ອັດຕາເງິນເຟີ້ ເດືອນກໍລະກົດ ຢູ່ໃນລະດັບ 26,1% ໝວດສິນຄ້າທີ່ມີອັດຕາເງິນເຟີ້ເພີ່ມຂຶ້ນສູງແມ່ນໝວດຮັກສາສຸຂະພາບ ແລະ ຢາ
ສູນສະຖິຕິແຫ່ງຊາດ ລາຍງານວ່າ: ອັດຕາເງິນເຟີ້ ເດືອນກໍລະກົດ 2024 ຍັງສືບຕໍ່ເໜັງຕີງເພີ່ມຂຶ້ນຈາກເດືອນຜ່ານມາ ຢູ່ໃນລະດັບ 26,1% (ເດືອນມິຖຸນາ 2024 ຢູ່ໃນລະດັບ 26,2%), ໃນນັ້ນ, ໝວດສິນຄ້າທີ່ມີອັດຕາເງິນເຟີ້ເພີ່ມຂຶ້ນສູງແມ່ນ ໝວດຮັກສາສຸຂະພາບ ແລະ ຢາ ເພີ່ມຂຶ້ນເກືອບ 40%, ໝວດຮ້ານອາຫານ ແລະ ໂຮງແຮມ ຫຼາຍກວ່າ 34%, ໝວດທີ່ພັກ ອາໄສ, ນໍ້າປະປາ,ໄຟຟ້າ ແລະ ເຊື້ອເພີງຫຸງຕົ້ມ ເພີ່ມຂຶ້ນຫຼາຍກວ່າ 34%, ໝວດເຄື່ອງໃຊ້ໃນເຮືອນ ເພີ່ມຂຶ້ນ 30,1%, ໝວດເຫລົ້າ ແລະ ຢາສູບ ເພີ່ມຂຶ້ນຫຼາຍກວ່າ 29%, ສໍາລັບໝວດສະບຽງອາຫານ ແລະ ເຄື່ອງດື່ມບໍ່ມີທາດເຫລົ້າ ກໍ່ເພພີ່ມຂຶ້ນເພີ່ມຂຶ້ນຫຼາຍກວ່າ 23%.
ການປ່ຽນແປງຂອງລາຄາເດືອນ ກໍລະກົດ 2024 ທຽບໃສ່ ເດືອນ ມິຖຸນາ ຜ່ານມາ ເຫັນວ່າອັດຕາເງິນເຟີ້ ຍັງມີທ່າອ່ຽງເໜັງຕີງເພີ່ມຂຶ້ນຢູ່ໃນລະດັບ 2,2% (ເດືອນມິຖຸນາ ເພີ່ມຂຶ້ນ 2,3%). ໃນນັ້ນ, ໝວດສິນຄ້າທີ່ມີ ການປ່ຽນແປງຫລາຍແມ່ນໝວດຄົມມະນາຄົມ ແລະ ການຂົນສົ່ງ ເພີ່ມຂຶ້ນເກືອບ4%, ພົ້ນເດັ່ນແມ່ນລາຄາ ລົດໃຫຍ່, ນໍ້າມັນເຊື້ອໄຟ ແລະ ລົດຈັກ; ໝວດຮັກສາສຸຂະພາບ ແລະ ຢາ ເພີ່ມຂຶ້ນ 3,6% ພົ້ນເດັ່ນ ແມ່ນ ລາຄາ ຢາແກ້ໄຂ້ເດັກນ້ອຍ, ຢາປາຣາ ແລະ ຢາແກ້ໄອເດັກນ້ອຍ; ໝວດເຄື່ອງໃຊ້ໃນເຮືອນ ເພີ່ມຂຶ້ນ 3,4% ພົ້ນເດັ່ນແມ່ນ ແອເຢັນ, ແຟັບ, ພັດລົມ ແລະ ຕູ້ເຢັນ; ໝວດຮ້ານອາຫານ ແລະ ໂຮງແຮມ ເພີ່ມຂຶ້ນ 3,2% ພົ້ນເດັ່ນແມ່ນລາຄາ ປີ້ງໄກ່, ເຝີ ແລະ ເຂົ້າຂົ້ວ.
