ສະມາຄົມນັກຂ່າວນັກໜັງສືພິມແຫ່ງປະເທດໄທ ແລະ ສຳນັກຂ່າວຕົ້ນສັງກັດ ອອກໜັງສືສະແດງຄວາມບໍ່ສະບາຍໃຈຕໍ່ພຶດຕິກຳຄຸກຄາມສື່ ຮຽກຮ້ອງໃຫ້ກຽດຕໍ່ຜູ້ປະຕິບັດໜ້າທີ່ສື່
ວັນທີ 16 ສິງຫາ 2024, ສະມາຄົມນັກຂ່າວແຫ່ງປະເທດໄທ ອອກໜັງສືສະແດງຄວາມບໍ່ສະບາຍໃຈຕໍ່ພຶດຕິກຳຄຸກຄາມສື່ ຈາກກໍລະນີ ພົນເອກ ປະວິດ ວົງສຸວັນ ຫົວໜ້າພັກພະລັງປະຊາລັດ ທີ່ສະແດງພຶດຕິກຳໃຊ້ຄວາມຮຸນແຮງກັບສື່ມວນຊົນທີ່ຕັ້ງຄຳຖາມກໍລະນີ ທ່ານ ນາງ ແພທອງທານ ຊິນນະວັດ ຫົວໜ້າພັກເພື່ອໄທ ໄດ້ຮັບການລົງຄະແນນສຽງສ່ວນຫລາຍຈາກ ສສ ໃນສະພາ ເຫັນດີໃຫ້ເປັນນາຍົກລັດຖະມົນຕ ຄົນໃໝ່, ພົນເອກ ປະວິດ ໄດ້ຖາມນັກຂ່າວວ່າ: ແມ່ນຫຍັງ? ບໍ່ຮູ້. ສະມາຄົມນັກຂ່າວນັກໜັງສືພິມແຫ່ງປະເທດໄທ ເຫັນວ່າການກະທຳດັ່ງກ່າວເຂົ້າຄ່າຍຂົ່ມຂູ່ຄຸກຄາມສິດເສລີພາບໃນການເຮັດໜ້າທີ່ຂອງສື່ມວນຊົນ ຈຶ່ງຂໍໃຫ້ ພົນເອກ ປະວິດ ວົງສຸວັນ ສະແດງຄວາມຮັບຜິດຊອບຕໍ່ການກະທຳດັ່ງກ່າວ.
ຂະນະດຽວກັນ ກໍ່ເຕືອນເຖິງບຸກຄົນໃດກໍຕາມໃຫ້ລະມັດລະວັງການໃຊ້ອາລົມຮຸນແຮງກະທັນຫັນທີ່ກໍ່ໃຫ້ເກີດຜົນເສຍຕາມມາໄດ້ ແລະ ຂໍໃຫ້ຫລີກລ້ຽງພຶດຕິກຳຄຸກຄາມເຫລົ່ານີ້ ສິ່ງສຳຄັນຄວນໃຫ້ກຽດຕໍ່ຜູ້ປະຕິບັດໜ້າທີ່ຊຶ່ງກັນ ແລະ ກັນດ້ວຍ.
