ນະຄອນຫລວງວຽງຈັນ ຈະສຸມໃສ່ 10 ວຽກງານສຳຄັນ ເພື່ອພັດທະນາເສດຖະກິດ-ສັງຄົມ

ວັນທີ 23 ສິງຫາ 2024 ນີ້, ນະຄອນຫລວງວຽງຈັນ ໄດ້ຈັດງານເຕົ້ໂຮມຫວນຄືນມູນເຊື້ອວັນຢຶດອຳນາດ 23 ສິງຫາ ຄົບຮອບ 49 ປີ ຕິດພັນກັບການຍູ້ແຮງສ້າງຂະບວນການ ເພື່ອຂໍ່ານັບຮັບຕ້ອນກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XII ຂອງພັກ ແລະ ກອງປະຊຸມໃຫຍ່ຂອງພັກ ຢູ່ນະຄອນຫລວງວຽງຈັນ.

ທ່ານ ອານຸພາບ ຕຸນາລົມ  ເລຂາຄະນະພັກ, ປະທານສະພາປະຊາຊົນ ນະ ຄອນຫລວງວຽງຈັນ ກ່າວວ່າ: ວັນທີ 23 ສິງຫາ 1975 ໄດ້ເປັນຂີດໝາຍສໍາຄັນ ໃນການກ້າວສູ່ການສະຖາປະນາ ສປປ ລາວ ຢ່າງສົມບູນ; ໃຫ້ເຫັນໄດ້ຄວາມໝາຍ, ຄວາມສໍາຄັນ ຂອງວັນດັ່ງກ່າວ ຖືເປັນຂີດໝາຍໃນຂະບວນການຕໍ່ສູ້ກູ້ຊາດ ເພື່ອຢຶດເອົາເອກະລາດ ອໍານາດອະທິປະໄຕ ແລະ ຜືນແຜ່ນດິນອັນຄົບຖ້ວນມາສູ່ປະເທດຊາດ ແລະ ປະຊາຊົນລາວບັນດາເຜົ່າຢ່າງມີໄຊ, ແມ່ນວັນໄຂສັງກາດໃໝ່, ສັງກາດທີ່ປະຊາຊົນລາວ ກໍຄືຊາວນະຄອນຫລວງວຽງຈັນ ໄດ້ມີຄວາມເປັນເອກະລາດ, ມີອຳນາດອະທິປະໄຕ ແລະ ຜືນແຜ່ນດິນອັນຄົບຖ້ວນ, ມີລະບົບການເມືອງທີ່ເປັນເອກະພາບ, ມີພັກເປັນແກນນຳປະເທດ ໄດ້ຮັບການສ້າງສາພັດທະນາ, ສັງຄົມມີຄວາມສະຫງົບເປັນລະບຽບຮຽບຮ້ອຍ, ບົດບາດອິດທິພົນຂອງຊາດລາວ ໄດ້ຮັບການຍົກສູງໃນເວທີສາກົນ.

ໃນຕໍ່ໜ້ານີ້ ເພື່ອຍູ້ແຮງຂະບວນການ ຂໍ່ານັບຮັບຕ້ອນກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XII ຂອງພັກ ຕິດພັນກັບກອງປະຊຸມໃຫຍ່ຂອງພັກ, ນະຄອນຫລວງວຽງຈັນ ຈະໄດ້ສຸມໃສ່ 10 ວຽກງານສຳຄັນຄື:

