ຫວຽດນາມກຽມຈັດພິທີສົບ ທ່ານເລຂາທິການພັກກອມມູນິດ ຫງວຽນຟູຈ້ອງ

      ວັນທີ 21 ກໍລະກົດ, ພັກກອມມູນິດຫວຽດນາມອອກຖະແຫລງການ ເລື່ອງການຈັດພິທີສົບ ເພື່ອເປັນກຽດໃຫ້ທ່ານ ຫງວຽນຟູຈ້ອງ ເລຂາທິການພັກກອມມູນິດຫວຽດນາມ ຢູ່ນະຄອນຫລວງຮ່າໂນ້ຍ ລະຫວ່າງວັນທີ 25-26 ກໍລະກົດນີ້ ໂດຍໄລຍະເວລາດັ່ງກ່າວຖືເປັນການໄວ້ອາໄລ ແລະ ການຝັງສົບຂອງທ່ານ ຫງວຽນຟູຈ້ອງ ຈະເກີດຂຶ້ນຢູ່ສຸສານແຫ່ງຊາດ ໃນນະຄອນຫລວງຮ່າໂນ້ຍ ເຊິ່ງເປັນສະຖານທີ່ຝັງສົບອະດີດເລຂາທິການພັກກອມມູນິດ ແລະ ນັກການເມືອງລະດັບສູງຫລາຍທ່ານຂອງຫວຽດນາມ.

     ຂະນະດຽວກັນ, ຖະແຫລງການຂອງພັກກອມມູນິດຫວຽດນາມລະບຸອີກວ່າ: ການຈາກໄປຂອງທ່ານ ຫງວຽນຟູຈ້ອງ “ຄືການສູນເສຍຄັ້ງໃຫຍ່ຂອງພັກ, ລັດ, ປະຊາຊົນ ແລະ ຄອບຄົວ”.

     ທັງນີ້, ທ່ານ ຫງວຽນຟູຈ້ອງ ເປັນເລຂາທິການພັກກອມມູນິດຫວຽດນາມຄົນທີສອງ ເຊິ່ງເຖິງແກ່ມໍະລະນະກໍາຂະນະຢູ່ໃນຕໍາແໜ່ງ ຕໍ່ຈາກທ່ານ ເລ ສວນ ເລຂາທິການພັກກອມມູນິດຫວຽດນາມ ແລະ ສະຫາຍຄົນສິດຂອງປະທານ ໂຮ່ຈີມິງ ເຊິ່ງເຖິງແກ່ມໍລະນະກໍາໃນວັນທີ 10 ກໍລະກົດ 1988 ດ້ວຍອາຍຸ 79 ປີ.

     ພັກກອມມູນິດຫວຽດນາມອອກຖະແຫລງການວ່າ: ທ່ານ ຫງວຽນຟູຈ້ອງ ເລຂາທິການພັກກອມມູນິດຫວຽດນາມ ເຖິງແກ່ມໍລະນະກໍາຢູ່ໂຮງໝໍທະຫານ ໃນນະຄອນຫລວງຮ່າໂນ້ຍ ໃນວັນທີ 19 ກໍລະກົດຜ່ານມາ ໂດຍພະຍາດຊະລາ ແລະ ພະຍາດປະຈໍາຕົວ ລວມອາຍຸໄດ້ 80 ປີ.

     ທ່ານ ຫງວຽນຟູຈ້ອງ ເກີດເມື່ອວັນທີ 14 ເມສາ 1944 ຢູ່ນະຄອນຫລວງຮ່າໂນ້ຍ, ຈົບການສຶກສາດ້ານປັດຊະຍາ ຈາກມະຫາວິທະຍາໄລແຫ່ງຊາດຫວຽດນາມ ໃນປີ 1961 ແລະ ສະໝັກເຂົ້າເປັນສະມາຊິກພັກກອມມູນິດຫວຽດນາມ ເຊິ່ງໄດ້ຮັບການອະນຸມັດສະຖານະສະມາຊິກຢ່າງເປັນທາງການໃນເດືອນທັນວາ 1968 ແລະ ເລີ່ມເຮັດວຽກໃຫ້ສໍານັກງານກິດຈະການການເມືອງ.

     ທ່ານ ຫງວຽນຟູຈ້ອງ ໄດ້ຮັບການເລື່ອນຂັ້ນສູ່ການເປັນ ໜຶ່ງໃນສະມາຊິກຄະນະກໍາມະການກາງພັກກອມມູນິດຫວຽດນາມ ໃນປີ 1934. ຈາກນັ້ນ ໄດ້ຮັບການຄັດເລືອກໃຫ້ດໍາລົງຕໍາແໜ່ງປະທານສະພາແຫ່ງຊາດ ລະຫວ່າງປີ 2008-2011 ແລະ ຂຶ້ນສູ່ຕໍາແໜ່ງເລຂາທິການພັກກອມມູນິດຫວຽດນາມ ເຊິ່ງເປັນຕໍາແໜ່ງສູງສຸດທາງການເມືອງຂອງປະເທດ ໃນວັນທີ 19 ມັງກອນ 2011.