ວັນຊົນລະປະທານແຫ່ງຊາດ 3 ພະຈິກ ເນັ້ນເອົາໃຈໃສ່ຂະບວນອະນາໄມປົກປັກຮັກສາລະບົບສະໜອງນ້ຳໃຫ້ດີ
November 1, 2017 - 6:50 PM
ເພື່ອເປັນການສະເຫລີມສະຫລອງວັນຊົນລະປະທານແຫ່ງຊາດ 3 ພະຈິກ, ລັດຖະມົນຕີກະຊວງກະສິກຳ ແລະ ປ່າໄມ້ ໄດ້ອອກຄຳສັ່ງເນັ້ນໃຫ້ຂະແໜງການຊົນລະປະທານ ແລະ ຊາວກະສິກອນເອົາໃຈໃສ່ຂະບວນອະນາໄມປົກປັກຮັກສາຊົນລະປະທານ ເພື່ອສາມາດສະໜອງນ້ຳໃຫ້ແກ່ການຜະລິດກະສິກຳໄດ້ພຽງພໍຄື:
- ໃຫ້ຂະແໜງການເປັນເຈົ້າການສົມທົບກັບພາກສ່ວນກ່ຽວຂ້ອງອື່ນໆໂຄສະນາເຜີຍແຜ່ກົດໝາຍຊົນລະປະທານໃຫ້ສັງຄົມໄດ້ກວ້າງຂວາງເລິກເຊິ່ງ ແລະ ຈັດຕັ້ງປະຕິບັດໃຫ້ເປັນຮູບປະທຳ ບົນຈິດໃຈທິດນຳທີ່ວ່າ: “ພັກນຳພາ, ລັດຄຸ້ມຄອງ ແລະ ປະຊາຊົນເປັນເຈົ້າ”.
- ໃຫ້ພາກສ່ວນກ່ຽວຂ້ອງເພີ່ມທະວີການປະສານງານບູລະນະປົວແປງຊົນລະປະທານທີ່ໄດ້ຮັບຜົນກະທົບຈາກໄພທຳມະຊາດໃນຜ່ານມາໃຫ້ສາມາດສະໜອງນ້ຳແກ່ເນື້ອທີ່ການຜະລິດໄດ້ພຽງພໍ.
- ເອົາໃຈໃສ່ເລັ່ງທວງໃຫ້ບໍລິສັດຜູ້ຮັບເໝົາກໍ່ສ້າງ-ປົວແປງຊົນລະປະທານທີ່ໄດ້ລົງນາມຮ່ວມກັນໄປແລ້ວນັ້ນເອົາໃຈໃສ່ປະຕິບັດໜ້າວຽກໃຫ້ສຳເລັດຕາມແຜນ. ຖ້າຜູ້ໃດບໍ່ປະຕິບັດແມ່ນໃຫ້ດຳເນີນຄະດີຕາມລະບຽບກົດໝາຍຢ່າງເຂັ້ມງວດ.
- ໃຫ້ຖືເອົາວັນຊົນລະປະທານແຫ່ງຊາດທີ 3 ພະຈິກ ເປັນການເຜີຍແຜ່ຜົນສຳເລັດຕ່າງໆກ່ຽວກັບການພັດທະນາວຽກງານຊົນລະປະທານໃນຜ່ານມາ ແລະ ຮຽກຮ້ອງໃຫ້ປະຊາຊົນ ກໍຄືຊາວກະສິກອນຫັນມາມີສ່ວນຮ່ວມໃຫ້ຫລາຍຂຶ້ນ ບົນຈິດໃຈ “ລັດ ແລະ ປະຊາຊົນພ້ອມກັນເຮັດ”.
- ມອບໃຫ້ກົມຊົນລະປະທານອອກຄຳແນະນຳດ້ານວິຊາການ ເພື່ອຈັດຕັ້ງປະຕິບັດຄຳສັ່ງສະບັບນີ້ປາກົດຜົນເປັນຈິງ. ຖ້າມີຂໍ້ສະດວກ ແລະ ຫຍຸ້ງຍາກແນວໃດກໍໃຫ້ລາຍງານການນຳກະຊວງກະສິກຳ-ປ່າໄມ້ເປັນປົກກະຕິ ເພື່ອການປັບປຸງແກ້ໄຂໃຫ້ທັນເວລາ.
