ຄັ້ງທໍາອິດຂອງໂລກ ! ສາຍການບິນເກີດແນວຄິດ ໃຫ້ຜູ້ຍິງເລືອກບ່ອນນັ່ງຫ່າງຈາກຜູ້ຊາຍໄດ້

      ສາຍການບິນຂອງອິນເດຍເປີດບໍລິການໃໝ່ໃຫ້ຜູ້ໂດຍສານຍິງເລືອກໄດ້ວ່າຕ້ອງການບ່ອນນັ່ງຕິດກັບຜູ້ໂດຍສານທີ່ເປັນຄົນແປກໜ້າ ຫລື ບໍ່ ເພື່ອຄວາມສະບາຍໃຈຂອງລູກຄ້າເພດຍິງທີ່ຕ້ອງເດີນທາງຕາມລໍາພັງ.

     ສາຍການບິນອິນດິໂກແຫ່ງອິນເດຍເປີດໃຫ້ບໍລິການໃໝ່ ເຊິ່ງຖືວ່າເປັນຄັ້ງທໍາອິດຂອງວົງການອຸດສາຫະກໍາການບິນການຄ້າ ແລະ ຂອງໂລກ ດ້ວຍການເປີດໃຫ້ຜູ້ໂດຍສານຜູ້ຍິງສາມາດເລືອກບ່ອນນັ່ງໄດ້ວ່າຕ້ອງການນັ່ງຕິດກັບຜູ້ໂດຍສານຜູ້ຍິງ ຫລື ຜູ້ຊາຍ.

     ເວລາທີ່ຜູ້ໂດຍສານຜູ້ຍິງຈອງບ່ອນນັ່ງຜ່ານຊ່ອງທາງອອນລາຍ ຈະມີຕົວເລືອກແຜນຜັງບ່ອນນັ່ງທີ່ລະບຸວ່າມີຜູ້ໂດຍສານຜູ້ຍິງຄົນອື່ນໆນັ່ງຢູ່ບ່ອນນັ່ງໝາຍເລກໃດແດ່ ເຊິ່ງຈະສະແດງສັນຍາລັກເປັນບ່ອນນັ່ງສີບົວຢູ່ແຜນຜັງ ເພື່ອອໍານວຍຄວາມສະດວກໃນການເລືອກບ່ອນນັ່ງຂອງຜູ້ໂດຍສານຜູ້ຍິງທີ່ບໍ່ຕ້ອງການນັ່ງຕິດກັບຜູ້ໂດຍສານຜູ້ຊາຍທີ່ບໍ່ຮູ້ຈັກກັນ.

      ສໍາລັບຜູ້ໂດຍສານຜູ້ຊາຍຈະບໍ່ໄດ້ຮັບສິດພິເສດນີ້ ໂດຍເວລາຈອງບ່ອນນັ່ງຈະເຫັນພຽງບ່ອນນັ່ງທີ່ຍັງວ່າງຢູ່ໃນແຜນຜັງເທົ່ານັ້ນ.

     ນະໂຍບາຍໃໝ່ນີ້ເກີດຂຶ້ນເພື່ອຕ້ອງການສ້າງຄວາມສະບາຍໃຈຕໍ່ຜູ້ໂດຍສານເພດຍິງ ໂດຍສະເພາະຜູ້ທີ່ຕ້ອງເດີນທາງຕາມລໍາພັງ.

     ຕົວແທນຂອງບໍລິສັດສາຍການບິນອິນດິໂກຖະແຫລງວ່າ: ບໍລິການໃໝ່ນີ້ມີເປົ້າໝາຍຈະເຮັດໃຫ້ຜູ້ໂດຍສານເພດຍິງໄດ້ຮັບຄວາມສະບາຍໃຈຍິ່ງຂຶ້ນເມື່ອຕ້ອງເດີນທາງ ໂດຍປັດຈຸບັນຍັງຢູ່ໃນໄລຍະທົດລອງນໍາໃຊ້. ບໍລິການດັ່ງກ່າວໄດ້ຮັບການອອກແບບມາເພື່ອເອົາໃຈຜູ້ໂດຍສານຜູ້ຍິງໂດຍສະເພາະ ເຊັ່ນດຽວກັບບໍລິການຈອງບ່ອນນັ່ງສໍາລັບຄອບຄົວ.

     ເຖິງຢ່າງໃດກໍຕາມ, ບໍລິການໃໝ່ນີ້ຖືກວິພາກວິຈານທັງໃນທາງລົບ ແລະ ທາງບວກ ໂດຍຜູ້ທີ່ບໍ່ເຫັນພ້ອມເບິ່ງວ່າເປັນການກີດກັນທາງເພດ ແລະ ເລືອກປະຕິບັດ, ແຕ່ວ່າບໍລິການໃໝ່ນີ້ພັດເປັນທາງອອກທີ່ດີສໍາລັບຜູ້ໂດຍສານທີ່ຕ້ອງປະສົບບັນຫາຈາກຂໍ້ຫ້າມທາງສາສະໜາທີ່ມີຫລັກປະຕິບັດເຂັ້ມງວດກ່ຽວກັບຄວາມໃກ້ຊິດກັນລະຫວ່າງເພດກົງກັນຂ້າມ.

     ຄາດວ່າບໍລິການໃໝ່ນີ້ຈະເປີດນໍາໃຊ້ຢ່າງເປັນທາງການໃນເດືອນສິງຫານີ້ໃນທຸກຖ້ຽວບິນຂອງອິນດິໂກ, ຜູ້ໂດຍສານຜູ້ຍິງສາມາດໃຊ້ສິດເລືອກບ່ອນນັ່ງຈາກແຜນຜັງແບບໃໝ່ນີ້ເມື່ອເຂົ້າມາເຊັກອິນກ່ອນຂຶ້ນເຮືອບິນ.

     ອິນດິໂກເປັນບໍລິສັດສາຍການບິນຕົ້ນທຶນຕໍ່າລາຍໃຫຍ່ທີ່ສຸດຂອງອິນເດຍ ໃຫ້ບໍລິການຖ້ຽວບິນທັງພາຍໃນ ແລະ ຕ່າງປະເທດປະມານ 2,000 ຖ້ຽວບິນຕໍ່ວັນ ແລະ ຈະມີອາຍຸຄົບ 18 ປີໃນເດືອນສິງຫານີ້.