ກະຊວງ ປກສ  ກຽມຄວາມພ້ອມເປັນເຈົ້າພາບກອງປະຊຸມລັດຖະມົນຕີອາຊຽນ ວ່າດ້ວຍການຕ້ານອາຊະຍາກຳຂ້າມຊາດຄັ້ງທີ 18 ແລະ ກອງປະຊຸມອື່ນໆທີ່ກ່ຽວຂ້ອງ

ວັນທີ 30 ກໍລະກົດ 2024 ກະຊວງປ້ອງກັນຄວາມສະຫງົບ ໄດ້ຈັດກອງປະຊຸມສະຫຼຸບລາຍງານຄວາມຄືບໜ້າໃນການກະກຽມຄວາມພ້ອມເປັນເຈົ້າພາບກອງປະຊຸມລັດຖະມົນຕີອາຊຽນ ວ່າດ້ວຍການຕ້ານອາຊະຍາກຳຂ້າມຊາດຄັ້ງທີ 18 ແລະ ກອງປະຊຸມອື່ນໆທີ່ກ່ຽວຂ້ອງ ໂດຍການເປັນປະທານຂອງ ພົຕ ສົມວັນ ສາຍລ້ອງພາ ຮອງລັດຖະມົນຕີ ກະຊວງປ້ອງກັນຄວາມສະຫງົບ.

ໃນກອງປະຊຸມ ໄດ້ສະຫຼຸບຖອດຖອນບົດຮຽນການເປັນເຈົ້າພາບ ແລະ ປະທານກອງປະຊຸມເຈົ້າໜ້າທີ່ອາວຸໂສອາຊຽນ ວ່າດ້ວຍການຕ້ານອາຊະຍາກຳຂ້າມຊາດ ຄັ້ງທີ 24 ແລະ ກອງປະຊຸມອື່ນໆທີ່ກ່ຽວຂ້ອງ ທີ່ໄດ້ຈັດຂຶ້ນໄລຍະຜ່ານມາ; ຜ່ານແຜນການ ແລະ ຂໍ້ຕົກລົງແຕ່ງຕັ້ງຄະນະຮັບຜິດຊອບຈັດກອງປະຊຸມລັດຖະມົນຕີອາຊຽນ ວ່າດ້ວຍການຕ້ານອາຊະຍາກຳຂ້າມຊາດ ຄັ້ງທີ 18 ແລະ ກອງປະຊຸມອື່ນໆທີ່ກ່ຽວຂ້ອງ ພ້ອມທັງລາຍງານຄວາມຄືບໜ້າໃນການກະກຽມເປັນເຈົ້າພາບ ແລະ ປະທານກອງປະຊຸມລັດຖະມົນຕີອາຊຽນ ວ່າດ້ວຍການຕ້ານອາຊະຍາກຳຂ້າມຊາດ ຄັ້ງທີ 18 ແລະ ກອງປະຊຸມອື່ນໆທີ່ກ່ຽວຂ້ອງ, ເຊີ່ງຈະໄດ້ຈັດຂຶ້ນໃນລະຫວ່າງວັນທີ 26-30 ສິງຫາ 2024.

ໃນກອງປະຊຸມ ພົຕ ສົມວັນ ສາຍລ້ອງພາ ໄດ້ມີຄໍາເຫັນ ແລະ ໃຫ້ທິດຊີ້ນໍາຕໍ່ບັນດາອະນຸກໍາມະການດ້ານຕ່າງໆໃຫ້ຖອດຖອນບົດຮຽນການຈັດກອງປະຊຸມເຈົ້າໜ້າທີອາວຸໂສທີ່ຜ່ານມາ ດ້ານດີ, ດ້ານອ່ອນຂໍ້ຄົງຄ້າງ ບົດຮຽນທີ່ຖອດຖອນໄດ້, ປຶກສາຫາລືຄວາມຄືບໜ້າ ແລະ ບັນດາໜ້າວຽກທີ່ຕ້ອງສຸມໃສ່ ເພື່ອກະກຽມຄວາມພ້ອມໃຫ້ແກ່ການເປັນເຈົ້າພາບ ແລະ ປະທານກອງປະຊຸມລັດຖະມົນຕີອາຊຽນ ວ່າດ້ວຍການຕ້ານອາຊະຍາກໍາຂ້າມຊາດ ຄັ້ງທີ 18 ແລະ ກອງປະຊຸມອື່ນໆທີ່ກ່ຽວຂ້ອງ ຮັບປະກັນໃຫ້ກອງປະຊຸມດໍາເນີນໄປຢ່າງໂລ່ງລຽນ ແລະ ສອດຄ່ອງກັບລະບຽບການອາຊຽນ; ພ້ອມທັງຮັບປະກັນໄດ້ຄວາມສະຫງົບປອດໄພ ແລະ ຄວາມເປັນລະບຽບຮຽບຮ້ອຍໃນສັງຄົມ.