ຄະນະນໍາ ອອປສ ແຫ່ງ ສປປ ລາວ ເຂົ້າຢ້ຽມຂໍ່ານັບ ນາຍົກລັດຖະມົນຕີ ແຫ່ງ ຣາຊະອານາຈັກກໍາປູເຈຍ

ວັນທີ 31 ກໍລະກົດ 2024 ທ່ານ ໄຊຊະນະ ໂຄດພູທອນ ກໍາມະການສູນກາງພັກ, ຫົວໜ້າອົງການໄອຍະການປະຊາຊົນສູງສຸດ (ອອປສ) ພ້ອມດ້ວຍຄະນະ ໄດ້ເຂົ້າຢ້ຽມຂໍ່ານັບ ທ່ານ ຮຸນ ມາເນັດ ນາຍົກລັດຖະມົນຕີ ແຫ່ງ ຣາຊະອານາຈັກ ກໍາປູເຈຍ ໃນໂອກາດຢ້ຽມຢາມ ແລະ ເຮັດວຽກຢູ່ຣາຊະອານາຈັກກຳປູເຈຍ.

ທ່ານ ໄຊຊະນະ ໂຄດພູທອນ ໄດ້ສະແດງຄວາມຂອບໃຈ ທີ່ທ່ານນາຍົກລັດຖະມົນຕີ ແຫ່ງຣາຊະອານາຈັກກໍາປູເຈຍ ໄດ້ໃຫ້ການຕ້ອນຮັບໃນຄັ້ງນີ້ ພ້ອມທັງໄດ້ນຳເອົາຄຳຢື້ຢາມຖາມຂ່າວຂອງທ່ານປະທານປະເທດ, ທ່ານນາຍົົກລັດຖະມົນຕີ ແຫ່ງ ສປປ ລາວ ມາຍັງ ທ່ານນາຍົກລັດຖະມົນຕີ ແຫ່ງຣາຊະອານາຈັກກໍາປູເຈຍ ພ້ອມກັນນັ້ນ, ກໍໄດ້ສະແດງຄວາມຊົມເຊີຍເປັນຢ່າງສູງທີ່ ທ່ານ ຮຸນ ມາເນັດ ໄດ້ຮັບເລືອກຕັ້ງເປັນນາຍົກລັດຖະມົນຕີ ແຫ່ງ ຣາຊະອານາຈັກກໍາປູເຈຍ ແລະ ຜົນສໍາເລັດຂອງລັດຖະບານ ແລະ ປະຊາຊົນກໍາປູເຈຍ ທີ່ຍາດມາໄດ້ ໃນການສ້າງສາພັດທະນາປະເທດຊາດຂອງຕົນ ພາຍໃຕ້ການນໍາພາຂອງທ່ານຢ່າງມີປະສິດທິຜົນ.

ພ້ອມກັນນັ້ນ, ກໍໄດ້ແຈ້ງຈຸດປະສົງ ແລະ ລາຍງານຜົນຂອງການປຶກສາຫາລື ແລະ ການແລກປ່ຽນບົດຮຽນ ລະຫວ່າງຜູ້ແທນຂັ້ນສູງຂອງອົງການໄອຍະການປະຊາຊົນສູງສຸດ ແຫ່ງ ສປປ ລາວ ແລະ ຜູ້ແທນຂັ້ນສູງຂອງອົງການໄອຍະການສູງສຸດ ແຫ່ງ ຣາຊະອານາຈັກກໍາປູເຈຍ ພ້ອມທັງການລົງນາມໃນບົດບັນທຶກຊ່ວຍຈໍາ ທີ່ໄດ້ພ້ອມກັນລົງນາມໃນຕອນເຊົ້າຂອງວັນທີ 31 ກໍລະກົດ 2024 ນີ້ ທີ່ໄດ້ລະບຸວ່າ: ຈະສືບຕໍ່ແລກປ່ຽນ ການຢ້ຽມຢາມທາງການ ຂອງຄະນະຜູ້ແທນຂັ້ນສູງ ແລະ ການແລກປ່ຽນຂັ້ນວິຊາການ; ການຮ່ວມມືວຽກງານໄອຍະການ ໂດຍສະເພາະ ກ່ຽວກັບບັນຫາສົ່ງຜູ້ຮ້າຍຂ້າມແດນ, ການຮ່ວມມືທາງອາຍາ; ການຈັດກອງປະຊຸມສໍາມະນາວິທະຍາສາດ ກ່ຽວກັບວຽກງານໄອຍະການ ແລະ ການຈັດກອງປະຊຸມຊາຍແດນຂອງສອງປະເທດ.

ໃນໂອກາດດັ່ງກ່າວ, ທ່ານ ຮຸນ ມາເນັດ ກໍໄດ້ຍ້ອງຍໍຊົມເຊີຍຜົນສຳເລັດ ແລະ ຈະໃຫ້ການສະໜັບສະໜູນການຮ່ວມມືດັ່ງກ່າວເປັນຢ່າງດີ ພ້ອມທັງອວຍພອນໃຫ້ການເຮັດວຽກ ຂອງຄະນະຜູ້ແທນ ສປປ ລາວ ຢູ່ຣາຊະອານາຈັກກຳປູເຈຍໃນຄັ້ງນີ້ ປະສົບຜົນສຳເລັດ ແລະ ເດີນທາງກັບປະເທດດ້ວຍຄວາມສະຫວັດດີພາບ.

ຂ່າວ-ພາບ: ອອປສ