ອາເມລິກາພົບຜູ້ຕິດເຊື້ອໄຂ້ຫວັດສັດປີກເພີ່ມອີກ 4 ຄົນ ກ່ຽວຂ້ອງກັບຟາມສັດປີກ
ປະຊາຊົນ 4 ຄົນ ຈາກຟາມສັດປີກແຫ່ງໜຶ່ງໃນລັດໂຄໂລຣາໂດຂອງອາເມລິກາ ເປັນຄົນເຈັບຈາກການຕິດເຊື້ອໄວຣັສໄຂ້ຫວັດສັດປີກກຸ່ມຫລ້າສຸດໃນປະເທດ.
ວັນທີ 15 ກໍລະກົດ, ສໍານັກຂ່າວຕ່າງປະເທດລາຍງານວ່າ: ສູນຄວບຄຸມ ແລະ ປ້ອງກັນພະຍາດອາເມລິກາ (CDC) ຢືນຢັນການພົບຄົນເຈັບຈາກການຕິດເຊື້ອໄວຣັສໄຂ້ຫວັດສັດປີກ ສາຍພັນ H5N1 ເພີ່ມອີກ 4 ຄົນ ທຸກຄົນເປັນກໍາມະກອນຂອງຟາມສັດປີກແຫ່ງໜຶ່ງ ທາງຕອນເໜືອຂອງລັດໂຄໂລຣາໂດ ແລະ ມີປະຫວັດສໍາຜັດກັບສັດປີກທີ່ຕາຍ.
ຕອນນີ້, ຄົນເຈັບທັງ 4 ຄົນຢູ່ໃນການເບິ່ງແຍງຂອງແພດໝໍ ອາການສ່ວນຫລາຍບໍ່ຮຸນແຮງ ແລະ ຄືກັບພະຍາດຕິດເຊື້ອທົ່ວໄປໃນລະບົບທາງເດີນຫາຍໃຈ ຄືເປັນໄຂ້, ໄອ, ມີນໍ້າມູກ, ໜາວສັ່ນ ແລະ ເຈັບຄໍ.
ຂະນະທີ່ການກວດພົບຜູ້ຕິດເຊື້ອກຸ່ມນີ້ ເພີ່ມຈໍານວນຜູ້ຕິດເຊື້ອສະສົມ ຈາກການແຜ່ລະບາດຂອງພະຍາດໄຂ້ຫວັດສັດປີກຮອບປັດຈຸບັນຢູ່ອາເມລິກາ ເປັນຢ່າງໜ້ອຍ 9 ຄົນ ຈາກຈໍານວນດັ່ງກ່າວ 8 ຄົນ ເປັນການກວດພົບໃນປີນີ້.
ທັງນີ້, ອົງການອະນາໄມໂລກ (WHO) ມີຄວາມກັງວົນຕໍ່ສະຖານະການການແຜ່ລະບາດຂອງພະຍາດໄຂ້ຫວັດສັດປີກເພີ່ມຂຶ້ນ ນັບແຕ່ເລີ່ມພົບການແຜ່ລະບາດໃນສັດລ້ຽງລູກດ້ວຍນົມຫລາຍສາຍພັນ ໃນປີ 2020 ແລະ ຕອນນີ້ຫລາຍລັດໃນອາເມລິກາກໍາລັງຜະເຊີນການແຜ່ລະບາດຂອງພະຍາດດັ່ງກ່າວຢູ່ຟາມສັດລ້ຽງ.