1.   ສຶກສາອົບຮົມການເມືອງ-ແນວຄິດ ໃຫ້ແກ່ສະມາຊິກພັກ, ພະນັກງານ, ທະຫານ, ຕຳຫລວດ, ນັກທຸລະກິດ, ຜູ້ປະກອບການ ແລະ ປະຊາຊົນບັນດາເຜົ່າ ພາຍໃນນະຄອນຫລວງ ຮັບຮູ້ ເຂົ້າໃຈ, ເຫັນໄດ້ຄວາມໝາຍສຳຄັນ ກອງປະຊຸມໃຫຍ່ຂອງພັກ ເພື່ອພ້ອມກັນຫັນໜ້າເຂົ້າມາປະກອບສ່ວນ ແລະ ມີສ່ວນຮ່ວມນຳກັນໃນການກະກຽມ ແລະ ດໍາເນີນກອງປະຊຸມໃຫຍ່ 3 ຂັ້ນຂອງພັກ, ເຊີດຊູນໍ້າໃຈຮັກຊາດ ແລະ ພ້ອມກັນພັດທະນາ ນະຄອນຫລວງວຽງຈັນ ກ້າວຂຶ້ນຕາມທິດ 6 ສ.

2.   ປະຕິບັດວຽກງານປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນ ເປັນເຈົ້າການສະກັດກັ້ນແກ້ໄຂປະກົດການຫຍໍ້ທໍ້ຕ່າງໆທີ່ເກີດຂຶ້ນ  ເປັນຕົ້ນ: ອັກຄີໄພ, ອຸປະຕິເຫດ, ຂີ້ລັກ, ປຸ້ນຈີ້ຊີງຊັບ, ຄ້າຂາຍ-ເສບຢາເສບຕິດ ແລະ ອື່ນໆ, ຮັບປະກັນ ເຮັດໃຫ້ສຳນັກງານອົງການ, ພະແນກການ-ອົງການທຽບເທົ່າພະແນກ, ເມືອງ, ບ້ານ, ຄອບຄົວ ໃນທົ່ວນະຄອນຫລວງວຽງຈັນ ມີຄວາມສະຫງົບ, ເປັນລະບຽບຮຽບຮ້ອຍ, ທັງສ້າງເງື່ອນໄຂສະດວກໃຫ້ແກ່ການປະຕິບັດໜ້າທີ່ ຂອງສະມາຊິກພັກ-ພະນັກງານ, ທະຫານ, ຕຳຫລວດ ແລະ ການດໍາລົງຊີວິດຂອງປະຊາຊົນບັນດາເຜົ່າ ແລະ ຜູ້ທີ່ພັກພາອາໃສ ຢູ່ນະຄອນຫລວງວຽງຈັນ.

3.   ເອົາໃຈໃສ່ຕໍ່ການກໍ່ສ້າງພັກໃຫ້ປອດໃສ, ເຂັ້ມແຂງ ແລະ ໜັກແໜ້ນ ຮັບປະກັນດ້ານຄຸນນະພາບ, ສ້າງໃຫ້ໄດ້ສະມາຊິກພັກດີເດັ່ນ ແລະ ເປັນແບບຢ່າງນໍາໜ້າໃຫ້ແກ່ມະຫາຊົນ, ເຊີດຊູບົດບາດການນຳພາຂອງພັກ, ຂອງລັດທຸກຂັ້ນໃຫ້ເຂັ້ມແຂງ.

4.   ເອົາໃຈໃສ່ບໍາລຸງ-ກໍ່ສ້າງພະນັກງານທາງດ້ານທິດສະດີ ຕິດພັນກັບພຶດຕິກໍາຕົວຈິງ, ສືບຕໍ່ຫັນພະນັກງານໜຸ່ມແໜ້ນ ລົງກໍ່ສ້າງຮາກຖານການເມືອງ, ພັດທະນາຊົນນະບົດ, ແກ້ໄຂຄວາມທຸກຍາກ ແລະ ວຽກງານ 3 ສ້າງ ເພື່ອຮັບປະກັນເຮັດໃຫ້ສະມາຊິກພັກ, ພະນັກງານ ມີຄວາມຮູ້, ຄວາມສາມາດ, ມີບົດຮຽນ, ປະສົບການ, ມີຄຸນທາດການເມືອງໜັກແໜ້ນ ແລະ ມີມາດຖານ, ເງື່ອນໄຂ ເພື່ອສືບທອດປ່ຽນແທນຢູ່ຄະນະພັກຂັ້ນຂອງຕົນ.

