ພາຍຸແຄມີອ່ອນກໍາລັງລົງພາຍຫລັງຖະຫລົ່ມໄຕ້ຫວັນ ມຸ່ງໜ້າສູ່ຈີນເປັນຈຸດໝາຍຕໍ່ໄປ

     ພາຍຸແຄມີພັດຜ່ານໄຕ້ຫວັນ ສົ່ງຜົນເຮັດໃຫ້ມີຜູ້ເສຍຊີວິດຢ່າງໜ້ອຍ 2 ຄົນ ແລະ ອ່ອນກໍາລັງລົງ ກ່ອນເຄື່ອນທີ່ຕໍ່ໄປປະເທດຈີນ.

     ວັນທີ 25 ກໍລະກົດ, ສໍານັກຂ່າວຕ່າງປະເທດລາຍງານວ່າ: ກົມອຸຕຸນິຍົມວິທະຍາໄຕ້ຫວັນລາຍງານວ່າ: ພາຍຸແຄມີອ່ອນກໍາລັງລົງຢ່າງຕໍ່ເນື່ອງ ພາຍຫລັງພັດຂຶ້ນຝັ່ງທາງຕາເວັນອອກສຽງເໜືອຂອງໄຕ້ຫວັນໃນຄືນວັນທີ 24 ກໍລະກົດຜ່ານມາ ໂດຍຄວາມໄວລົມໃກ້ສູນກາງຢູ່ທີ່ 154 ກິໂລແມັດຕໍ່ຊົ່ວໂມງ ໃນຕອນຂອນແຈ້ງຂອງວັນທີ 25 ກໍລະກົດ ຕາມເວລາທ້ອງຖິ່ນ ແລະ ພາຍຸມີທິດທາງມຸ້ງໜ້າຕໍ່ໄປມົນທົນຝູຈ້ຽນ ທາງຕາເວັນອອກສຽງໃຕ້ຂອງຈີນ.

      ທັງນີ້, ອິດທິພົນຂອງພາຍຸແຄມີ ສົ່ງຜົນເຮັດໃຫ້ມີຜູ້ເສຍຊີວິດແລ້ວ 2 ຄົນ ແລະ ມີຜູ້ໄດ້ຮັບບາດເຈັບຫລາຍກວ່າ 200 ຄົນ. ຂະນະທີ່ກົມອຸຕຸນິຍົມວິທະຍາໄຕ້ຫວັນຍັງເຕືອນໃຫ້ປະຊາຊົນທີ່ອາໄສຢູ່ຕາມພື້ນທີ່ລຸ່ມຕໍ່າ ເພີ່ມຄວາມລະມັດລະວັງອັນຕະລາຍຈາກຝົນຕົກໜັກ ແລະ ລົມພັດແຮງ. ສ່ວນເມືອງຫລາຍແຫ່ງໃນໄຕ້ຫວັນ ລວມທັງນະຄອນຫລວງໄທເປ ປະກາດມື້ພັກເປັນກໍລະນີພິເສດຕໍ່ເນື່ອງເປັນວັນທີ 2 ໂດຍໂຮງຮຽນ, ສະຖານທີ່ລັດຖະການ ແລະ ຕະຫລາດຫລັກຊັບ ຍັງປິດເຮັດວຽກ.

     ຂະນະທີ່ຍີ່ປຸ່ນເຕືອນໄພປະຊາຊົນຢູ່ເກາະໂອກິນາວາ ໃຫ້ກຽມຄວາມພ້ອມຕໍ່ສະພາບອາກາດ ເຊິ່ງຈະເປັນຜົນກະທົບຈາກພາຍຸແຄມີ ເຊິ່ງມີຄວາມໝາຍວ່າ: ມົດ ໃນພາສີເກົາຫລີ, ສ່ວນປະຊາຊົນໃນທາງເໜືອຂອງຟີລິບປິນ ເກາະລູຊອນ ລວມທັງນະຄອນຫລວງມະນິລາ ຜະເຊີນນໍ້າຖ້ວມກະທັນຫັນ ແລະ ກະແສລົມຮຸນແຮງ ເຊິ່ງເປັນມາຈາກອິດທິພົນຂອງພາຍຸ.