ສຳລັບໜັງສືຖະແຫລງການຂອງສຳນັກຂ່າວຕົ້ນສັງກັດ ລະບຸວ່າ: ອີງຕາມເຫດການ ທີ່ນັກຂ່າວຂອງສະຖານີໂທລະພາບ Thai PBS ຖືກ ພົນເອກ ປະວິດ ວົງສຸວັນ ຄຸກຄາມດ້ວຍການຕົບບໍລິເວນຫົວ ຂະນະທີ່ນັກຂ່າວກຳລັງປະຕິບັດໜ້າທີ່ຕິດຕາມການສຳພາດຢູ່ທີ່ສຳນັກງານຄະນະກຳມະການໂອລິມປິກແຫ່ງປະເທດໄທ ພາຍໃຕ້ການປົກຄອງຕໍາແໜ່ງ (ບ້ານອໍາພາວັນ) ໃນຕອນບ່າຍວັນສຸກ ວັນທີ 16 ສິງຫາ 2024 ແລະ ເປັນຄລິບວິດີໂອທີ່ຖືກເຜີຍແຜ່ຢ່າງກວ້າງຂວາງໃນສື່ຫຼັກ ແລະ ສື່ສັງຄົມອອນລາຍ, ອົງການກະຈາຍສຽງ ແລະ ເຜີຍແຜ່ພາບສາທາລະນະແຫ່ງປະເທດໄທ (ສ.ສ.ທ.) ໃນຖານະເປັນໜ່ວຍງານຕົ້ນສັງກັດ ເຫັນວ່າ ການກະທຳດັ່ງກ່າວເປັນການຄຸກຄາມຕໍ່ການປະຕິບັດໜ້າທີ່ຂອງນັກຂ່າວ.
ການຕັ້ງຄໍາຖາມດ້ວຍຖ້ອຍຄຳ ແລະ ທ່າທາງທີ່ສຸພາບໃນປະເດັນທີ່ກ່ຽວຂ້ອງກັບຜູ້ຖືກສໍາພາດ, ດັ່ງທີ່ສະແດງຢູ່ໃນຄລິບວີດີໂອທີ່ໄດ້ຖືກເຜີຍແຜ່, ສະແດງໃຫ້ເຫັນຢ່າງຊັດເຈນວ່າ ນີ້ແມ່ນຫນ້າທີ່ຂອງນັກຂ່າວດ້ວຍຄວາມຊື່ສັດສູດຈະລິດ, ແຕ່ການຖືກກະທຳທາງຮ່າງກາຍຄືແນວນີ້ ຈຶ່ງເປັນສິ່ງທີ່ບໍ່ສາມາດຍອມຮັບໄດ້ ແລະ ຖືວ່າເປັນພຶດຕິກຳທີ່ຈະສົ່ງຜົນກະທົບ ຕໍ່ຈິດໃຈ ແລະ ຄວາມຮູ້ສຶກເຖິງຄວາມປອດໄພຂອງນັກຂ່າວ-ນັກຖ່າຍຮູບ ທີ່ມີສ່ວນຮ່ວມໃນເຫດການດຽວກັນດ້ວຍ.
ສ.ສ.ທ. ມີມາດຕະການປົກປ້ອງນັກຂ່າວ ແລະຜູ້ປະຕິບັດວຽກງານທຸກຄົນ ເພື່ອເຮັດໃຫ້ສາມາດ ປະຕິ ບັດໜ້າທີ່ໄດ້ຢ່າງໝັ້ນໃຈ ຮັກສາໄວ້ເຊິ່ງກຽດສັກສີ ແລະ ມີຄວາມກ້າຫານທາງດ້ານຈະລິຍະທຳ, ການຄຸກຄາມນັກຂ່າວຄັ້ງນີ້ ຈຶ່ງເປັນເຫດການທີ່ ສ.ສ.ທ. ຂໍຮຽກຮ້ອງໃຫ້ທ່ານ ພົນເອກ ປະວິດ ວົງສຸວັນ ໄດ້ສະແດງຄວາມຮັບຜິດຊອບ ແລະ ຮຽກຮ້ອງໃຫ້ສະພາການສື່ມວນຊົນແຫ່ງຊາດ ສະມາຄົມນັກຂ່າວວິທະຍຸ ແລະ ໂທລະພາບໄທ ສະມາຄົມນັກຂ່າວນັກໜັງສືພິມແຫ່ງປະເທດໄທ ຮ່ວມສົມທົບຊອກຫາມາດຕະການທີ່ເໝາະສົມເພື່ອສືບຕໍ່ປົກປ້ອງສື່ມວນຊົນ.
