ຜູ້ນໍາ ສປປ ເກົາຫລີ ລົງພື້ນທີ່ນໍ້າຖ້ວມ ເລັ່ງຫາທາງຊ່ວຍເຫລືອປະຊາຊົນ

ວັນທີ 31 ກໍລະກົດ 2024, ສໍານັກຂ່າວສູນກາງເກົາຫລີ (KCNA) ສຽງຂອງພັກແຮງງານ ສປປ ເກົຫລີ ລາຍງານສະຖານະການອຸທົກກະໄພຢູ່ເມືອງ ຊິນອີຈູ ແລະ ເມືອງອີຈູ ແຂວງ ພາຍ່ອງອັ່ນເໜືອ ຂອງ ສປປ ເກົາຫລີ ເຊິ່ງຕິດກັບເມືອງ ຕານຕົ່ງ ແຂວງຫລຽວໜິງ ທາງຕາເວັນອອກສຽງເໜືອຂອງຈີນວ່າ: ໄດ້ສ້າງຄວາມເສຍຫາຍໃຫ້ບ້ານເຮືອນຫລາຍກວ່າ 4,000 ຫລັງ ແລະ ເນື້ອທີ່ກະສິກໍາປະມານ 200 ກວ່າເຮັກຕາ (12,722 ໄລ່).

ກ່ອນໜ້ານີ້ ຄືວັນທີ 29 ກໍລະກົດ, ທ່ານ ຄິມ ຈ່ອງ ອຸ່ນ ຜູ້ນໍາສູງສຸດຂອງ ສປປ ເກົາຫລີ ໄດ້ລົງພື້ນທີ່ປະສົບໄພ ຢູ່ເມືອງ ຊິນອີຈູ, ພາຍຫລັງເດີນທາງມາແລ້ວເທື່ອໜຶ່ງ ໃນວັນທີ 28 ກໍລະກົດ. ຈາກນັ້ນ ທ່ານ ຄິມ ຈ່ອງ ອຸ່ນ ໄດ້ຮຽກປະຊຸມສຸກເສີນຄະນະກໍາມະການກາງຂອງພັກແຮງງານ ເຊິ່ງເປັນພັກລັດຖະ ບານ ເພື່ອຫາລືກ່ຽວກັບການຊ່ວຍເຫລືອປະຊາຊົນ.

ອຸທົກກະໄພທີ່ເກີດຂຶ້ນຢູ່ ສປປ ເກົາຫລີ ຄັ້ງນີ້ ເປັນຜົນມາຈາກອິດທິພົນຂອງພາຍຸ ແຄມີ ເຊິ່ງພັດຜ່ານຟີລິບປິນ, ໄຕ້ຫວັນ ແລະ ພື້ນທີ່ທາງດ້ານຕາເວັນອອກສຽງໃຕ້ຂອງຈີນ ໂດຍຢູ່ຈີນມີລາຍງານຜູ້ເສຍຊີວິດຢ່າງໜ້ອຍ 15 ຄົນ ແລະ ຢູ່ຟີລິບປິນມີຜູ້ເສຍຊີວິດຫລາຍກວ່າ 20 ຄົນ.