ສະຫາຍ ຫງວຽນ ຝູ໋ຈ້ອງ ປະກອບສ່ວນຢ່າງໃຫຍ່ຫລວງ ຕໍ່ສາຍພົວພັນພິເສດລາວ-ຫວຽດນາມ

ວັນທີ 23 ກໍລະກົດ 2024 ສະຫາຍ ທອງສະຫວັນ ພົມວິຫານ ກໍາມະການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກ ໄດ້ໃຫ້ສໍາພາດຕໍ່ສື່ມວນຊົນ ກ່ຽວກັບຜົນງານ ແລະ ບົດຮຽນດ້ານວຽກງານການພົວພັນຂອງພັກ ທີ່ສະຫາຍ ຫງວຽນ ຝູ໋ຈ້ອງ ໄດ້ປະກອບສ່ວນຢ່າງຕັ້ງໜ້າ ເຂົ້າໃນວຽກປັບປຸງກໍ່ສ້າງພັກໃຫ້ເຂັ້ມແຂງ, ການແກ້ໄຂບັນຫາການສໍ້ລາດບັງຫລວງ, ປະກົດການຍໍ້ທໍ້ຕ່າງໆ, ປະກອບສ່ວນເຂົ້າໃນການສ້າງສາພັດທະນາປະເທດຫວຽດນາມ ໄປຕາມທິດສັງຄົມນິຍົມ. ປັດຈຸບັນ, ສະພາບການພັດທະນາຂອງຫວຽດນາມ ມີການປ່ຽນແປງໄປທາງທີ່ຕັ້ງໜ້າຫລາຍ ໂດຍສະເພາະ ດ້ານ ເສດຖະກິດ ເຫັນໄດ້ວ່ານັບແຕ່ປີ 2015 ລະດັບການຂະຫຍາຍຕົວຂອງ GDP ທຽບໃສ່ຫົວຄົນຫວຽດນາມ ປະມານ 2.000 ໂດລາສະຫະລັດ ມາເຖິງ 2021 ລະດັບການຂະຫຍາຍຕົວຂອງ GDP ທຽບໃສ່ຫົວຄົນຫວຽດນາມ ປະມານເກືອບ 3.000 ໂດລາສະຫະລັດ ມາເຖິງໄລຍະມໍ່ໆນີ້, ລະດັບການຂະຫຍາຍຕົວຂອງ GDP ແມ່ນສູງກວ່າ 4.000 ໂດລາສະຫະລັດ. ຊີວິດການເປັນຢູ່ຂອງປະຊາ ຊົນ ໄດ້ຮັບການຍົກລະດັບສູງຂຶ້ນຢ່າງປະຈັກຕາ, ປະຊາຊົນຫວຽດນາມ ມີຄວາມຮັ່ງມີຂຶ້ນໃນຈັ່ງວະທີ່ໄວ, ການພົວພັນຮ່ວມມືກັບສາກົນ ເຫັນວ່າມີຈັ່ງວະທີ່ດີຂຶ້ນ.

ເວົ້າລວມແລ້ວ, ພາຍໃຕ້ການນຳພາ-ຊີ້ນໍາຂອງ ສະຫາຍ ຫງວຽນ ຝູ໋ຈ້ອງ ທີ່ເປັນແກນນໍາໃນພັກກອມມູນິດຫວຽດນາມ ເຮັດໃຫ້ມີການຫັນປ່ຽນຢ່າງຕັ້ງໜ້າ ໂດຍສະເພາະ ການພົວພັນຮ່ວມມືລະ ຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ໄດ້ມີການພົວພັນແບບພິເສດ ເຊິ່ງການພົວພັນດັ່ງກ່າວ, ໄດ້ສ້າງຂຶ້ນດ້ວຍເລືອດເນື້ອ, ເຫື່ອແຮງຂອງນັກປະຕິວັດ ກໍຄື ການນໍາສອງປະເທດໄລຍະທີ່ຜ່ານມາ ໃນຂະບວນການຕໍ່ສູ້ເພື່ອຄວາມເປັນເອກະລາດແຫ່ງຊາດ ເປັນພື້ນຖານໃນການສ້າງການພົວພັນພິເສດ ລະຫວ່າງສອງພັກ, ສອງລັດ ກໍຄື ປະຊາຊົນສອງຊາດ ເຊິ່ງ ສະຫາຍ ເປັນຜູ້ນໍາຜູ້ໜຶ່ງທີ່ໃຫ້ຄວາມສໍາຄັນ ໃນການເພີ່ມພູນຄູນສ້າງ ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ, ຫວຽດນາມ-ລາວ.

ສະຫາຍ ຫງວຽນ ຝູ໋ຈ້ອງ ເລຂາທິການໃຫຍ່ ຄະນະບໍລິຫານງານສູນກາງພັກກອມມູນິດ ຫວຽດນາມ ໄດ້ປະກອບສ່ວນອັນໃຫຍ່ຫລວງ, ລໍ້າຄ່າ ແລະ ສໍາຄັນເຂົ້າໃນການເພີ່ມພູນຄູນສ້າງ ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ, ຫວຽດນາມ-ລາວ ມາໂດຍຕະຫລອດ ເຊິ່ງການຈາກໄປຂອງ ສະຫາຍເປັນການສູນເສຍ ເພື່ອນສະຫາຍທີ່ໃກ້ຊິດ ສະໜິດສະໝົມທີ່ສຸດຂອງ ພັກ, ລັດ ແລະ ປະຊາຊົນລາວ ບັນດາເຜົ່າ.

(ສະຫາຍ ຫງວຽນ ຝູ໋ຈ້ອງ ເລຂາທິການໃຫຍ່ ຄະນະບໍລິຫານງານສູນກາງພັກກອມມູນິດ ຫວຽດນາມ)