ຄະນະກໍາມະການແຮງງານແຫ່ງຊາດ ຫາລືປັບປຸງຄ່າແຮງງານຂັ້ນຕ່ຳ ໃຫ້ແທດເໝາະກັບສະພາບເສດຖະກິດໃນປັດຈຸບັນ

  ວັນທີ 24 ກໍລະກົດ 2024 ນີ້, ກະຊວງແຮງງານ ແລະ ສະຫວັດດີການສັງຄົມ ໄດ້ຈັດກອງປະຊຸມຄະນະກໍາມະການແຮງງານແຫ່ງຊາດ ເພື່ອປຶກສາຫາລືປັບປຸງຄ່າແຮງງານຂັ້ນຕ່ຳ, ໂດຍມີ ທ່ານ ນາງ ໃບຄໍາ ຂັດທິຍະ ປະທານຄະນະກໍາມະການແຮງງານແຫ່ງຊາດ, ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ, ເປັນປະທານກອງປະຊຸມ.

  ທ່ານ ນາງ ໃບຄໍາ ຂັດທິຍະ ກ່າວວ່າ: ການຄົ້ນຄວ້າ ແລະ ການກໍານົດຄ່າແຮງງານຂັ້ນຕໍ່າສຸດ ແມ່ນມີຄວາມສໍາຄັນ ແລະ ຈໍາເປັນທີ່ສຸດສໍາລັບຜູ້ອອກແຮງງານທີ່ບໍ່ມີສີມືໃນໄລຍະນີ້ ເພາະໃນເງື່ອນໄຂທີ່ພາກ ພື້ນ ແລະ ພາຍໃນປະເທດ ຍັງມີສິ່ງທ້າທາຍຫລາຍປະການໂດຍສະເພາະແມ່ນ ບັນຫາເສດຖະກິດ-ການ ເງິນ, ຄວາມບໍ່ໝັ້ນທ່ຽງ ຂອງລາຄານໍ້າມັນເຊື້ອໄຟ, ການເໜັງຕີງຂອງລາຄາສິນຄ້າອຸປະໂພກ-ບໍລິໂພກທີ່ສູງຂຶ້ນ, ໄພເງິນເຟີ້, ຄ່າຂອງເງິນກີບອ່ອນຄ່າ ແລະ ອື່ນໆ,  ເຊິ່ງໄລຍະທີ່ຜ່ານມາກະຊວງແຮງງານ ແລະ ສະຫວັດດີການສັງຄົມ ໄດ້ມີການປັບປຸງລະດັບຄ່າແຮງງານຂັ້ນຕ່ຳມາແລ້ວ 10 ຄັ້ງ ເລີ່ມແຕ່ປີ 1991  ແລະ ຄັ້ງຫລ້າສຸດແມ່ນປີ 2023 ກໍານົດໃນລະດັບ 1,600,000 ກີບ/ຄົນ/ເດືອນ ແລະ ມາຮອດປັດຈຸບັນນີ້ ເຫັນວ່າ ຄ່າແຮງງານຂັ້ນຕໍ່າທີ່ໄດ້ກຳນົດໄວ້ໃນຈໍານວນດັ່ງກ່າວນັ້ນບໍ່ສົມຄູ່ກັບຄ່າຄອງຊີບຂອງຜູ້ອອກແຮງງານໃນປັດຈຸບັນ.

    ທ່ານ ນາງ ໃບຄໍາ ຂັດທິຍະກ່າວຕື່ມວ່າ:  ຕໍ່ສະພາບດັ່ງກ່າວ, ເຮັດໃຫ້ຜູ້ອອກແຮງງານປະເຊີນກັບຄວາມຫຍຸ້ງຍາກບໍ່ໜ້ອຍ, ແຮງງານບໍ່ເຂົ້າສູ່ຕຳແໜ່ງງານພາຍໃນ ອັນເນື່ອງມາຈາກບັນຫາຄ່າແຮງງານບໍ່ສົມຄູ່ກັບຄ່າຄອງຊີບໃນປັດຈຸບັນ ລວມເຖິງບັນຫາສະພາບແວດລ້ອມ ແລະ ສະຫວັດດີການແຮງງານໃນສະຖານທີ່ເຮັດວຽກ ຍັງບໍ່ເປັນແຮງຈູງໃຈໃຫ້ກັບແຮງງານ, ບັນຫາເຫລົ່ານີ້ແມ່ນເປັນບັນຫາທີ່ຮີບດ່ວນ ແລະ ສໍາຄັນ ທີ່ອົງການສາມຝ່າຍກໍຄືກະຊວງແຮງງານ ແລະ ສະຫວັດດີການສັງຄົມ, ສູນກາງ ສະຫະພັນກຳມະບານລາວ ແລະ ສະພາການຄ້າ ແລະ ອຸດສະຫະກຳແຫ່ງຊາດລາວ ຕ້ອງໄດ້ຮ່ວມກັນປຶກສາຫາລືກັນ ເພື່ອປັບປຸງ ແລະ ແກ້ໄຂ ບັນຫາທາງດ້ານຄ່າແຮງງານຂັ້ນຕໍ່າຂອງຜູ້ອອກແຮງງານໃຫ້ສອດຄ່ອງກັບສະພາບ ເງື່ອນໄຂດ້ານເສດຖະກິດ ໃນແຕ່ລະໄລຍະ ດ້ວຍຄວາມເປັນເອກະພາບກັນ ພິຈາ ລະນາຮັບຮອງການປັບປຸງຄ່າແຮງງານຂັ້ນຕໍ່າສຸດ ແລະ ສາມາດນຳໄປສູ່ການຈັດຕັ້ງປະຕິບັດໃຫ້ໄດ້ຮັບຜົນດີ ແລະ ເພື່ອໃຫ້ເກີດຜົນປະໂຫຍດໃຫ້ແກ່ ສາມຝ່າຍ ທັງຜູ້ອອກແຮງງານ, ຜູ້ໃຊ້ແຮງງານ ແລະ ຜົນປະໂຫຍດລວມຂອງລັດ,  ຫລັງຈາກຮັບຮອງແລ້ວ ຈະໄດ້ສະເໜີຫາສໍານັກງານນາຍົກລັດຖະມົນຕີເພື່ອພິຈາລະນາຕໍ່ໄປ.