5.   ຊຸກຍູ້ການປະຕິບັດວຽກງານຮອບດ້ານ ຢູ່ພະແນກການ-ອົງການທຽບເທົ່າພະແນກ, ເມືອງ ແລະ ບ້ານ; ຍູ້ແຮງ ຂະບວນການແຂ່ງຂັນຮັກຊາດ ແລະ ພັດທະນາ ຕາມ 8 ຕົວຊີ້ວັດທີ່ກໍານົດອອກ ຕິດພັນກັບວຽກງານ 3 ສ້າງ, ການຈັດຕັ້ງປະຕິບັດ 2 ວາລະແຫ່ງຊາດ ແລະ ປະຕິບັດບັນດາຄໍາຂວັນ, ຂໍ້ແຂ່ງຂັນຂອງຕົນ ໃຫ້ເປັນຮູບປະທໍາຕົວຈິງ.

6.   ເອົາໃຈໃສ່ປັບປຸງກົນໄກການບໍລິຫານລັດ ແລະ ຂອດການປະສານງານ ຢູ່ພະແນກການ-ອົງການທຽບເທົ່າພະແນກ, ເມືອງ ແລະ ບ້ານ ໃຫ້ມີຄວາມສະດວກ, ວ່ອງໄວ, ທັນສະໄໝ, ສາມາດກວດສອບໄດ້ ແລະ ຫັນເປັນມືອາຊີບເທື່ອລະກ້າວ.

7.   ຍູ້ແຮງການຈັດຕັ້ງຜັນຂະຫຍາຍບັນດາຄາດໝາຍທີ່ໄດ້ກໍານົດໄວ້ໃນມະຕິກອງປະຊຸມໃຫຍ່ ຂອງຄະນະພັກແຕ່ລະຂັ້ນໃນໄລຍະທ້າຍສະໄໝ, ແຜນພັດທະນາເສດຖະກິດ-ສັງຄົມ ຂອງນະຄອນຫລວງ, ເມືອງ ແລະ ບ້ານ, ແຜນພັດທະນາຂະແໜງການ ຂອງພະແນກການ-ອົງການທຽບເທົ່າພະແນກ ທີ່ປະຕິ ບັດຍັງບໍ່ທັນສໍາເລັດ ຈະຕ້ອງສູ້ຊົນປະຕິບັດໃຫ້ສໍາເລັດຜົນ.

8.   ຊຸກຍູ້ການສ້າງເສດຖະກິດຄອບຄົວ, ຍົກລະດັບຄຸນນະພາບຊີວິດການເປັນຢູ່ຂອງສະມາຊິກພັກ, ພະນັກງານ, ທະຫານ, ຕໍາຫລວດ ແລະ ປະຊາຊົນບັນດາເຜົ່າ ທີ່ຢູ່ໃນຄວາມຮັບຜິດຊອບຂອງຕົນ ດ້ວຍການຜະລິດກະສິກໍາ, ການແປຮູບ-ປຸງແຕ່ງຜະລິດຕະພັນ, ການບໍລິການ ເພື່ອຫຼຸດຜ່ອນລາຍຈ່າຍ ແລະ ຜະລິດເປັນສິນຄ້າ,  ການມີວຽກເຮັດງານທຳ, ສ້າງລາຍຮັບເຂົ້າຄອບຄົວບົນຈິດໃຈເພິ່ງຕົນເອງ, ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງຕາມທິດຂອງສູນກາງພັກ ການສ້າງເສດຖະກິດເອກະລາດ ເປັນເຈົ້າຕົນເອງ ຢ່າງແຂງແຮງ; ຍູ້ແຮງຂະບວນການຜະລິດເປັນສິນຄ້າສົ່ງອອກ ເພື່ອທົດແທນການນໍາເຂົ້າ, ສົ່ງເສີມຜະລິດຕະພັນພາຍໃນ, ສ້າງການຫັນປ່ຽນການພັດທະນາເສດຖະກິດ-ສັງຄົມ ໃຫ້ໄປສູ່ຄຸນນະພາບໃໝ່ຢ່າງແຂງແຮງ; ຊຸກຍູ້ ສົ່ງເສີມຕົວແບບການຜະລິດ ໃຫ້ໄດ້ຕົວແບບທີ່ດີເດັ່ນ ເພື່ອປະກອບຄຳເຫັນໃນກອງປະຊຸມໃຫຍ່ ຂອງອົງຄະນະພັກເມືອງ ແລະ ນະຄອນຫລວງວຽງຈັນ; ເພີ່ມທະວີຄວາມເຂັ້ມແຂງ ຂອງບັນດາຫົວໜ່ວຍທຸລະກິດ, ຫ້າງຮ້ານ, ວິສາຫະກິດ, ຜູ້ປະກອບການພາຍໃນ ໃຫ້ພົ້ນເດັ່ນຂຶ້ນ ກາຍເປັນກຳລັງແຮງດ້ານເສດຖະກິດ ຂອງປະເທດ ແລະ ນະຄອນຫລວງວຽງຈັນ.

