ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ພົບປະ ເຈົ້າໜ້າທີ່ລະດັບສູງ ຮັບຜິດຊອບວຽກງານການຕ່າງປະເທດ ແລະ ຄວາມໝັ້ນຄົງ ສະຫະພາບເອີຣົບ

ໃນຕອນເຊົ້າ ຂອງ ວັນທີ 27 ກໍລະກົດ 2024, ທີ່ຫໍປະຊຸມແຫ່ງຊາດ (NCC), ທ່ານ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ພົບປະສອງຝ່າຍ ກັບ ທ່ານ ໂຈເຊັບ ບໍເຣວ, ຜູ້ຕາງໜ້າສູງສຸດດ້ານວຽກງານການຕ່າງປະເທດ ແລະ ຄວາມໝັ້ນຄົງສະຫະພາບເອີຣົບ, ຮອງປະທານຄະນະກຳມາທິການເອີຣົບ (High Representative of the European Union for Foreign Affairs and Security Policy, Vice-President of the European Commission) ພ້ອມດ້ວຍຄະນະ, ໃນໂອກາດ ເຂົ້າຮ່ວມກອງປະຊຸມລັດຖະມົນຕີຕ່າງປະເທດອາຊຽນ ຄັ້ງທີ 57, ທີ່ນະຄອນຫຼວງວຽງຈັນ.

ໃນໂອກາດດັ່ງກ່າວ, ສອງຝ່າຍ ໄດ້ຕີລາຄາສູງຕໍ່ການພົວພັນ ແລະ ການຮ່ວມມື ລະຫວ່າງ ລາວ ແລະ ອີຢູ ຕະຫຼອດໄລຍະ 49 ປີຜ່ານມາ ດ້ວຍບັນຍາກາດອັນດີ, ຊຶ່ງອີຢູ ໄດ້ສະໜັບສະໜູນການພັດທະນາ ຢູ່ ສປປ ລາວ ຢ່າງຕໍ່ເນື່ອງ ໂດຍສະເພາະ ການປະກອບສ່ວນເຂົ້າໃນ ດ້ານການພັດທະນາເສດຖະກິດ-ສັງຄົມ, ການບັນລຸເປົ້າໝາຍການພັດທະນາແບບຍືນຍົງ (SDG), ການຫຼຸດພົ້ນອອກຈາກສະຖານະພາບປະເທດດ້ອຍພັດທະນາ ພາຍໃນປີ 2026 ແລະ ອື່ນໆ. ທ່ານ ຮອງນາຍົກລັດຖະມົນຕີ ຍັງໄດ້ສະແດງຄວາມຂອບໃຈຢ່າງຈິງໃຈ ຕໍ່ການຊ່ວຍເຫຼືອ ຂອງ ອີຢູ ໃນໄລຍະຜ່ານມາ ກໍ່ຄືປະຈຸບັນ, ຊຶ່ງອັນພົ້ນເດັ່ນ ແມ່ນ ການສືບຕໍ່ຈັດຕັ້ງປະຕິບັດໂຄງການ ພາຍໃຕ້ທີມງານເອີຣົບ (Team Europe) ໃນຂະແໜງການສຶກສາ, ໂພຊະນາການ, ການປົກຄອງທີ່ດີ ແລະ ອື່ນໆ. ຝ່າຍອີຢູ ກໍໄດ້ສະແດງຄວາມໝາຍໝັ້ນວ່າ ຈະສືບຕໍ່ໃຫ້ການສະໜັບສະໜູນ ແລະ ຊ່ວຍເຫຼືອແກ່ ສປປ ລາວ ໃນຕໍ່ໜ້າ ໂດຍສະເພາະ ທາງດ້ານການພັດທະນາແບບຍືນຍົງ. ນອກຈາກນັ້ນ, ສອງຝ່າຍ ຍັງໄດ້ແລກປ່ຽນຄວາມຄິດເຫັນ ກ່ຽວກັບ ການພັດທະນາ ໃນປະເທດ ຊຶ່ງກັນ ແລະ ກັນ, ປຶກສາຫາລື ແລະ ແລກປ່ຽນທັດສະນະ ຕໍ່ສະພາບການພາກພື້ນ ແລະ ສາກົນ ທີ່ ສອງຝ່າຍມີຄວາມສົນໃຈຮ່ວມກັນ.

ການເດີນທາງມາ ສປປ ລາວ ໃນຄັ້ງນີ້ ຖືເປັນຄັ້ງທຳອິດ ຂອງ ທ່ານ ໂຈເຊັບ ບໍເຣວ, ຊຶ່ງເປັນຂີດໝາຍອັນສຳຄັນ ໃນການສືບຕໍ່ຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືທີ່ມີມາຍາວນານ ລະຫວ່າງ ສປປ ລາວ ແລະ ອີຢູ ທີ່ກຳລັງສືບຕໍ່ຂະຫຍາຍຕົວຢ່າງຕໍ່ເນື່ອງ.