ສປປ ລາວ ແລະ ສະຫະພັນທະລັດສະວິດເຊີແລນ ເຊັນສົນທິສັນຍາ ການຂົນສົ່ງທາງອາກາດຮ່ວມກັນ

ວັນທີ 26 ກໍລະກົດ 2024 ກະຊວງໂຍທາທິການ ແລະ ຂົນສົ່ງ ໄດ້ ຈັດພິທິເຊັນສົນທິສັນຍາທະວິພາຄີ ວ່າດ້ວຍການຂົນສົ່ງທາງອາກາດ ລະຫວ່າງ ສປປ ລາວ ແລະ ສະຫະພັນທະລັດສະວິດເຊີແລນ ດຳເນີນໄປໃນ ວັນທີ 26 ກໍລະກົດ 2024ນີ້, ທ່ານ ງາມປະສົງ ເມືອງມະນີ ລັດຖະມົນຕີ ກະຊວງໂຍທາທິການ ແລະ ຂົນສົ່ງ ແລະ ທ່ານ ອາເລັກຊານເດີ ຟາເຊວ (H.E. Mr. Alexandre Fasel), ຮອງລັດຖະມົນຕີ ກະຊວງການຕ່າງປະເທດ ແຫ່ງ ສະວິດເຊິແລນ ຕາງໜ້າລັດຖະບານ ສອງຝ່າຍ ລົງນາມ.

ການເຊັນສົນທິສັນຍາທະວິພາຄີ ໃນຄັ້ງນີ້ ເພື່ອປ່ຽນແທນ ສົນທິສັນຍາທີ່ ທັງ 2 ຝ່າຍ ໄດ້ຮ່ວມລົງນາມ ໃນວັນທີ 15 ທັນວາ ປີ 1999, ເປັນການເພີ່ມທະວີການຮ່ວມມືຂອງ ທັງ 2 ປະເທດດ້ານວຽກງານການບິນພົນລະເຮືອນ, ຮັບປະກັນການເຊື່ອມໂຍງເຊື່ອມຈອດ, ສົ່ງເສີມ ແລະ ອຳນວຍຄວາມສະດວກການເປີດຖ້ຽວ ບິນຂົນສົ່ງ ຜູ້ໂດຍສານ, ສິນຄ້າ ແລະ ໄປສະນີພັນ. ຄຽງຄູ່ນີ້, ຍັງເປັນການສົ່ງເສີມການຄ້າ, ການທ່ອງທ່ຽວ ແລະ ການລົງທຶນລະຫວ່າງ 2 ປະເທດ ເພື່ອສ້າງລາຍຮັບໃຫ້ແກ່ປະເທດຊາດ, ຍົກບົດບາດ ຂະແໜງການບິນພົນລະເຮືອນ ກໍຄືຕະຫລາດການບິນ ຂອງ ສປປ ລາວ ຂຶ້ນຕື່ມອີກ ໃນເວທີສາກົນ.
ໃນປີ 2024 ນີ້, ຖືເປັນນິມິດໝາຍທີ່ດີ ທີ່ ສປປ ລາວ ໄດ້ຮັບກຽດເປັນເຈົ້າພາບ ຈັດກອງປະຊຸມສຸດຍອດອາຊຽນ ແລະ ພິທີເຊັນສົນທິສັນຍາ ວ່າດ້ວຍການຂົນສົ່ງທາງອາກາດ ລະຫວ່າງ ສປປ ລາວ ແລະ ສະຫະພັນທະລັດສະວິດ ເຊີແລນ ກໍເປັນອີກໜຶ່ງວາລະທີ່ສຳຄັນທີ່ ລັດຖະບານ ແຫ່ງ ສປປ ລາວ ໄດ້ຮັບກຽດເປັນເຈົ້າພາບ, ຊຶ່ງສົນທິສັນຍາດັ່ງກ່າວ ຈະຊ່ວຍເສີມຂະຫຍາຍວຽກງານຂົນສົ່ງທາງອາກາດລາວ ອອກສູ່ສາກົນ.