ນະຄອນຫລວງພະບາງ ທຳລາຍປ້າຍບໍ່ຖືກຕ້ອງ ແລະ ບໍ່ໄດ້ຮັບອະນຸຍາດ ເກືອບ 200 ປ້າຍ

ວັນທີ 1 ສິງຫາ 2024, ຫ້ອງການ ຖະແຫລງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ນະຄອນ ຫລວງພະບາງ ແຂວງຫຼວງພະບາງ ໄດ້ທຳລາຍປ້າຍທີ່ບໍ່ໄດ້ຮັບອະນຸຍາດ, ປ້າຍທີ່ບໍ່ຖືກລະບຽບຕາມຂໍ້ກຳນົດ ຂອງທ່ານເຂົ້າແຂວງໆຫລວງພະບາງ ວ່າດ້ວຍການຄຸ້ມຄອງປ້າຍ ແລະ ການປະດັບປະດາຢູ່ນະ ຄອນຫລວງພະບາງ.

ທ່ານ ຄຳຜຸຍ ສີຫານາດ ຫົວໜ້າຫ້ອງການ ຖວທ ນະຄອນຫລວງພະບາງ ລາຍງານວ່າ: ນັບແຕ່ເດືອນ ມີນາ ປີນີ້ເປັນຕົ້ນມາ ພົບເຫັນ, ເກັບກຳສັງລວມ ແລະ ຮື້ຖອນປ້າຍໂຄສະນາທີ່ບໍ່ຖືກຕ້ອງຕາມລະບຽບການໃນເສັ້ນທາງກາງເມືອງ ໄດ້ທັງໝົດ 132 ປ້າຍ, ປ້າຍ ແບນເນີ, ສະຕິກເກີທີ່ຕິດຕັ້ງຕາມເສົາໄຟຟ້າ, ຕາມຮົ້ວ, ຝາເຮືອນອີກ 65 ແຜ່ນ ແລະ ເກັບກູ້ ປ້າຍດັ່ງກ່າວ ພ້ອມທັງແນະນຳໃຫ້ຜູ້ປະກອບການທີ່ຕ້ອງການນຳໃຊ້ປ້າຍໂຄສະນາຕ່າງໆ ຕ້ອງປະກອບເອກະສານ ກວດຜ່ານເນື້ອໃນ, ຂະໜາດ, ຕົວໜັງສື ແລະ ຂຶ້ນທະບຽນໂຄສະນາໃຫ້ຖືກຕ້ອງຕາມລະບຽບການ.

ທ່ານ ວີເຮີ ເຊຍໄມ ຫົວໜ້າຄະນະໂຄສະນາອົບຮົມນະຄອນຫລວງພະບາງ, ໄດ້ເນັ້ນໃຫ້ຄະນະຮັບຜິດຊອບ ລົງເຜີຍແຜ່ບັນດາຂໍ້ມູນຕ່າງໆ ເພື່ອໃຫ້ພາກສ່ວນກ່ຽວຂ້ອງທີ່ຈະນຳໃຊ້ປ້າຍ ຕ້ອງຄຳນຶງດ້ານເນື້ອໃນ, ພາສາ, ສີພື້ນ, ສີໜັງສືຂອງປ້າຍ, ຂະໜາດປ້າຍ, ການຕິດຕັ້ງ, ການສ້ອມແປງ ແລະ ການຮື້ຖອນຢູ່ນະຄອນຫລວງພະບາງ ໃຫ້ມີຄວາມເປັນລະບຽບຮຽບຮ້ອຍຂຶ້ນ ເພື່ອສ້າງຄວາມຈົບງາມ ແລະ ມີສ່ວນຮ່ວມໃນການດຶງດູດນັ່ກທ່ອງທ່ຽວທີ່ເຂົາມາທ່ຽວຊົມນະຄອນຫລວງພະບາງມີຄວາມປະທັບໃຈຍິ່ງຂຶ້ນ.