9.   ສ້າງຂະບວນການແຂ່ງຂັນສິລະປະ-ວັນນະຄະດີ, ກິລາແບບມວນຊົນ ໃຫ້ມີບັນຍາກາດຟົດຟື້ນ, ມ່ວນຊື່ນ ແລະ ໃຫ້ກາຍເປັນຂະບວນການຂອງມະຫາຊົນຢ່າງກວ້າງຂວາງ ບົນພື້ນຖານການປະຢັດ; ຍົກສູງຄຸນນະພາບການສຶກສາໃຫ້ດີຂຶ້ນກວ່າເກົ່າ, ສົ່ງເສີມມູນເຊື້ອວັດທະນະທຳອັນດີງາມ, ຮັກສາສິ່ງແວດລ້ອມ, ນຳໃຊ້ຊັບພະຍາກອນທຳມະຊາດແບບຍືນຍົງ.

10.  ປຸກລະດົມທົ່ວປວງຊົນຊາວນະຄອນຫລວງ ເຂົ້າມາມີສ່ວນຮ່ວມໃນການອອກແຮງງານ, ອະນາໄມ ສະຖານທີ່ຕ່າງໆ ໂດຍເປັນເຈົ້າການຂອງຊາວນະຄອນຫລວງວຽງຈັນທຸກຄົນ ຮ່ວມກັນສ້າງນະຄອນຫລວງວຽງຈັນ ໃຫ້ມີຄວາມສະອາດ-ສວຍງາມ, ສີຂຽວ, ເມືອງແຫ່ງສຸຂະພາບ ແລະ ການພັດທະນາ, ເອົາໃຈໃສ່ໃນການຈັດສັນຄວາມບໍ່ເປັນລະບຽບຮຽບຮ້ອຍໃນຂອບເຂດເສັ້ນທາງຫລວງ ແລະ ເສັ້ນທາງພາຍໃນນະຄອນຫລວງວຽງຈັນ ເປັນຕົ້ນ: ການຕໍ່ເທີບ-ເງີບກວມເຂດສະຫງວນ, ປ້າຍໂຄສະນາ, ການຂາຍເຄື່ອງຊະຊາຍຕາມແຄມທາງ ແລະ ອື່ນໆ; ແກ້ໄຂໃຫ້ໄດ້ຢ່າງທັນການ ກ່ຽວກັບບັນຫາຂີ້ເຫຍື້ອ, ຮອງລະບາຍນໍ້າອຸດຕັນ ເຮັດໃຫ້ນໍ້າອັ່ງຂັງ, ບັນຫາສຽງເນືອງນັນ ແລະອື່ນໆ.