ອາຣັບບີ ຊາອຸດິດ ຈະໃຫ້ຜູ້ຍິງ ເບິ່ງກິລາໃນສະໜາມໄດ້ນັບແຕ່ປີໜ້າ
ອາຣັບບີ ຊາອຸດິດ ຈະອະນຸຍາດໃຫ້ຜູ້ຍິງເຂົາໄປເບິ່ງກິລາໃນສະໜາມໄດ້ນັບແຕ່ປີໜ້າເປັນຕົ້ນໄປ ຕາມນະໂຍບາຍປະຕິຮູບຂອງມົງກຸດຣາຊະກຸມານ ໂມຮຳເໝັດ ບິນ ຊັດມານ ທີ່ສ້າງຄວາມປ່ຽນແປງຄັ້ງໃຫຍ່, ໜຶ່ງໃນນັ້ນຄືການອະນຸຍາດໃຫ້ຜູ້ຍິງຂັບລົດໄດ້.
ອາຣັບບີ ຊາອຸດູດ ຫ້າມຜູ້ຍິງເຂົ້າສະໜາມກິລາ ເພາະມີລະບຽບເຂັ້ມງວດເລື່ອງການແຍກຜູ້ຊາຍ ແລະ ຜູ້ຍິງຢູ່ບ່ອນສາທາລະນະ. ການກິລາແຫ່ງອາຣັບບີ ຊາອຸດິດ ແຈ້ງການໃນວັນທີ 29 ຕຸລາວ່າ: ສະໜາມກິລາ 3 ແຫ່ງຢູ່ນະຄອນຫລວງຣິຍາດ, ເມືອງເຈດດາ ແລະ ເມືອງອັດດຳມານ ຈະພ້ອມຮອງຮັບສະມາຊິກທຸກຄົນໃນຄອບຄົວນັບແຕ່ຕົ້ນປີໜ້າ ໂດຍຈະມີຮ້ານອາຫານ, ຮ້ານກາເຟ ແລະ ຈໍວີດີໂອໃນສະໜາມກິລາ. ກ່ອນໜ້ານີ້ ໃນເດືອນຜ່ານມາຜູ້ຍິງອາຣັບບີ ຊາອຸດິດ ຫາກໍໄດ້ຮັບອະນຸຍາດໃຫ້ເຂົ້າສະໜາມກິລາຢູ່ນະຄອນຫລວງຣິຍາດໄດ້ເປັນເທື່ອທຳອິດ ເພື່ອສະຫລອງວັນຊາດ, ແຕ່ຫລັງຈາກນີ້ ຜູ້ຍິງສາມາດເຂົ້າເບິ່ງກິລາໃນສະໜາມໄດ້ຄືຜູ້ຊາຍນັບແຕ່ປີໜ້າເປັນຕົ້ນໄປ.
ນອກຈາກນີ້ ໃນເດືອນຜ່ານມາ ອາຣັບບີ ຊາອຸດິດ ໄດ້ມີຄຳສັ່ງອະນຸຍາດໃຫ້ຜູ້ຍິງຂັບລົດໄດ້ນັບແຕ່ເດືອນມິຖຸນາປີໜ້າ ແລະ ກຽມຈະອະນຸຍາດໃຫ້ຜູ້ຍິງເຂົ້າເບິ່ງຮູບເງົາໄດ້. ເປັນການສົ່ງເສີມໃຫ້ຜູ້ຊາຍ ແລະ ຜູ້ຍິງຢູ່ຮ່ວມກັນໃນບ່ອນສາທາລະນະແບບບໍ່ເຄີຍມີມາກ່ອນ. ອາຣັບບີ ຊາອຸດິດ ມີລະບົບຜູ້ປົກຄອງທີ່ກຳນົດໃຫ້ຜູ້ຍິງຕ້ອງໄດ້ຮັບອະນຸຍາດຈາກສະມາຊິກຄອບຄົວທີ່ເປັນຜູ້ຊາຍ ຄືບິດາ, ສາມີ, ອ້າຍ ຫລື ນ້ອງຊາຍ ໃນການເດີນທາງ, ຮຽນໜັງສື ແລະ ກິດຈະກຳອື່ນໆ, ແຕ່ເລີ່ມຫລຸດຜ່ອນລະບຽບຕາມວິໄສທັດ 2030 ໃນການປະຕິຮູບເສດຖະກິດ ແລະ ສັງຄົມ ເພື່ອກຽມປະເທດໃນຍຸກຫລັງການເພິ່ງພາການສົ່ງອອກນ້ຳມັນ.
