້ເສຍຊີວິດແລ້ວຢ່າງໜ້ອຍ 170 ຄົນ. ຂະນະທີ່ປະຊາຊົນອີກ 2 ແສນກວ່າຄົນບໍ່ມີບ່ອນຢູ່ອາໄສ.
ໂດຍທາງພາກເໜືອຂອງໄນຈີເຣຍໄດ້ຮັບຜົນກະທົບໜັກທີ່ສຸດຈາກສະຖານະການນໍ້າຖ້ວມທີ່ເກີດຂຶ້ນ. ຂະນະທີ່ພື້ນທີ່ອື່ນໆຍັງມີຄວາມສ່ຽງທ່າມກາງຝົນທີ່ຕົກໜັກ ແລະ ລະດັບນໍ້າໃນແມ່ນໍ້າສອງສາຍໃຫຍ່ທີ່ສຸດຂອງປະເທດ ໄດ້ແກ່ ແມ່ນໍ້າໄນເຈີ ແລະ ແມ່ນໍ້າເບນິວຍັງເພີ່ມສູງຂຶ້ນ.
ໂຄສົກ NEMA ກ່າວວ່າ: ຮູບແບບຂອງນໍ້າຖ້ວມຢູ່ໄນຈີເຣຍມັກຈະເກີດຂຶ້ນຢູ່ທາງພາກເໜືອ ກ່ອນຈະໄຫລໄປພາກກາງ ແລະ ພາກໃຕ້ ເນື່ອງຈາກນໍ້າຈະໄຫລລົງສູ່ບ່ອນຕໍ່າ ໂດຍຄາດວ່າໃນມໍ່ໆນີ້ພື້ນທີ່ພາກກາງຈະຜະເຊີນສະພາບນໍ້າຖ້ວມໃນລັກສະນະດຽວກັນ ແລະ ອາດຈະໄຫລຖ້ວມຫລາຍພື້ນທີ່ຂອງພາກໃຕ້ນໍາ.
ອ້າງອີງ:
