ລັດຖະມົນຕີກະຊວງປ້ອງກັນປະເທດ ແຫ່ງ ສປປ ລາວ ເຂົ້າຢ້ຽມຂ່ຳນັບ ຮອງປະທານສະພາຄວາມໝັ້ນຄົງ ຣັດເຊຍ

ວັນທີ 14 ສິງຫາ 2024, ທ່ານ ພົນເອກ ຈັນສະໝອນ ຈັນຍາລາດ ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດ ແຫ່ງ ສປປ ລາວ ພ້ອມຄະນະ ໄດ້ເຂົ້າຢ້ຽມຂ່ຳນັບ ທ່ານ ດີມີຕຣີ ເມັດເວເດັບ ຮອງປະທານສະພາຄວາມໝັ້ນຄົງ ແຫ່ງ ສ ຣັດເຊຍ. ໃນໂອກາດເດີນທາງ ເຂົ້າຮ່ວມລົງນາມສັນຍາລະຫວ່າງສອງລັດຖະບານ ແລະ ເຂົ້າຮ່ວມ ພິທີເປີດງານວາງສະແດງອຸປະກອນເຕັກນິກການທະຫານສາກົນ ປີ 2024 ທີ່ນະຄອນຫລວງມົດສະກູ ສະຫະພັນຣັດເຊຍ.

ໂອກາດນີ້, ທ່ານ ດີມີຕຣີ ເມັດເວເດັບ ຮອງປະທານສະພາຄວາມໝັ້ນຄົງ ແຫ່ງ ສ ຣັດເຊຍ ໄດ້ສະແດງຄວາມຕ້ອນຮັບອັນອົບອຸ່ນ ແລະ ຕີລາຄາຕໍ່ການເດນທາງຢ້ຽມຢາມ ແລະ ເຮັດວຽກຢູ່ ສ ຣັດເຊຍ ຂອງ ທ່ານ ພົນເອກ ຈັນສະໝອນ ຈັນຍາລາດ ໃນຄັ້ງນີ້ ເຊິ່ງເປັນການປະກອບສ່ວນເສີມສ້າງສາຍພົວພັນມິດຕະພາບ ແລະ ການຮ່ວມມືອັນເປັນມູນເຊື້ອທີ່ດີງາມມາແຕ່ດົນນານ ລະຫວ່າງສອງພັກ, ສອງລັດ, ສອງກອງທັບ ແລະ ປະຊາຊົນສອງຊາດ ສ. ຣັດເຊຍ – ສປປ ລາວ ໃຫ້ນັບມືື້ໝັ້ນຄົງທະນົງແກ່ນຍິ່ງຂຶ້ນ.

ທ່ານ ພົນເອກ ຈັນສະໝອນ ຈັນຍາລາດ ໄດ້ສະແດງຄວາມຂອບໃຈຕໍ່ ທ່ານ ດີມີຕຣີ ເມັດເວເດັບ ພ້ອມຄະນະ ທີ່ໃຫ້ກຽດຕ້ອນຮັບຢ່າງອົບອຸ່ນ ແລະ ເຕັມໄປດ້ວຍໄມຕີຈິດມິດຕະພາບ ຖານເພື່ອນມິດສະຫາຍ. ພ້ອມທັງສະແດງຄວາມຮູ້ບຸນຄຸນຢ່າງສູງມາຍັງລັດຖະບານ ກໍຄື ສະພາຄວາມໝັ້ນຄົງແຫ່ງ ສ. ຣັດເຊຍ ທີ່ໄດ້ຊ່ວຍເຫລືອໃຫ້ແກ່ ສປປ ລາວ ໃນດ້ານຕ່າງໆຕະຫລອດໄລຍະຜ່ານມາ, ຊຶ່ງການພົວພັນ ລາວ-ຣັດເຊຍ ແມ່ນໄດ້ຮັບການຂະຫຍາຍຕົວຢ່າງຕັ້ງໜ້າ ເພື່ອກ້າວໄປສູ່ການເປັນຄູ່ຮ່ວມມືຍຸດທະສາດຮອບດ້ານ ທີ່ມີຄວາມໄວ້ເນື້ອເຊື່ອໃຈ, ຮ່ວມມືຊ່ວຍເຫລືອ ເຊິ່ງກັນ ແລະ ກັນ ຢ່າງຕໍ່ເນື່ອງ, ເສີມຂະຫຍາຍມູນເຊື້ອແຫ່ງມິດຕະພາບ, ຄວາມສາມັກຄີ ເພື່ອຜົນປະໂຫຍດຂອງປະເທດຊາດ ກໍຄື ປະຊາຊົນສອງຊາດ ລາວ – ຣັດເຊຍ, ຣັດເຊຍ – ລາວ ໃຫ້ນັບມື້ແຕກດອກອອກຜົນຂຶ້ນເລື້ອຍໆ.

ຂ່າວ: ກະຊວງປ້ອງກັນປະເທດ