ອາຟຣິກາເລີ່ມໄດ້ຮັບວັກຊີນປ້ອງກັນພະຍາດໝາກສຸກລີງ ເພີ່ມຄວາມຫວັງຄວບຄຸມການລະບາດຮອບໃໝ່
ອາເມລິກາບໍລິຈາກວັກຊີນປ້ອງກັນພະຍາດໝາກສຸກລີງ 10,000 ໂດສ ໃຫ້ໄນຈີເຣຍ ເພື່ອປ້ອງກັນການແຜ່ລະບາດຮອບໃໝ່ ເຊິ່ງອາຟຣິກາເປັນສູນກາງຂອງການແຜ່ລະບາດ.
ວັນທີ 28 ສິງຫາ, ສໍານັກຂ່າວຕ່າງປະເທດລາຍງານວ່າ: ກະຊວງສາທາລະນະສຸກໄນຈີເຣຍອອກຖະແຫລງການວ່າ: ໄດ້ຮັບບໍລິຈາກວັກຊີນ Imvanex ຈໍານວນ 10,000 ໂດສ ຂອງບໍລິສັດບາວາຣຽນ ນໍດິກ ຈາກດານມາກ ສໍາລັບພະຍາດໝາກສຸກລີງ ເຊິ່ງສາມາດສ້າງພູມຕ້ານທານຕໍ່ພະຍາດໝາກສຸກລີງ ຫລື Mpox ໄດ້ໃນລະດັບໜຶ່ງ ຖືເປັນປະເທດທໍາອິດໃນທະວີບອາຟຣິກາທີ່ໄດ້ຮັບວັກຊີນປ້ອງກັນທ່າມກາງການແຜ່ລະບາດຂອງພະຍາດໝາກສຸກລີງຮອບໃໝ່.
ສໍາລັບວັກຊີນທີ່ໄນຈີເຣຍໄດ້ຮັບນັ້ນ ເປັນການສະໜັບສະໜູນຈາກອາເມລິກາ. ປັດຈຸບັນ ໜ່ວຍງານສາທາລະນະສຸກຂອງໄນຈີເຣຍຢືນຢັນຜູ້ຕິດເຊື້ອພະຍາດໝາກສຸກລີງສະສົມໃນປີນີ້ຢ່າງໜ້ອຍ 40 ຄົນ, ແຕ່ຫລາຍຝ່າຍປະເມີນວ່າ: ຈໍານວນຜູ້ຕິດເຊື້ອໃນຄວາມເປັນຈິງອາດຫລາຍກວ່າ 700 ຄົນ.
ເຖິງຢ່າງໃດກໍຕາມ, ຄອງໂກ ເປັນສູນກາງການແຜ່ລະບາດຂອງພະຍາດໝາກສຸກລີງຮອບປັດຈຸບັນ ໂດຍມີການຢືນຢັນຜູ້ຕິດເຊື້ອສະສົມຫລາຍກວ່າ 18,000 ຄົນ ແລະ ເສຍຊີວິດແລ້ວຢ່າງໜ້ອຍ 615 ຄົນ ນັບແຕ່ຕົ້ນປີນີ້.
ທັງນີ້, ການແຜ່ລະບາດຂອງພະຍາດໝາກສຸກລີງຈາກກຸ່ມເຊື້ອໄວຣັສສາຍພັນ 1ບີ ຫລື ເຄລດ 1 ບີ ທີ່ມີການກາຍພັນຈາກກຸ່ມເຊື້ອໄວຣັສສາຍພັນ 1 ຫລື ເຄລດ 1 ແລະ ມີຄວາມຮຸນແຮງຫລາຍກວ່າ ສົ່ງຜົນເຮັດໃຫ້ອົງການອະນາໄມໂລກ (WHO) ປະກາດໃຫ້ການແຜ່ລະບາດຂອງພະຍາດດັ່ງກ່າວເປັນສະຖານະການສຸກເສີນດ້ານສາທາລະນະສຸກລະຫວ່າງປະເທດເປັນຄັ້ງທີສອງ ພາຍໃນໄລຍະເວລາພຽງ 2 ປີ ຕໍ່ຈາກການປະກາດລະຫວ່າງປີ 2022-2023 ເຊິ່ງຕອນນັ້ນເປັນການແຜ່ລະບາດຂອງກຸ່ມເຊື້ອໄວຣັສສາຍພັນ 2 ຫລື ເຄລດ 2.
ສູນຄວບຄຸມ ແລະ ປ້ອງກັນພະຍາດອາຟຣິກາ (ອາຟຣິກາ ຊີດີຊີ) ລາຍງານສະຖານະການພະຍາດໝາກສຸກລີງ ຫລື Mpox ຢູ່ພາກພື້ນວ່າ: ຈໍານວນຜູ້ຕິດເຊື້ອສະສົມນັບແຕ່ຕົ້ນປີນີ້ຈົນຮອດວັນທີ 23 ສິງຫາຜ່ານມາ ມີຢ່າງໜ້ອຍ 21,466 ຄົນ ແລະ ມີຜູ້ເສຍຊີວິດສະສົມຢ່າງໜ້ອຍ 591 ຄົນ. ຕອນນີ້ມີຢ່າງໜ້ອຍ 13 ປະເທດຢູ່ອາຟຣິກາ ເຊິ່ງຢືນຢັນຜູ້ຕິດເຊື້ອພະຍາດໝາກສຸກລີງ ໄດ້ແກ່: ບຸຣຸນດີ, ແຄເມີຣູນ, ອາຟຣິກາກາງ, ຄອງໂກ, ໄອວໍຣີໂຄດ, ກາບອງ, ໄລບີເຣຍ, ເກນຢາ, ໄນຈີເຣຍ, ຣາວັນດາ, ອາຟຣິກາໃຕ້ ແລະ ຢູກັນດາ.
