ສະມາຊິກ G20 ເຫັນພ້ອມ ເກັບພາສີນໍາມະຫາເສດຖີ ເລັ່ງແກ້ໄຂບັນຫາຄວາມບໍ່ເທົ່າທຽມ
ປະເທດສະມາຊິກ G20 ເຫັນພ້ອມດໍາເນີນການຮ່ວມກັນໃນການເກັບພາສີມະຫາເສດຖີ ເພື່ອແກ້ໄຂບັນຫາຄວາມບໍ່ເທົ່າທຽມ ແລະ ສົ່ງເສີມການເຕີບໃຫຍ່ຂອງເສດຖະກິດ.
ວັນທີ 27 ກໍລະກົດ, ສໍານັກຂ່າວຕ່າງປະເທດລາຍງານວ່າ: ການແກ້ໄຂມະຫາເສດຖີຫລີກລ່ຽງພາສີ ຄືໜຶ່ງໃນຫົວຂໍ້ສໍາຄັນຂອງກອງປະຊຸມລັດຖະມົນຕີການເງິນກຸ່ມປະເທດເສດຖະກິດຂະໜາດໃຫຍ່ ຫລື G20 ຢູ່ເມືອງຣີໂອເດຈາເນໂຣ ຄວາມຄິດລິເລີ່ມດັ່ງກ່າວຖືເປັນເປົ້າໝາຍສໍາຄັນຂອງປະທານາທິບໍດີ ລູອິດ ອິນາຊິໂອ ລູລາ ດາ ຊິວວາ ຜູ້ນໍາເບຣຊິນ ລວມເຖິງເປົ້າໝາຍດ້ານເສດຖະກິດສໍາຄັນຂອງໂລກ, ສະຫະພາບເອີຣົບ (EU) ແລະ ສະຫະພາບອາຟຣິກາ (AU).
ທ່ານ ລູລາ ຫວັງວ່າ: ຈະມີການເກັບພາສີຂັ້ນຕໍ່າສໍາລັບກຸ່ມຄົນຮັ່ງມີ ເຖິງວ່າຄໍາຖະແຫລງສຸດທ້າຍຈະຖືເປັນການປານີປານອມບັນຫາທີ່ອ່ອນໄຫວໃນບັນດາປະເທດສະມາຊິກ “ດ້ວຍຄວາມເຄົາລົບຢ່າງເຕັມທີ່ຕໍ່ອໍານາດອະທິປະໄຕດ້ານພາສີ, ພວກເຮົາຈະພະຍາຍາມຮ່ວມມືກັນ ເພື່ອໃຫ້ແນ່ໃຈວ່າບຸກຄົນທີ່ມີລາຍໄດ້ສຸດທິສູງຈະຖືກເກັບພາສີຢ່າງມີປະສິດທິພາບ” ຖະແຫລງການລະບຸ. “ຄວາມຮັ່ງມີ ແລະ ຄວາມບໍ່ເທົ່າທຽມກັນຂອງລາຍໄດ້ ກໍາລັງທໍາລາຍການເຕີບໃຫຍ່ທາງເສດຖະກິດ ແລະ ຄວາມສາມັກຄີທາງສັງຄົມ ແລະ ສົ່ງຜົນເຮັດໃຫ້ຄວາມບອບບາງໃນສັງຄົມທະວີຄວາມຮຸນແຮງຂຶ້ນ”.
ທ່ານ ເຟີນັນໂດ ຮັດດາດ ລັດຖະມົນຕີການເງິນເບຣຊິນ ກ່າວວ່າ: “ຈາກມຸມມອງທາງສິນລະທໍາແລ້ວ ສິ່ງສໍາຄັນຄືປະເທດຮັ່ງມີທີ່ສຸດ 20 ແຫ່ງ ຄວນພິຈາລະນາວ່າພວກເຮົາມີບັນຫາ ເຊິ່ງກໍຄືການເກັບພາສີແບບກ້າວໜ້າຈາກຄົນທຸກ ບໍ່ແມ່ນຈາກຄົນລວຍ”. ຂະນະທີ່ອາເມລິກາ ແລະ ເຢຍລະມັນປະຕິບັດຄວາມຈໍາເປັນໃນການມີຂໍ້ຕົກລົງກ່ຽວກັບການເກັບພາສີມະຫາເສດຖີ ເຊິ່ງເປັນຄວາມຄິດລິເລີ່ມທີ່ໄດ້ຮັບການສະໜັບສະໜູນຈາກຝຣັ່ງ, ແອັສປາຍ, ອາຟຣິກາໃຕ້, ໂກລົມບີ ແລະ ສະຫະພາບອາຟຣິກາ.
ທາງການເບຣຊິນເຜີຍແຜ່ເອກະສານ 3 ສະບັບ ໄດ້ແກ່ ຖະແຫລງການຮ່ວມສະບັບສຸດທ້າຍ, ເອກະສານກ່ຽວກັບການຮ່ວມມືລະຫວ່າງປະເທດໃນບັນຫາພາສີ ແລະ ຖະແຫລງການແຍກຈາກເບຣຊິນກ່ຽວກັບວິກິດພູມສາດໂລກ. ເຖິງຢ່າງໃດກໍຕາມ, ຖະແຫລງການສະບັບສຸດທ້າຍບໍ່ໄດ້ກ່າວເຖິງສົງຄາມຢູ່ອູແກຣນ ແລະ ເຂດກາຊາ, ແຕ່ພຽງອ້າງເຖິງສົງຄາມ ແລະ ຄວາມຂັດແຍ່ງທີ່ທະວີຄວາມຮຸນແຮງຂຶ້ນ ເຊິ່ງເປັນປັດໄຈສ່ຽງຕໍ່ເສດຖະກິດໂລກ.
