ສີລັງກາ ອະນຸມັດ ຟຣີວີຊາ 35 ປະເທດ ເພື່ອກະຕຸ້ນການທ່ອງທ່ຽວ
ສີລັງກາປະກາດອະນຸມັດຟຣີວີຊາທ່ອງທ່ຽວໃຫ້ 35 ປະເທດ ລວມທັງອິນເດຍ, ຈີນ, ອັງກິດ ແລະ ໄທ ເພື່ອກະຕຸ້ນເສດຖະກິດ.
ວັນທີ 23 ສິງຫາ 2024, ສໍານັກຂ່າວຕ່າງປະເທດລາຍງານວ່າ: ສີລັງກາປະກາດອະນຸມັດຟຣີວີຊາທ່ອງທ່ຽວໃຫ້ 35 ປະເທດ ລວມທັງອິນເດຍ, ຈີນ, ອັງກິດ ແລະ ໄທ ເພື່ອກະຕຸ້ນເສດຖະກິດ.
ການປະກາດຄັ້ງນີ້ເປັນໜຶ່ງໃນຄວາມພະຍາຍາມກະຕຸ້ນການທ່ອງທ່ຽວ ແລະ ຟື້ນຟູວິກິດເສດຖະກິດຂອງປະເທດ ໂດຍນັກທ່ອງທ່ຽວຈະໄດ້ຮັບວີຊາ 30 ວັນພາຍໃຕ້ໂຄງການຕົວແບບ 6 ເດືອນ ເລີ່ມແຕ່ ວັນທີ 1 ຕຸລານີ້.
ທ່ານ ບັນດູລາ ກຸນາວາດານາ ໂຄສົກຄະນະລັດຖະບານ ແລະ ລັດຖະມົນຕີກະຊວງຄົມມະນາຄົມຂອງສີລັງກາ ຖະແຫລງວ່າ: ເປົ້າໝາຍຂອງລັດຖະບານ ຄືການປ່ຽນສີລັງກາໃຫ້ເປັນປະເທດທີ່ອອກຟຣີວີຊາ ເຊັ່ນດຽວກັບສິງກະໂປ, ໄທ ແລະ ຫວຽດນາມ ເພື່ອໃຊ້ປະໂຫຍດຈາກອຸດສາຫະກໍາການທ່ອງທ່ຽວທີ່ເຕີບໃຫຍ່ຢ່າງວ່ອງໄວ.
ສໍາລັບປະເທດທີ່ຈະໄດ້ຮັບສິດດັ່ງກ່າວ ລວມທັງອິນເດຍ, ຈີນ, ອັງກິດ, ເຢຍລະມັນ, ໂຮນລັງ, ເເບນຊິກ, ແອັສປາຍ, ດານມາກ, ໂປໂລຍ, ກາຊັກສະຖານ, ອາຣາບີຊາອຸດິ, ສະຫະລັດອາຣັບເອມິເຣດ (UAE), ເນປານ, ອິນໂດເນເຊຍ, ຣັດເຊຍ, ໄທ, ມາເລເຊຍ, ຍີ່ປຸ່ນ ແລະ ຝຣັ່ງ.
ອຸດສາຫະກໍາການທ່ອງທ່ຽວຂອງສີລັງກາໄດ້ຮັບຜົນກະທົບຢ່າງໜັກຈາກການລະບາດຂອງພະຍາດໂຄວິດ-19 ແລະ ວິກິດການເງິນຮຸນແຮງ ໃນປີ 2022 ເຊິ່ງເຮັດໃຫ້ເກີດການປະທ້ວງຄັ້ງໃຫຍ່ ແລະ ການຂາດເຂີນສິ່ງຈໍາເປັນເຊັ່ນ: ນ້ຳມັນເຊື້ອໄຟ.
ຕາມຂໍ້ມູນຈາກກົມພັດທະນາສີລັງກາ, ນັກທ່ອງທ່ຽວສ່ວນຫລາຍມາຈາກອິນເດຍເຖິງ 246,922 ຄົນ ແລະ ຮອງລົງມາແມ່ນອັງກິດ 123,992 ຄົນ ສ່ວນຂໍ້ມູນຂອງທະນາຄານກາງສີລັງກາ ລະບຸວ່າ: ສີລັງກາມີລາຍໄດ້ຈາກການທ່ອງທ່ຽວ 1,500 ລ້ານໂດລາສະຫະລັດ ໃນໄລຍະ 6 ເດືອນທໍາອິດຂອງປີ 2024 ເພີ່ມຂຶ້ນຈາກ 875 ລ້ານໂດລາສະຫະລັດ ເມື່ອທຽບໃສ່ໄລຍະເວລາດຽວກັນຂອງປີ 2023.
