UN ເປີດເຜີຍວ່າ ອີກ 60 ປີຕໍ່ໜ້າ ປະຊາກອນໂລກຈະເຖິງລະດັບ 10ຕື້ 300 ລ້ານຄົນ
ອົງການສະຫະປະຊາຊາດ (UN) ຄາດຄະເນທ່າອ່ຽງປະຊາກອນໂລກວ່າ: ອາດເຖິງຈຸດສູງສຸດປະມານ 10ຕື້ 300 ລ້ານຄົນ, ແຕ່ຫລັງຈາກນັ້ນຈະຫລຸດລົງປະມານ 100 ລ້ານຄົນ ໃນທ້າຍສະຕະວັດນີ້.
ວັນທີ 13 ກໍລະກົດ, ສໍານັກຂ່າວຕ່າງປະເທດລາຍງານວ່າ: ລາຍງານທ່າອ່ຽງປະຊາກອນໂລກປີ 2024 ລະບຸວ່າ: ຈໍານວນປະຊາກອນໂລກໃນປັດຈຸບັນ ເຊິ່ງມີປະມານ 8ຕື້200 ລ້ານຄົນ ຈະເພີ່ມຂຶ້ນສູ່ລະດັບສູງສຸດຄື 10ຕື້300 ລ້ານຄົນ ພາຍໃນອີກ 60 ປີຕໍ່ໜ້າ ຫລັງຈາກນັ້ນ ປະຊາກອນຈະຫລຸດລົງຢ່າງຕໍ່ເນື່ອງ ລົງມາຢູ່ປະມານ 10ຕື້200 ລ້ານຄົນພາຍໃນທ້າຍສະຕະວັດນີ້, ແຕ່ຂະໜາດປະຊາກອນໂລກໃນປີ 2100 ຈະຫລຸດລົງ 6% ຫລື ໜ້ອຍກວ່າ 700 ລ້ານຄົນ ຈາກທີ່ຄາດຄະເນໄວ້ໃນເດືອນມິຖຸນາ 2013. ທັງນີ້, ຈໍານວນປະຊາກອນສູງສຸດທີ່ບໍ່ຄາດຄິດເກີດຂຶ້ນຈາກຫລາຍປັດໄຈ ເຊິ່ງ ລວມທັງລະດັບການຈະເລີນພັນທີ່ຫລຸດລົງ ໃນປະເທດໃຫຍ່ທີ່ສຸດໃນໂລກບາງປະເທດ ໂດຍສະເພາະຈີນ ເຊິ່ງເກີດຂຶ້ນໄວກວ່າການຄິດໄລ່ໄວ້ກ່ອນໜ້ານີ້ ແລະ ເປັນສັນຍານທີ່ໜ້າຜິດຫວັງ.
ເຖິງຢ່າງໃດກໍຕາມ, ການເຕີບໃຫຍ່ຂອງປະຊາກອນທີ່ຊ້າລົງນັ້ນ ບໍ່ໄດ້ຫລຸດຜົນກະທົບໂດຍສະເລ່ຍທີ່ເກີດຈາກກິດຈະກໍາຂອງມະນຸດແຕ່ລະຄົນ. ໂດຍຫລາຍກວ່າ 1 ໃນ 4 ຫລື 28% ຂອງປະຊາກອນໂລກ ອາໄສຢູ່ໃນໜຶ່ງໃນ 63 ປະເທດ ຫລື ພື້ນທີ່ທີ່ມີປະຊາກອນເຖິງຈຸດສູງສຸດແລ້ວເຊັ່ນ: ຈີນ, ຣັດເຊຍ, ຍີ່ປຸ່ນ ແລະ ເຢຍລະມັນ. ຂະນະທີ່ອີກເກືອບ 50 ປະເທດ ຈະເຂົ້າສູ່ສະຖານະດັ່ງກ່າວໃນອີກ 40 ປີຕໍ່ໜ້າ ລວມທັງເບຣຊິນ, ອີຣານ ແລະ ຕວກກີ.
