ປກສ ເມືອງໄຊເສດຖາ ສຶກສາອົບຮົມໄວໜຸ່ມ 21 ຄົນ ມົ້ວສຸມດື່ມຄໍລາເຈນ ແລະ ນ້ຳກະທ່ອມ

ວັນທີ 26 ສິງຫາ 2024 ທີ່ສະໂມສອນກອງບັນຊາການ ປ້ອງກັນຄວາມສະຫງົບ ເມືອງໄຊເສດຖາ ແຂວງອັດຕະປື ໄດ້ນຳເອົາກຸ່ມໄວໜຸ່ມ 21 ຄົນ, ຍິງ 17 ຄົນ ທີ່ມົ້ວສຸມສິ່ງເສບຕິດມາສຶກສາອົບຮົມ ແລະ ເຮັດບົດບັນທຶກ ເພື່ອບໍ່ໃຫ້ມີການກັບຄືນໄປເຮັດໃນສິ່ງທີ່ບໍ່ດີນັ້ນອີກ.

ພັນໂທ ບຸນດົ້ງ ພິຈິດ ຮອງກອງບັນຊາການ ປ້ອງກັນຄວາມສະຫງົບເມືອງໄຊເສດຖາ ໄດ້ໂອ້ລົມສຶກສາອົບຮົມ ແລະ ກ່າວເຕືອນ ຕໍ່ກຸ່ມເປົ້າໝາຍ ໃຫ້ຮູ້ເຖິງຄວາມຜິດຂອງຕົນເອງ ເພື່ອບໍ່ໃຫ້ກະທຳຊ້ຳອີກ ແລະ ຮຽກຮ້ອງໃຫ້ພໍ່ແມ່ຜູ້ປົກຄອງ ຕ້ອງໄດ້ເອົາໃຈໃສ່ຕິດຕາມການເຄື່ອນໄຫວຂອງລູກຫລານຢ່າງໃກ້ ຊິດ, ຮຽກຮ້ອງໃຫ້ລູກຫລານຜູ້ທີ່ຍັງໜຸ່ມນ້ອຍ, ທີ່ເປັນກໍາລັງແຮງອັນສໍາຄັນຂອງປະເທດຊາດ ຈົ່ງຢ່າໄດ້ໄປມົ້ວສຸມກັບສິ່ງເສບຕິດອີກ ເພາະວ່າຖ້າຕິດສິ່ງເສບຕິດຂຶ້ນມາກໍຈະພາໃຫ້ເສຍເງິນ, ເສຍສຸຂະພາບ ແລະ ເສຍອະນາຄົດ.

ທັງ 21 ຄົນຖືກເຈົ້າໜ້າທີ່ກັກຕົວໃນວັນທີ 23 ສິງຫາ 2024, ພາຍຫລັງໄດ້ຮັບແຫລ່ງຂ່າວວ່າມີໄວໜຸ່ມຈໍານວນໜຶ່ງມົ້ວສຸມສິ່ງເສບຕິດ ທາງເຈົ້າໜ້າທີ່ ປກສ ເມືອງ ຈຶ່ງໄດ້ປະສານກັບ ປກສ ກຸ່ມບ້ານ ໂພໄຊ ແລະ ອົງການຈັດຕັ້ງ ບ້ານຊ້າຍ ພ້ອມກັນລົງກວດກາຕົວຈິງຢູ່ທີ່ເຮືອນຂອງນາງ ຈັນສະໄໝ ອາຍຸ 58 ປີ, ອາຊີບປະຊາຊົນ, ບ້ານຊ້າຍ ເຫັນວ່າມີມູນຄວາມຈິງແທ້ ຈຶ່ງກັກຕົວກຸ່ມໄວໜຸ່ມ ຈໍານວນ 21 ຄົນ ແລະ ຢຶດຂອງກາງປະກອບ ມີ: ຢາສູບໄຟຟ້າ 8 ອັນ, ຄໍລາເຈນ 26 ຊອງ, ນ້ຳກະທ່ອມຕົ້ມ 1 ໝໍ້ ມາສອບສວນ ສຶກສາອົບຮົມ.