ຄາດວ່າເຫດການຫລອນໂຈມຕີເຄືອຂ່າຍລົດໄຟຢູ່ຝຣັ່ງເຊື່ອມໂຍງອົງການອາດຊະຍາກໍາ

     ທາງການຝຣັ່ງເລັ່ງດໍາເນີນການສືບສວນກໍລະນີເກີດເຫດການຫລອນໂຈມຕີເຄືອຂ່າຍລົດໄຟຄວາມໄວສູງທີ່ເກີດຂຶ້ນພຽງບໍ່ເທົ່າໃດຊົ່ວໂມງກ່ອນຈະມີພິທີເປີດການແຂ່ງຂັນກິລາໂອລິມປິກເກມ ປາຣີສ 2024 ໃນວັນທີ 26 ກໍລະກົດ ເຊິ່ງສົ່ງຜົນເຮັດໃຫ້ຂະບວນລົດໄຟຫລາຍເສັ້ນຕ້ອງຍົກເລີກ ຫລື ເລື່ອນໃຫ້ບໍລິການ ແລະ ກະທົບປະຊາຊົນ 2.5 ແສນກວ່າຄົນ.

      ເບື້ອງຕົ້ນບໍລິສັດ SNCF ຜູ້ໃຫ້ບໍລິການເຄືອຂ່າຍລົດໄຟຝຣັ່ງເປີດເຜີຍວ່າ: ຜູ້ກໍ່ເຫດໄດ້ທໍາລາຍ ຫລື ພະຍາຍາມທໍາລາຍກ່ອງສັນຍານ ແລະ ລະບົບໄຟຟ້າຕາມເສັ້ນທາງລົດໄຟໃນ 5 ສະຖານທີ່ຂອງນະຄອນຫລວງປາຣີສ ໂດຍລົງມືໃນໄລຍະເວລາ 01:00-05:30 ໂມງ ຂອງວັນທີ 26 ກໍລະກົດ ເຊິ່ງບໍ່ມີການປ້ອງກັນ ສົ່ງຜົນເຮັດໃຫ້ການຈະລາຈອນຂອງຂະບວນລົດໄຟໃນເສັ້ນທາງທີ່ໄດ້ຮັບຜົນກະທົບຕ້ອງຢຸດສະງັກ ແລະ ຄາດວ່າຈະບໍ່ສາມາດນໍາໃຊ້ໄດ້ຮອດທ້າຍອາທິດນີ້ ເຊິ່ງທາງບໍລິສັດກໍາລັງເລັ່ງດໍາເນີນການສ້ອມແປງ.

     ຂະນະທີ່ທາງການຝຣັ່ງລະບຸວ່າ: ການກໍ່ເຫດດັ່ງກ່າວອາດກ່ຽວຂ້ອງກັບອົງການອາດຊະຍາກໍາ ໂດຍນາຍົກລັດຖະມົນຕີ ແກເບຣີ ອັດທາວ ກ່າວວ່າ: ເຫດການຫລອນໂຈມຕີດັ່ງກ່າວມີການວາງແຜນ, ການປະສານງານ ແລະ ກໍານົດເປົ້າໝາຍໃນຈຸດສໍາຄັນຕ່າງໆໄວ້ແລ້ວ ເຊິ່ງແນ່ນອນວ່າຜູ້ກໍ່ເຫດມີຄວາມຮູ້ກ່ຽວກັບເຄືອຂ່າຍລົດໄຟເປັນຢ່າງດີ ແລະ ຮູ້ວ່າຕ້ອງລົງມືຈຸດໃດ.

     ສໍານັກຂ່າວ France 24 ຂອງຝຣັ່ງ ເປີດເຜີຍຂໍ້ມູນຈາກແຫລ່ງຂ່າວດ້ານຄວາມໝັ້ນຄົງ ເຊິ່ງເບິ່ງວ່າວິທີການກໍ່ເຫດທີ່ເກີດຂຶ້ນເຮັດໃຫ້ທາງການເລີ່ມສົງໄສວ່າອາດເປັນຝີມືຂອງກຸ່ມຫົວຮຸນແຮງຝ່າຍຊ້າຍ ຫລື ກຸ່ມເຄື່ອນໄຫວດ້ານສິ່ງແວດລ້ອມ. ຂະນະທີ່ກໍາລັງສືບສວນວ່າເຫດການທີ່ເກີດຂຶ້ນມີການເຊື່ອມໂຍງກັບການແຂ່ງຂັນກິລາໂອລິມປິກເກມ ຫລື ບໍ່.

ອ້າງອີງ:

• https://www.france24.com/en/europe/20240726-france-s-high-speed-train-network-paralysed-by-malicious-acts
• https://www.bbc.com/news/articles/c28eyr3y18yo
• https://www3.nhk.or.jp/nhkworld/en/news/20240727_N01/