ສະຫາຍ ຄຳພັນ ເຜີຍຍະວົງ ຄະນະເລຂາທິການສູນກາງພັກ ຫົວໜ້າຄະນະໂຄສະນາອົບຮົມສູນກາງພັກ ປະທານສະພາທິດສະດີສູນກາງພັກຢ້ຽມຢາມ ແລະ ເຮັດວຽກຢູ່ແຂວງສາລະວັນ

ວັນທີ 24 ກໍລະກົດ 2024 ສະຫາຍ ຄຳພັນ ເຜີຍຍະວົງ ຄະນະເລຂາທິການສູນກາງພັກ ຫົວໜ້າຄະນະໂຄສະນາອົບຮົມສູນກາງພັກ (ຄອສພ), ປະທານສະພາທິດສະດີສູນກາງພັກ ພ້ອມຄະນະໄດ້ເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງສາລະວັນ ໂດຍການຕ້ອນຮັບຂອງສະຫາຍ ດາວວົງ ພອນແກ້ວ ເລຂາພັກແຂວງ, ເຈົ້າແຂວງສາລະວັນ ພ້ອມຄະນະທີ່ແຂວງສາລະວັນ.

ໂອກາດມາຢ້ຽມຢາມແລະເຮັດວຽກຄັ້ງນີ້ ກໍເພື່ອເຜີຍແຜ່ບັນດານິຕິກໍາຕ່າງໆກ່ຽວກັບການກະກຽມສະເຫຼີມສະຫຼອງ 3 ວັນປະຫວັດສາດ ໃນປີ 2025 ເປັນຕົ້ນ: ວັນສ້າງຕັ້ງພັກຄົບຮອບ70 ປີ, ວັນສະຖາປະນາ ສປປ ລາວ ຄົບຮອບ 50 ປີ ແລະ ວັນເກີດຂອງ ປະທານ ໄກສອນ ພົມວິຫານ ຄົບຮອບ 105 ປີ ໃຫ້ບັນດາທ່ານການນໍາຂອງແຂວງສາລະວັນ ຮັບຮູ້ ແລະ ກໍາໄດ້ເພື່ອນໍາໄປຈັດຕັ້ງປະຕິບັດ, ເຜີຍແຜ່ແນະນໍາກ່ຽວກັບການກະກຽມຊຸກຍູ້ ຕາມທ່າແຮງເງື່ອນໄຂຄວາມເໜາະສົມຂອງແຂວງ, ພ້ອມນີ້ຍັງໄດ້ແນະນໍາການກະກຽມຄັດເລືອກບຸກຄົນ, ນິຕິບຸກຄົນ, ກົມກອງຕົວແບບທີ່ເດັ່ນປະຈໍາແຂວງ ເພື່ອປະກອບຄໍາເຫັນເປັນຕົວແທນຈາກແຂວງ ຕໍ່ກອງປະຊຸມໃຫຍ່ ຄັ້ງທີ XII ຂອງພັກ ແລະ ຊຸກຍູ້ການກະກຽມກອງປະຊຸມໃຫ່ຍ 3 ຂັ້ນ ຂອງແຂວງສາລະວັນ; ໂອກາດດັ່ງກ່າວ ສະຫາຍນາງ ບຸນທະວີ ດວງລາສີ ຮອງເລຂາພັກແຂວງຜູ້ຊີ້ນໍາວຽກງານແນວຄິດ, ວຽກພັກ-ພະນັກງານກໍໄດ້ລາຍງານໂດຍຫຍໍ້ກ່ຽວກັບການຊີ້ນໍາ-ນໍາພາການຈັດຕັ້ງເຊື່ອມຊຶມ ແລະ ຜັນຂະຫຍາຍມະຕິ, ຄຳສັ່ງຂອງພັກ ສະໄໝທີ XI; ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ IX  ຕິດພັນກັບການຜັນຂະຫຍາຍມະຕິກອງປະຊຸມໃຫຍ່ ຄັ້ງທີ X ຂອງອົງຄະນະພັກແຂວງສາລະວັນ; ການຈັດຕັ້ງປະຕິບັດ 2 ວາລະແຫ່ງຊາດ ແລະ ການກະກຽມກອງປະຊຸມໃຫຍ່ 3 ຂັ້ນ ຂອງພັກຕິດພັນກັບການປະຕິບັດແຜນພັດທະນາ ເສດຖະກິດ-ສັງຄົມ ຂອງລັດຖະບານ ແລະ ຂອງແຂວງ; ໄລຍະຜ່ານມາແຂວງສາລະວັນ ໂດຍລວມທົ່ວແຂວງມີຄວາມສະຫງົບໂດຍພື້ນຖານ, ໄດ້ສຸມໃສ່ຈັດຕັ້ງເຊື່ອມຊຶມເອກະສານຕ່າງໆ, ຈັດຕັ້ງຮໍ່າຮຽນການເມືອງຫັດແອບສິລະປະຍຸດຍຸດທະວິທີສູ້ຮົບ, ປັບປຸງກອງຫຼອນ-ປກສ ສຸມໃສ່ແກ້ໄຂບັນຫາຢາເສບຕິດ ໂດຍສະເພາະແມ່ນບ້ານທີ່ມີຄວາມຫຍຸ້ງຍາກ-ຫຼໍ່ແຫຼມ ແລະ ບ້ານຊາຍແດນ, ຫັນກຳລັງ ປກຊ-ປກສ ຈຳນວນ 406 ສະຫາຍ ເຄື່ອນໄຫວເກັບກຳຂໍ້ມູນ-ຂຶ້ນບັນຊີເປົ້າໝາຍຜູ້ເສບ-ຜູ້ຄ້າຂາຍ ຕິດຕາມເປົ້າໝາຍຢ່າງໃກ້ຊິດ ແລະ ຈັບກຸມຜູ້ກະທຳຜິດຄຽງຄູ່ກັບການສຶກສາອົບຮົມ ໂຄສະນາເຜີຍແຜ່ຄວາມຮູ້ຄວາມເຂົ້າໃຈ ກ່ຽວກັບຄວາມອັນຕະລາຍຮ້າຍແຮງຂອງຢາເສບຕິດ. ຜ່ານການຈັດຕັ້ງປະຕິບັດສາມາດກໍານົດເປົ້າໝາຍທີ່ພົວພັນຢາເສບຕິດ ໄດ້ 11.122 ຄົນ, ມ້າງຄະດີຄ້າຂາຍຢາເສບຕິດ ໄດ້ 383 ເລື່ອງ, ກັກຜູ້ຕ້ອງຫາ ໄດ້ 716 ຄົນ,  ຢຶດຢາບ້າ ໄດ້ 7 ແສນກວ່າເມັດ, ເງິນສົດ 90 ລ້ານກີບ ແລະ ວັດຖຸອື່ນໆອີກຈໍານວນໜຶ່ງ;

