ຈັບຕົວໄດ້ແລ້ວ! ຊາຍຊາວໄທ ຜູ້ກໍ່ເຫດປຸ້ນຮ້ານຄຳ ຢູ່ແຂວງຄຳມ່ວນ

ເຈົ້າໜ້າທີ່ວິຊາສະເພາະ ກອງບັນຊາການ ປກສ ແຂວງ ສະຫວັນນະເຂດ ກັກຕົວເປົ້າໝາຍທີ່ກໍ່ເຫດປຸ້ນຮ້ານຄຳ ຢູ່ ແຂວງຄຳມ່ວນ 1 ຄົນ ຊື່ທ້າວ ນັນທະພອນ ພຽງຄຳດີ ຫລື ບອນ ອາຍຸ 36 ປີ ອາຊີບ ວ່າງງານ ເຊື້ອຊາດ-ສັນຊາດ ໄທ ຢູ່ບ້ານ ທົ່ງທອງ ເມືອງ ໜອງບົວ ຈັງຫວັດ ນະຄອນສະຫວັນ ປະເທດໄທ, ມີອາວຸດປືນສັ້ນ 1 ກະບອກ ພ້ອມລູກປືນ 28 ລູກ, ທີ່ຊຸກເຊື່ອງໄວ້ຢູ່ແອວ.

ພັອ ວົງຄໍາ ອິນທະບານ ຮອງຫົວໜ້າກອງບັນຊາການ ປກສ ແຂວງ ສະຫວັນນະເຂດ ລາຍງານວ່າ: ວັນທີ 1 ກໍລະກົດ 2024 ເວລາປະມານ 16:00 ໂມງ ໄດ້ຮັບການປະສານລາຍງານຈາກເຈົ້າໜ້າທີ່ກອງບັນຊາການ ປກສ ແຂວງ ຄໍາມ່ວນວ່າ: ມີເຫດການຄົນຮ້າຍເພດຊາຍ 1 ຄົນປຸ້ນຮ້ານຄໍາ ຢູ່ບ້ານ ປາກດົງ ເມືອງ ທ່າແຂກ ແຂວງ ຄໍາມ່ວນ ໄດ້ສາຍຄໍຄໍາ 4 ເສັ້ນ ລວມນໍ້າໜັກ 2 ບາດ, ພາຍຫລັງກໍ່ເຫດແລ້ວໄດ້ຂີ່ລົດຈັກ ຮອນດ້າ ຫລົບໜີລີ້ຊ້ອນຢູ່ແຂວງ ສະຫວັນນະເຂດ. ດັ່ງນັ້ນເຈົ້າໜ້າທີ່ແຂວງສະຫວັນນະເຂດ ຈຶ່ງໄດ້ຕິດຕາມກວດກາຊອກຫາຜູ້ກໍ່ເຫດ. ຕົກມາຮອດເວລາປະມານ 19:00 ໂມງ ຂອງວັນທີ 4 ກໍລະກົດ 2024 ເຈົ້າໜ້າທີ່ວິຊາສະເພາະກອງພັນເຄື່ອນທີ່ ກອງບັນຊາການ ປກສ ແຂວງ ສະຫວັນນະເຂດ ຈຶ່ງໄດ້ພົບລົດຈັກຕ້ອງສົງໄສ ຢູ່ໜ້າຮ້ານຄ້າແຫ່ງແຫ່ງໜຶ່ງ ເຂດບ້ານ ອຸດົມວິໄລ ນະຄອນໄກສອນພົມວິຫານ ຈຶ່ງເຂົ້າໄປກັກຕົວຜູ້ກໍ່ເຫດໄດ້ ພ້ອມ ກວດຄົ້ນຕົວພົບອາວຸດປືນສັ້ນ 1 ກະບອກ ແລະ ລູກປືນ 28 ລູກ.

ຜ່ານການສອບສວນຮູ້ວ່າ: ຜູ້ກ່ຽວເປັນຄົນໄທ, ຜ່ານການກວດກາປະຫວັດ ແມ່ນເຄີຍມີກໍ່ເຫດມາກ່ອນແລ້ວ ແລະ ຜູ້ກ່ຽວຮັບສາລະພາບວ່າໃນວັນທີ 1ກໍລະກົດ 2024 ໄດ້ກໍ່ເຫດປຸ້ນຄໍາ ຢູ່ ເມືອງ ທ່າແຂກ ແຂວງ ຄໍາມ່ວນ. ປັດຈຸບັນ ເຈົ້າໜ້າທີ່ ປກສ ແຂວງ ສະຫວັນນະເຂດ ໄດ້ມອບຕົວຜູ້ກ່ຽວໃຫ້ທາງເຈົ້າໜ້າທີ່ ກອງບັນຊາການ ປກສ ແຂວງ ຄໍາມ່ວນ ເພື່ອດໍາເນີນຄະດີຕາມຂັ້ນຕອນຂອງກົດໝາຍ.