ກໍາປູເຈຍເປີດຕົວແອັບພລິເຄຊັນຈ່າຍເງິນຜ່ານມືຖື ອໍານວຍຄວາມສະດວກນັກທ່ອງທ່ຽວ

      ກໍາປູເຈຍເປີດຕົວລະບົບຈ່າຍເງິນຜ່ານໂທລະສັບມືຖື ເພື່ອຊ່ວຍໃຫ້ນັກທ່ອງທ່ຽວສາມາດສະແກນ ແລະ ຈ່າຍເງິນຄ່າສິນຄ້າ ແລະ ບໍລິການຕາມຮ້ານຄ້າ 3.3 ລ້ານແຫ່ງທົ່ວປະເທດ ໄດ້ຢ່າງມີປະສິດທິພາບ ແລະ ສະດວກສະບາຍ.

      ວັນທີ 20 ສິງຫາ, ສໍານັກຂ່າວຊິນຮົວລາຍງານວ່າ: ທ່ານ ນາງ ເຈຍ ສະເຣຍ ຜູ້ວ່າການທະນາຄານແຫ່ງຊາດກໍາປູເຈຍ ກ່າວວ່າ: ແອັບພລິເຄຊັນນີ້ຈະອໍານວຍຄວາມສະດວກດ້ານການຈ່າຍເງິນໃຫ້ນັກທ່ອງທ່ຽວຊາວຕ່າງປະເທດ ທີ່ສາມາດຕື່ມເງິນເຂົ້າບັນຊີຜູ້ໃຊ້ຂອງຕົນເອງຜ່ານກຸ່ມພັນທະມິດທາງທຸລະກິດ ແລະ ທຸລະກໍາການຈ່າຍເງິນດ້ວຍການສະແກນລະຫັດ KHQR Code ຕາມຮ້ານຄ້າປະມານ 3.3 ລ້ານແຫ່ງ.

      ທັງນີ້, ນັກທ່ອງທ່ຽວຊາວຕ່າງປະເທດຕ້ອງດາວໂຫລດ ແລະ ຕິດຕັ້ງແອັບພລິເຄຊັນ Bakong Tourists App ໃນໂທລະສັບມືຖືເມື່ອເດີນທາງເຂົ້າກໍາປູເຈຍ ແລະ ລົງທະບຽນເພື່ອສ້າງບັນຊີຜູ້ໃຊ້ດ້ວຍອີເມລ.

    ການທ່ອງທ່ຽວຖືເປັນໜຶ່ງໃນສີ່ເສົາຫລັກທີ່ສະໜັບສະໜູນເສດຖະກິດຂອງກໍາປູເຈຍ ນອກຈາກການສົ່ງອອກເສື້ອຜ້າ, ເກີບ ແລະ ສິນຄ້າເພື່ອການເດີນທາງ, ຂະແໜງກະສິກໍາ, ການກໍ່ສ້າງ ແລະ ອະສັງຫາລິມະຊັບ.

      ຂະນະທີ່ຂໍ້ມູນຈາກກະຊວງການທ່ອງທ່ຽວກໍາປູເຈຍລະບຸວ່າ: ມີການຕ້ອນຮັບນັກທ່ອງທ່ຽວຊາວຕ່າງປະເທດໃນໄລຍະ 6 ເດືອນຕົ້ນປີ 2024 ທັງໝົດ 3.16 ລ້ານຄົນ ເພີ່ມຂຶ້ນເກືອບ 23% ເມື່ອທຽບໃສ່ໄລຍະເວລາດຽວກັນຂອງປີກ່ອນ ສ່ວນຫລາຍເປັນນັກທ່ອງທ່ຽວຈາກລາວ, ຫວຽດນາມ, ຈີນ, ໄທ ແລະ ອາເມລິກາ.