ໂຄງການພະລັງງານລົມ ແລະ ໂຄງການຂະໜາດໃຫຍ່ ຂອງລັດຖະບານ ຢູ່ເມືອງດາກຈຶງ ສໍາເລັດຫລາຍກວ່າ 70%
ທ່ານ ສົມພອນ ສາຍສຸວັນ ຮອງເຈົ້າເມືອງໆດາກຈຶງ ແຂວງເຊກອງ ລາຍງານໃນກອງປະຊຸມຄົບຄະນະບໍລິຫານງານພັກເມືອງ ເປີດກວ້າງຄັ້ງທີ 11 ສະໄໝທີ XV ເມື່ອກາງເດືອນສິງຫານີ້ວ່າ: ໃນ 6 ເດືອນຕົ້ນປີນີ້, ເມືອງດາກຈຶງ ສຸມໃສ່ພັດທະນາພື້ນຖານໂຄງລ່າງຮັບໃຊ້ການຜະລິດ, ການບໍລິການ, ຍູ້ແຮງ ແລະ ລະດົມການລົງທຶນ ຈາກຫລາຍພາກສ່ວນ ພ້ອມທັງຊຸກຍູ້ໂຄງການໃຫຍ່ຂອງລັດຖະບານ, ຈັດຕັ້ງປະຕິບັດໂຄງການ ແລະ ສົ່ງເສີມການຜະລິດຂອງປະຊາຊົນກຸ້ມກິນ ແລະ ສະໜອງສະບຽງອາຫານໃຫ້ຫົວໜ່ວຍທຸລະກິດ ທີ່ລົງທຶນຢູ່ເມືອງ ເພື່ອສ້າງເງື່ອນໄຂເຮັດໃຫ້ເສດຖະກິດຂອງເມືອງ ຍັງສືບຕໍ່ຂະຫຍາຍຕົວສະເລ່ຍ ໃນລະດັບ 5.4%,
ລະດົມການລົງທຶນໄດ້ 59 ຕື້ກີບ ທຽບໃສ່ແຜນການປີ ປະຕິບັດໄດ້ 107%, ຈັດເກັບລາຍຮັບເຂົ້າງົບປະມານ 8 ຕື້ກີບ, ສົ່ງອອກສິນຄ້າມູນຄ່າ 8 ຕື້ກີບ (ແຜນ 15 ຕື້ກີບ), ນໍາເຂົ້າສິນຄ້າ 10 ຕື້ກີບ (ແຜນ 12 ຕື້ກີບ) ແລະ ສົ່ງເສີມການແລກປ່ຽນຊື້-ຂາຍສິນຄ້າຂອງປະຊາຊົນ ທີ່ຢູ່ຕາມລຽບຕາມຊາຍແດນ 910 ລ້ານກີບ ປະຕິບັດໄດ້ເກີນແຜນ (ແຜນ 253 ລ້ານກີບ), ປະຕິບັດໂຄງການພະລັງງານລົມ ແລະ ໂຄງການຂະໜາດໃຫຍ່ ຂອງລັດຖະບານ ສໍາເລັດຫລາຍກວ່າ 70% ແລະ ທະນາຄານກໍລະດົມເງິນຝາກສະສົມ 278 ຕື້ກີບ, ປ່ອຍສິນເຊື່ອແກ້ໄຂຄວາມທຸກຍາກ 6 ຕື້ກີບ ປະຕິບັດໄດ້ 153%.
ສຳລັບແຜນທິດທາງທ້າຍປີ 2024 ຄະນະພັກ-ອົງການປົກຄອງເມືອງດາກຈຶງ ໄດ້ສຸມໃສ່ການພັດທະນາພື້ນຖານໂຄງລ່າງ; ສູ້ຊົນຈັດເກັບລາຍຮັບເຂົ້າງົບປະມານທັງໝົດໃຫ້ໄດ້ 17 ຕື້ກີບ, ພູດຂອງເມືອງ 5 ຕື້ກີບ; ຄຸ້ມຄອງລາຍຈ່າຍໃຫ້ຢູ່ໃນລະດັບ 20 ຕື້ກີບ; ສົ່ງອອກສິນຄ້າຜົນຜະລິດກະສິກຳ, ເຄື່ອງປ່າຂອງດົງ ແລະ ອື່ນໆ ໃຫ້ບັນລຸ 9 ຕື້ກີບ, ຄຸ້ມຄອງການນຳເຂົ້າສິນຄ້າທີ່ຈຳເປັນ ໃຫ້ຢູ່ໃນລະດັບ 13 ຕື້ກີບ; ຊຸກຍູ້ສົ່ງເສີມປະຊາຊົນຜະລິດກະສິກໍາ (ປູກຝັງ-ລ້ຽງສັດ) ເປັນສິນຄ້າ ຕິດພັນກັບການບໍລິການຄ້າຂາຍ ເພື່ອສ້າງວຽກເຮັດງານທໍາ ແລະ ສ້າງລາຍໄດ້ ເພື່ອແນໃສ່ແກ້ໄຂຄວາມທຸກຍາກຂອງປະຊາຊົນ.
