ຈີນກຽມຮັບມື ກັບອິດທິພົນຈາກພາຍຸ 2 ຫົວຊ້ອນ ພະພິຣຸນ-ແຄມີ

ວັນທີ 21 ກໍລະກົດນີ້, ກົມອຸຕຸນິຍົມວິທະຍາແຫ່ງຊາດຈີນລາຍງານວ່າ: ພາຍຸ ພະພິຣຸນ ກຽມພັດຂຶ້ນຝັ່ງຢູ່ແຂວງ ຫ່າຍໜານ ຫລື ຫ່າຍຫລໍາ ທາງຕອນໃຕ້ສຸດຂອງປະເທດ ໃນຄືນວັນທີ 21 ກໍລະກົດ ດ້ວຍຄວາມໄວລົມທີ່ຮຸນແຮງ ແລະ ເປັນພາຍຸດີເປຣຊັນຫົວທໍາອິດ ທີ່ພັດຂຶ້ນຝັ່ງທະເລຂອງຈີນໃນປີນີ້.

ຂໍ້ມູນດ້ານອຸຕຸນິຍົມວິທະຍາຂອງຈີນ ເຜີຍແຜ່ໃນຕອນເຊົ້າຂອງວັນທີ 21 ກໍລະກົດ ຕາມເວລາທ້ອງຖິ່ນ ລະບຸວ່າ: ພາຍຸດິເປຣຊັນ ພະພິຣຸນ ໄດ້ກໍ່ຕົວຢູ່ທະເລຈີນໃຕ້ ຢູ່ຫ່າງຈາກເມືອງ ວ່ານໜິງ ເກາະຫ່າຍຫລໍາ ອອກໄປທາງຕາເວັນອອກສຽງໃຕ້ປະມານ 275 ກິໂລແມັດ.
 ຂະນະທີ່ຄວາມໄວລົມສູງສຸດໃກ້ສູນກາງຂອງພາຍຸຫົວດັ່ງກ່າວ ປະມານ 30 ແມັດຕໍ່ວິນາທີ ເມື່ອພັດຂຶ້ນຝັ່ງ ແລະ ນອກຈາກເກາະຫ່າຍຫລໍາແລ້ວ,  ແຂວງ ກວາງຕຸ້ງ ເຊິ່ງຕັ້ງຢູ່ໃກ້ຄຽງ ເປັນອີກໜຶ່ງໃນພື້ນທີ່ທີ່ອາດຈະໄດ້ຮັບຜົນກະທົບຈາກອິດທິພົນຄວາມຮຸນແຮງຂອງພາຍຸດິເປຣຊັນຫົວນີ້.

ນອກນີ້, ກົມອຸຕຸນິຍົມວິທະຍາແຫ່ງຊາດຈີນກຳລັງຕິດຕາມການກໍ່ຕົວ ແລະ ເສັ້ນທາງຂອງພາຍຸ ແຄມີ ເຊິ່ງແປວ່າ “ມົດ” ໃນພາສາເກົາຫລີ ເຊິ່ງກໍາລັງສະສົມຄວາມຮຸນແຮງ ແລະ ເຄື່ອນທີ່ຢູ່ຫ່າງຈາກຊາຍຝັ່ງທະເລທາງຕາເວັນອອກສຽງເໜືອຂອງ ຟີລິບປິນ ປະມານ 530 ກິໂລແມັດ ຄາດວ່າຈະເຄື່ອນທີ່ຜ່ານໄຕ້ຫວັນກ່ອນ ແລ້ວຈຶ່ງຂຶ້ນຝັ່ງຢູ່ຈີນ.