ທູດລາວຄົນໃໝ່ ປະຈຳ ສປປ ເກົາຫລີ ຍື່ນສານຕາຕັ້ງໄປຍັງ ທ່ານ ກິມ ເຈິງ ອຸນ ປະທານກິດຈະການແຫ່ງລັດ ສປປ ເກົາຫລີ

ວັນທີ 22 ສິງຫາ 2024 ທີ່ນະຄອນຫລວງພຽງຢາງ ສປປ ເກົາຫລີ, ທ່ານ ແກ້ວ ມັກຄະຜົນ ໄດ້ເຂົ້າຍື່ນສານຕາຕັ້ງໂດຍຜ່ານ ທ່ານ ແຈ ຣອງ ແຮ ປະທານຄະນະກຳມະການປະຈໍາສະພາປະຊາຊົນສູງສຸດ ແຫ່ງ ສາທາລະນະລັດ ປະຊາຊົນ ປະຊາທິປະໄຕເກົາຫລີ ໄປຍັງ ທ່ານ ກິມ ເຈິງ ອຸນ ເລຂາທິການໃຫຍ່ພັກແຮງງານເກົາຫລີ ປະທານກິດຈະການແຫ່ງລັດ ສປປ ເກົາຫລີ ເພື່ອດຳລົງຕໍາແໜ່ງເປັນເອກອັກຄະລັດຖະທູດ ວິສາມັນຜູ້ມີອຳນາດເຕັມ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ຄົນໃໝ່ ປະຈຳ ສາທາລະນະລັດ ປະຊາຊົນ ປະຊາທິປະໄຕເກົາຫລີ.

ໂອກາດນີ້, ທ່ານ ແກ້ວ ມັກຄະຜົນ ໄດ້ນຳເອົາຄວາມຢື້ຢາມຖາມຂ່າວອັນອົບອຸ່ນພ້ອມດ້ວຍຄໍາອວຍພອນໄຊອັນປະເສີດຂອງ ທ່ານ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນ ປະຕິວັດລາວ ປະທານປະເທດ ແຫ່ງ ສປປ ລາວ ໂດຍຜ່ານ ທ່ານ ແຈ ຣອງ ແຮ ໄປຍັງ ທ່ານ ກິມ ເຈິງ ອຸນ ແລະ ປະຊາຊົນ ສປປ ເກົາຫລີ ອ້າຍນ້ອງທຸກຖ້ວນໜ້າ.

ທ່ານ ແຈ ຣອງ ແຮ ໄດ້ສະແດງຄວາມຊົມເຊີຍຕໍ່ ທ່ານ ແກ້ວ ມັກຄະຜົນ ທີ່ໄດ້ຖືກແຕ່ງຕັ້ງໃຫ້ມາດຳລົງຕຳແໜ່ງ ເປັນເອກອັກຄະລັດຖະທູດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ຄົນໃໝ່ ປະຈໍາ ສາທາລະນະລັດ ປະຊາຊົນ ປະຊາທິປະໄຕເກົາຫລີ ເພື່ອປະຕິບັດໜ້າທີ່ອັນຊົງກຽດ ແລະ ສູງສົ່ງ, ພ້ອມທັງອວຍພອນໃຫ້ ເອກອັກຄະລັດຖະທູດ ຈົ່ງປະສົບຜົນສຳເລັດ ໃນການເຄື່ອນໄຫວວຽກງານການທູດຂອງຕົນ.

ທ່ານ ແກ້ວ ມັກຄະຜົນ ໄດ້ຕີລາຄາຕໍ່ສາຍພົວພັນມິດຕະພາບ ແລະ ການຮ່ວມມືອັນດີ ລະຫວ່າງ ສປປ ລາວ ແລະ ສປປ ເກົາຫລີ ຊຶ່ງແມ່ນການພົວພັນຮ່ວມມືທີ່ມີມູນເຊື້ອມາແຕ່ດົນນານ ທີ່ໄດ້ຮັບການກໍ່ຕັ້ງຂຶ້ນໂດຍ ປະທານ ໄກສອນ ພົມວິຫານ ຜູ້ນໍາທີ່ແສນເຄົາລົບຮັກຂອງປະຊາຊົນລາວ ແລະ ປະທານ ກິມ ອິນ ຊຸງ ຜູ້ນໍາທີ່ຍິ່ງໃຫຍ່ຂອງປະຊາຊົນ ສປປ ເກົາຫລີ ແລະ ສືບທອດໂດຍບັນດາຜູ້ນໍາຮຸ່ນຕໍ່ມາຂອງສອງປະເທດ, ສປປ ລາວ ແລະ ສປປ ເກົາຫລີ ສອງປະເທດພວກເຮົາໄດ້ໃຫ້ການສະໜັບສະໜູນຊ່ວຍເຫລືອຊຶ່ງກັນ ແລະ ກັນ ໃນໄລຍະການຕໍ່ສູ້ເພື່ອປົດປ່ອຍປະເທດຊາດໃນເມື່ອກ່ອນ, ກໍຄືການປົກປັກຮັກສາ ແລະ ພັດທະນາປະເທດຊາດຂອງແຕ່ລະປະເທດໃນປັດຈຸບັນ.

ຂ່າວ: ປະຊາຊົນ