ສິງກະໂປຍົກລະດັບຄັດກອງພະຍາດໝາກສຸກລີງ ປີນີ້ພົບຜູ້ຕິດເຊື້ອ Clade 2 ແລ້ວ 13 ຄົນ

     ລັດຖະບານສິງກະໂປປະກາດເພີ່ມຄວາມເຂັ້ມງວດຂອງການກວດຄັດກອງດ້ານສາທາລະນະສຸກຕາມຈຸດຜ່ານແດນ ທ່າມກາງການແຜ່ລະບາດຮອບໃໝ່ຂອງພະຍາດໝາກສຸກລີງ ເຊິ່ງໃນປະເທດພົບຜູ້ຕິດເຊື້ອສາຍພັນທີ 2 ສະສົມແລ້ວ 13 ຄົນໃນປີນີ້.

     ວັນທີ 23 ສິງຫາ, ສໍານັກຂ່າວຕ່າງປະເທດລາຍງານວ່າ: ກະຊວງສາທາລະນະສຸກສິງກະໂປອອກຖະແຫລງການກ່ຽວກັບການເພີ່ມຄວາມເຂັ້ມງວດຂອງມາດຕະການຄັດກອງທາງສາທາລະນະສຸກຕາມຈຸດກວດຜ່ານແດນລະຫວ່າງປະເທດຢູ່ສະໜາມບິນສາກົນຊາງງີ ແລະ ສະໜາມບິນເຊເລຕາ ຕະຫລອດຮອດທ່າເຮືອທຸກແຫ່ງ ເພື່ອເຝົ້າລະວັງພະຍາດໝາກສຸກລີງ ຫລື Mpox ໂດຍສະເພາະຜູ້ທີ່ເດີນທາງມາຈາກປະເທດທີ່ມີການແຜ່ລະບາດຂອງພະຍາດ.

     ທັງນີ້, ຖ້າເຈົ້າໜ້າທີ່ກວດພົບບຸກຄົນທີ່ມີອາການດສົງໄສເຊັ່ນ: ເປັນໄຂ້ ແລະ ມີຜືນຂຶ້ນຕາມຮ່າງກາຍ ຈະມີການສົ່ງຕໍ່ໄປໂຮງໝໍ ເພື່ອໃຫ້ເຂົ້າຮັບການກວດຢ່າງລະອຽດ.

     ນັບແຕ່ຕົ້ນປີນີ້ ສິງກະໂປຢືນຢັນຜູ້ຕິດເຊື້ອພະຍາດໝາກສຸກລີງສະສົມຢ່າງໜ້ອຍ 13 ຄົນ ໂດຍທຸກຄົນເປັນຜູ້ຕິດເຊື້ອຈາກກຸ່ມເຊື້ອໄວຣັສສາຍພັນທີ 2 ຫລື Clade 2 ແລະ ຍັງບໍ່ມີຜູ້ເສຍຊີວິດ.