ວາງສີລາລຶກໂຄງການກໍ່ສ້າງອານຸສອນສະຖານ ທ່ານ ພົນເອກ ສີສະຫວາດ ແກ້ວບຸນພັນ ເພື່ອຈາລຶກຄຸນງາມຄວາມດີ

ວັນທີ 18 ກໍລະກົດ 2024, ກະຊວງປ້ອງກັນປະເທດ ສົມທົບກັບພາກສ່ວນທີ່ກ່ຽວຂ້ອງ ຈັດພິທີວາງສີລາລຶກໂຄງການກໍ່ສ້າງອານຸສອນສະຖານ ຮູບຫລໍ່ ທ່ານ ພົນເອກ ສີສະຫວາດ ແກ້ວບຸນພັນ ຢູ່ທີ່ສວນສາທາລະນະ ຫົວພັນ-ແທັງຮວ່າ ບ້ານ ພັນໄຊ ເມືອງຊໍາເໜືອ ແຂວງຫົວພັນ. 

ເພື່ອເປັນການຈາລຶກບຸນຄຸນ, ຜົນງານ, ຄຸນງາມຄວາມດີ ໃນການເຄື່ອນໄຫວປະກອບສ່ວນ ເຂົ້າໃນການ ນໍາພາ – ຊີ້ນໍາ ຂະບວນການປະຕິວັດລາວຕະຫລອດໄລຍະຕໍ່ສູ້ກູ້ຊາດຕ້ານກັບຈັກກະພັດຕ່າງດ້າວ ແລະ ລູກແລ້ງຕີນມື, ກໍຄືໄລຍະປົກປັກຮັກສາ ແລະ ສ້າງສາປະເທດຊາດ.

ທ່ານ ພົນເອກ ສີສະຫວາດ ແກ້ວບຸນພັນ ເປັນນັກຮົບປະຕິວັດຜູ້ທໍາອິດ ເປັນຜູ້ຮ່ວມກໍ່ຕັ້ງກອງໂຄສະນາປະກອບອາວຸດ, ເປັນຜູ້ ນໍາພາ – ບັນຊາ ກອງລາດຊະວົງ. ເຊິ່ງເປັນຕົ້ນກຳເນີດກອງທັບປະຊາຊົນລາວໃນປັດຈຸບັນ, ເພິ່ນໄດ້ຖືກແຕ່ງຕັ້ງເປັນຫົວໜ້າເສນາທິການສູງສຸດຂອງກອງທັບໃນການວາງແຜນສູ້ຮົບ ແລະ ບັນຊາສູ້ຮົບ ຢູ່ບັນດາບັ້ນຮົບ, ບັ້ນຕີ ທີ່ສໍາຄັນ ຕະຫລອດໄລຍະຕໍ່ສູ້ກູ້ຊາດຈົນສາມາດປົດປ່ອຍທົ່ວປະເທດ ຍຶດອໍານາດການປົກຄອງ ສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ ຂຶ້ນໃນວັນທີ 2 ທັນວາ 1975 ແລະ ພາຍຫລັງສະຖາປະນາລະບອບໃໝ່ ທ່ານ ສີສະຫວາດ ແກ້ວບຸນພັນ ໄດ້ເປັນຜູ້ໜຶ່ງທີ່ນໍາໜ້າສືບຕໍ່ອຸທິດຕົນທັງເຫື່ອແຮງ ແລະ ສະຕິປັນຍາ ເຂົ້າໃນການນໍາພາລະກິດປົກປັກຮັກສາໝາກຜົນຂອງການປະຕິວັດ ຈົນສາມາດຜ່ານຜ່າຄວາມຫຍຸ້ງຍາກ ແລະ ສິ່ງທົດສອບທ້າທາຍນາໆປະການ; ນໍາພາປະເທດຊາດກ້າວຂຶ້ນສູ່ຈຸດໝາຍປາຍທາງໄດ້ຢ່າງໜັກແໜ້ນມາເປັນກ້າວໆ.