ໃນ 6 ເດືອນ ປີ 2024: ສາມາດມ້າງຄະດີຢາເສບຕິດ ໄດ້ທັງໝົດ 51 ເລື່ອງ, ກັກຕົວຜູ້ຕ້ອງຫາ ໄດ້ 128 ຄົນ, ຍິງ 7 ຄົນ, ຂອງກາງຢາບ້າ 211,523 ເມັດ ແລະ 8.41 ກຣາມ, ຢາໄອ້  5 ຖົງນ້ອຍ, ໂທລະສັບ 79 ໜ່ວຍ, ລົດຈັກ 35 ຄັນ, ລົດໃຫຍ່ 3 ຄັນ, ເງິນກີບ 183,075,000 ກີບ, ວັດຖຸຄ້າຍຄືຄໍາ ປະມານ 12 ບາດ, 1 ສະຫຼຶງ ກັບ 5 ຫຸນ, ປືນ 6 ກະບອກ; ນອກຈາກນີ້ການພັດທະນາ ເສດຖະກິດ-ສັງຄົມ ໄດ້ສຸມໃສ່ຈັດຕັ້ງປະຕິບັດບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກ ທາງດ້ານເສດຖະກິດ-ການເງິນ ຢ່າງແຂງແຮງ ເຮັດໃຫ້ເສດຖະກິດຂອງແຂວງຂະຫຍາຍຕົວຢູ່ໃນລະດັບ 5.1% ລວມຍອດຜະລິດຕະພັນພາຍໃນບັນລຸໄດ້ 26,710 ຕື້ກີບ, ສະເລ່ຍລາຍຮັບຕໍ່ຫົວຄົນ 850 ໂດລາ ຫຼື ເທົ່າກັບ 14.4 ລ້ານກີບ ຕໍ່ຄົນ ຕໍ່ປີ, ຍາດແຍ່ງດຶງດູດການລົງທຶນພາຍໃນ ແລະ ຕ່າງປະເທດເຫັນວ່າມີໜໍ່ແໜງໃໝ່ເກີດຂຶ້ນ ແລະ ກໍາລັງຟົດຟື້ນເປັນຕົ້ນແມ່ນໂຄງການພັດທະນາໄຟຟ້າພະລັງງານລົມ, ໄຟຟ້າແສງຕາເວັນ, ຖ່ານຫີນແລະແຮ່ທາດອື່ນໆ. ໂຄງການລົງທຶນກໍ່ສ້າງໂຮງງານຜະລິດ-ປຸງແຕ່ງແປ້ງມັນ, ຜະລິດຫົວອາຫານແລະປຸ໋ຍຊີວະພາບ, ການລົງທຶນທົ່ວສັງຄົມ ໄດ້ 5,613.08 ຕື້ກີບ ເທົ່າກັບ 64% ຂອງແຜນ 5 ປີ ໃນນັ້ນການລົງທຶນຂອງລັດ 531.59 ຕື້ກີບ, ທຶນຊ່ວຍເຫຼືອເພື່ອການພັດທະນາ 469.21 ຕື້ກີບ, ທຶນເອກະຊົນພາຍໃນ-ຕ່າງປະເທດ 2,121.23 ຕື້ກີບ, ທຶນຂອງທະນາຄານແລະພາກສ່ວນອື່ນໆ 2,491.05 ຕື້ກີບ; ຈັດຕັ້ງປະຕິບັດແຜນງົບປະມານແຫ່ງລັດບັນລຸໄດ້ 653.93 ຕື້ກີບເທົ່າກັບ 77.96% ຂອງແຜນການ 5 ປີ ໃນນັ້ນ: ລາຍຮັບສູນກາງປະຕິບັດຢູ່ແຂວງ 209.18 ຕື້ກີບ ເທົ່າກັບ 73.75% ຂອງແຜນການ 5 ປີ, ລາຍຮັບທ້ອງຖິ່ນປະຕິບັດໄດ້ 444.75 ຕື້ກີບ ເທົ່າກັບ 80.11% ຂອງແຜນການ 5 ປີ.

