ເປີດນຳໃຊ້ລະບົບທັນສະໄໝເກັບຄ່າທຳນຽມທາງຊ່ວຍຄວາມໂປ່ງໃສກວດສອບໄດ້
ນັບແຕ່ວັນທີ 30 ຕຸລາ 2017 ເປັນຕົ້ນໄປລະບົບທັນສະໄໝເກັບຄ່າທໍານຽມທາງໄດ້ເປີດນຳໃຊ້ເປັນທາງການ, ເຊິ່ງເປັນການຮ່ວມມືລະຫວ່າງກົມສ່ວຍສາອາກອນ ກະຊວງການເງິນ ກັບທະນາຄານການຄ້າຕ່າງປະເທດລາວ ມະຫາຊົນ (ທຄຕລ), ໂດຍສາມາດຊໍາລະໄດ້ 3 ຊ່ອງທາງຄື: ຜ່ານ ATM, BCEL One ແລະ ເຄົ້າເຕີ້ບໍລິການຂອງ ທຄຕລ ແລະ ຕໍ່ໄປຈະສາມາດຊໍາລະຜ່ານຕູ້ບໍລິການອັດຕະໂນມັດ ແລະ ຕົວແທນໂອນເງິນດ່ວນຊຸມຊົນ ຫຼື Bcome ຂອງ ທຄຕລ.
ພິທີລົງນາມການຮ່ວມມື ແລະ ເປີດນຳໃຊ້ລະບົບເກັບຄ່າທຳນຽມທາງດັ່ງກ່າວ, ໄດ້ຈັດຂຶ້ນໃນວັນທີ 26 ຕຸລານີ້, ທີ່ໂຮມແຮມລາວພາຊາ ນະຄອນຫຼວງວຽງຈັນ ລະຫວ່າງທ່ານ ພູທະນູເພັດ ໄຊສົມບັດ ຫົວໜ້າກົມສ່ວຍສາອາກອນ ກັບທ່ານ ພູຂົງ ຈັນທະຈັກ ຜູ້ອຳນວຍການໃຫຍ່ ທຄຕລ ໂດຍການເຂົ້າຮ່ວມຂອງ ທ່ານ ສົມພາວ ໄຟສິດ ຜູ້ວ່າການທະນາຄານແຫ່ງ ສປປ ລາວ ແລະ ທ່ານ ບຸນໂຈມ ອຸບົນປະເສີດ ຮອງລັດຖະມົນຕີກະຊວງການເງິນ.
ທ່ານຫົວໜ້າກົມສ່ວຍສາອາກອນ ກ່າວວ່າ: ກະຊວງການເງິນໄດ້ຕົກລົງເຫັນດີໃຫ້ກົມສ່ວຍສາອາກອນ ແລະ ທຄຕລ ຮ່ວມກັນຄົ້ນຄ້ວາ ແລະ ພັດທະນາການຊໍາລະສະສາງຄ່າທາງຜ່ານລະບົບຂອງ ທຄຕລ ເຊິ່ງເປັນອີກບາດກ້າວໜຶ່ງໃນການປະຕິຮູບການຊໍາລະສະສາງຜ່ານລະບົບທະນາຄານໃຫ້ວ່ອງໄວ, ສະດວກ ແລະ ປອດໄພໃນການຊໍາລະຄ່າທາງບໍ່ສະເພາະແຕ່ລົດທົ່ວໄປ ແລະ ລົດໃນການບໍລິຫານຂອງລັດຕ້ອງໄດ້ເສຍເຊັ່ນດຽວກັນ.
ທ່ານຜູ້ອຳນວຍການໃຫຍ່ ທຄຕລ ມີຄຳເຫັນວ່າ: ການເປີດນຳໃຊ້ລະບົບເກັບຄ່າທຳນຽມທາງດັ່ງກ່າວເພື່ອສ້າງຄວາມອຳນວຍຄວາມສະດວກໃຫ້ແກ່ປະຊາຊົນໃນການຊໍາລະພັນທະຄ່າທຳນຽມທາງ, ບໍລິການຄວາມປອດໄພ, ສາມາດຫລຸດຜ່ອນການນຳໃຊ້ເງິນສົດ ທີ່ສຳຄັນຈະຊ່ວຍໃຫ້ພາກລັດສາມາດເກັບລາຍຮັບເຂົ້າງົບປະມານໃຫ້ທັນກັບເວລາ, ຖືກຕ້ອງ, ໂປ່ງໃສ ແລະ ສາມາດກວດສອບໄດ້.
ເຖິງຢ່າງໃດກໍຕາມເບື້ອງຕົ້ນການບໍລິການອາດຍັງບໍ່ທັນສາມາດລົງສູ່ເຂດຫ່າງໄກສອກຫລີກໄດ້ເທື່ອ. ດັ່ງນັ້ນຜູ້ທີ່ຢູ່ເຂດຫ່າງໄກສອກຫລີກສາມາດຊໍາລະຜ່ານຕູ້ ATM ຂອງ ທຄຕລ ໃນແຕ່ລະເຂດກ່ອນ, ໃນອະນາຄົດທາງ ທຄຕລ ຈະມີການຂະຫຍາຍຕົວແທນໂອນເງິນດ່ວນຊຸມຊົນ ຫຼື Bcome ຂອງທຄຕລ ໃຫ້ກວ້າງຂວາງອອກສູ່ເຂດຫ່າງໄກສອກຫລີກຫລາຍຂຶ້ນ.
