ພາກລັດ ແລະ ພາກທຸລະກິດ ຫາລືມາດຕະການແກ້ໄຂບັນຫາລາຄາສິນຄ້າ ແລະ ອັດຕາແລກປ່ຽນ

ວັນທີ 2 ສິງຫາ 2024 ນີ້, ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ (ສວສສຊ), ຄະນະສະເພາະກິດ ເພື່ອລົງເລິກຄົ້ນຄວ້າບັນຫາ ລາຄາສິນຄ້າ ແລະ ອັດຕາເງິນເຟີ້ທີ່ເພີ່ມສູງຂຶ້ນ ໄດ້ຈັດກອງປະຊຸມລະດົມຄວາມຄິດເຫັນຈາກພາກທຸລະກິດ ກ່ຽວກັບບັນຫາລາຄາສິນຄ້າ ແລະ ອັດຕາແລກປ່ຽນເງິນຕາຕ່າງປະເທດ ທີ່ເພີ່ມສູງຂຶ້ນ, ມີທ່ານ ກອງແກ້ວ ໄຊສົງຄາມ ປະທານ ສວສສຊ ທັງເປັນຫົວໜ້າຄະນະສະເພາະກິດດັ່ງກ່າວ ເປັນປະທານ.

ທ່ານ ກອງແກ້ວ ໄຊສົງຄາມ ກ່າວໃນກອງປະຊຸມວ່າ: ປັດຈຸບັນ ສປປ ລາວ ພວມປະເຊີນກັບບັນຫາຂາດສະຖຽນລະພາບທາງດ້ານເສດຖະກິດມະຫາພາກ ໂດຍສະເພາະການເພີ່ມຂຶ້ນຂອງລາ ຄາສິນຄ້າ ຫລື ອັດຕາແລກປ່ຽນເງິນຕາ ທີ່ບໍ່ຄົງທີ່, ເງິນເຟີ້, ສະພາບເງິນກີບອ່ອນຄ່າ ເຮັດໃຫ້ຄ່າຄອງຊີບສູງຂຶ້ນ ສົ່ງຜົນກະທົບໂດຍກົງຕໍ່ຊີວິດການເປັນຢູ່ຂອງພະນັກງານ, ທະຫານ, ຕໍາຫລວດ ແລະ ປະຊາຊົນລາວບັນດາເຜົ່າ, ລວມທັງພາກທຸລະກິດ ແລະ ພາກລັດ ຢ່າງຫລີກລ່ຽງບໍ່ໄດ້, ສະພາບບັນຫາອັດຕາເງິນເຟີ້ ແລະ ອັດຕາແລກປ່ຽນ ຢູ່ ສປປ ລາວ ເພີ່ມຂຶ້ນຢ່າງຕໍ່ເນື່ອງ.

ໃນໄລຍະຜ່ານມາເຖິງວ່າ, ພັກ-ລັດ ແລະ ພາກສ່ວນທີ່ກ່ຽວຂ້ອງ ໄດ້ມີຄວາມພະຍາຍາມນໍາໃຊ້ຫລາຍມາດຕະການແກ້ໄຂ ແຕ່ຍັງບໍ່ສາມາດແກ້ໄຂໄດ້ຢ່າງຂາດຕົວ ສືບເນື່ອງມາຈາກຫລາຍປັດໄຈ ທີ່ເປັນສິ່ງທ້າທາຍ ແລະ ຂໍ້ຈໍາກັດ ທີ່ຕິດພັນກັບບັນຫາໂຄງສ້າງພື້ນຖານຂອງເສດຖະກິດລາວ ເຊັ່ນ: ການຜະລິດພາຍໃນ ຍັງບໍ່ເຂັ້ມແຂງ ແລະ ບໍ່ຫລາກຫລາຍເທົ່າທີ່ຄວນ, ຍັງອາໄສແຕ່ການນໍາເຂົ້າສິນຄ້າເປັນສ່ວນໃຫຍ່, ເຮັດໃຫ້ປະເທດເຮົາຂາດດຸນການຄ້າຢ່າງຕໍ່ເນື່ອງ, ສົ່ງຜົນກະທົບໂດຍກົງ ຕໍ່ຄັງສໍາຮອງເງິນຕາຕ່າງປະເທດບໍ່ພຽງພໍກັບຄວາມຕ້ອງການຊໍາລະຕ່າງປະເທດ.

ທ່ານ ກອງແກ້ວ ໄຊສົງຄາມ ກ່າວຕື່ມວ່າ: ເພື່ອຊ່ວຍລົງເລິກຄົ້ນຄວ້າຢ່າງພາວະວິໄສ ແລະ ແທດ ເໝາະກັບສະພາບຄວາມເປັນຈິງ, ກໍານົດມາດຕະການແກ້ໄຂບັນຫາອັດຕາເງິນເຟີ້ ແລະ ອັດຕາແລກ ປ່ຽນ, ລັດຖະບານໄດ້ແຕ່ງຕັ້ງຄະນະສະເພາະກິດ 83/ນຍ ກໍຄື ຄະນະສະເພາະກິດ ເພື່ອລົງເລິກຄົ້ນຄວ້າບັນຫາ ລາຄາສິນຄ້າ ແລະ ອັດຕາເງິນເຟີ້ທີ່ເພີ່ມສູງຂຶ້ນ ຊຶ່ງປະກອບມີຫລາຍພາກສ່ວນ ໂດຍມີຄະນະຮັບຜິດຊອບ ທີ່ມາຈາກ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ (ສວສສຊ), ກະຊວງແຜນການ ແລະ ການລົງທຶນ, ກະຊວງ ອຸດສາຫະກໍາ ແລະ ການຄ້າ, ກະຊວງກະສິກໍາ ແລະ ປ່າໄມ້, ທະນາຄານແຫ່ງ ສປປ ລາວ, ກະຊວງການເງິນ, ສະຖາບັນຄົ້ນຄວ້າຈາກຂະແໜງການກ່ຽວຂ້ອງ ເຂົ້າຮ່ວມການຄົ້ນຄວ້າບັນຫາດັ່ງກ່າວ, ເພື່ອກໍານົດບັນດາມາດຕະການແກ້ໄຂ ທັງໄລຍະສັ້ນ, ໄລຍະກາງ ແລະ ໄລຍະຍາວ.