ດ້ານລາຍຈ່າຍສາມາດປະຕິບັດໄດ້ 1,340.54 ຕື້ກີບ (ບໍ່ລວມລາຍຈ່າຍເງິນລົງທຶນ) ເທົ່າກັບ 55.12% ຂອງແຜນການ 5 ປີ, ສຳລັບ 6 ເດືອນຕົ້ນປີ 2024 ປະຕິບັດໄດ້ 136 ຕື້ກວ່າກີບ ເທົ່າກັບ 66,30% ຂອງແຜນການປີທຽບໃສ່ໄລຍະດຽວກັນຂອງປີຜ່ານມາ ເຫັນວ່າລື່ນແຜນການ 24.63%. ຄາດວ່າໝົດປີຈະລື່ນແຜນຄືກັບ ປີ 2023.

ໃນຕອນທ້າຍ ທ່ານ ຄຳພັນ ເຜີຍຍະວົງ ຍັງໄດ້ສະແດງຄວາມຍ້ອງຍໍຊົມເຊີຍ ຕໍ່ການຊີ້ນໍາໆພາຂອງຄະນະພັກຄະນໍາແຂວງສາລະວັນ ທີ່ໄດ້ເອົາໃຈໃສ່ຊຸກຍູ້ເຮັດໃຫ້ຫຼາຍຂົງເຂດວຽກງານ ປະຕິບັດສໍາເລັດຕາມແຜນການທີ່ວາງໄວ້ ແລະ ໄດ້ເນັ້ນໃຫ້ຄະນະນໍາແຂວງສາລະວັນ ເອົາໃຈໃສ່ທິດຊີ້ນຳຕິດຕາມກວດກາຄັດເລືອກບຸກຄົນ, ນິຕິບຸກຄົນ, ຫົວໜ່ວຍທຸລະກິດແລະກົມກອງດີເດັ່ນຕົວແບບຂອງແຂວງ ໂດຍເນັ້ນໃສ່ຄຸນນະພາບເປັນບົດຮຽນ ແລະ ແບບຢ່າງໃນການດໍາລົງຊີວິດ ພ້ອມນີ້ການກະກຽນສະເຫຼີມສະຫຼອງ 3 ວັນປະຫວັດສາດ ທີ່ສໍາຄັນກໍໄດ້ເນັ້ນໃຫ້ພ້ອມກັນຈັດຕັ້ງປະຕິບັດໃຫ້ມີຜົນສໍາເລັດ ແລະ ທັນກັບກໍານົດເວລາ, ເຮັດໃຫ້ມີຂະບວນການຟົດຟື້ນ, ມີບັນຍາກາດໂດຍຕິດພັນກັບກິດຈະກໍາ ທີ່ມີໃນຄໍາສັ່ງແນະນໍາຂອງຄະນະເລຂາທິການສູນກາງພັກ, ການສະເຫຼີມສະຫຼອງຕ້ອງບົນຈິດໃຈປະຢັດມັດທະຍັດ, ນໍາໃຊ້ງົບປະມານຂອງແຂວງເອງ.