ບັນຫາປາກທ້ອງ ແລະ ຄ່າຄອງຊີບ ຄືສິ່ງທີ່ຕ້ອງແກ້ໃຫ້ໄດ້ໄວ

ໂດຍ: ຜາຕຸງ

ບັນຫາເລື່ອງປາກທ້ອງ ບັນຫາຄ່າຄອງຊີບ ຖືເປັນບັນຫາໃຫຍ່ຂອງປວງຊົນ ເຊິ່ງມັນໄດ້ແກ່ຍາວມາຫລາຍປີພໍສົມຄວນ ກ່ອນນີ້ພວກເຮົາຖິ້ມໂທດໃສ່ໂຄວິດ -19 ແຕ່ເຖິງແມ່ນວ່າໂຄວິດ-19 ຈະຈືດຈາງຫາຍໄປແລ້ວກໍຕາມ ບັນຫາຍິ່ງເພີ່ມທະວີຂຶ້ນ.

ໃນກອງປະຊຸມສະພາແຫ່ງຊາດກໍເປັນບັນຫາທີ່ ສສຊ ສ່ອງແສງຫລາຍທີ່ສຸດ ແລະ ມາເຖິງ ວັນທີ 8 ກໍລະກົດ 2024 ນີ້ ກອງປະຊຸມສະພາປະຊາຊົນນະຄອນຫລວງ ໄດ້ເປີດຂຶ້ນເພື່ອພິຈາລະນາບັນຫາຕ່າງໆ ເຊິ່ງຜາຕຸງກໍໄດ້ຕິດຕາມການລາຍລາຍຂອງເຈົ້າຄອງ ແລະ ການປະກອບຄຳເຫັນ ສສນວ ເຫັນວ່າ ບັນຫາປາກທ້ອງ ແລະ ຄ່າຄອງຊີບກໍຍັງເປັນບັນຫາພົ້ນເດັ່ນ ໃນນັ້ນມີ ສສນວ ທ່ານໜຶ່ງຕັ້ງຄຳຖາມໜ້າສົນໃຈ ກ່ຽວກັບລາຄາສິນຄ້າ ຄ່າຄອງຊີບຢູ່ໃນນະຄອນຫລວງວຽງຈັນວ່າ:

“ເຮັດແນວໃດພວກເຮົາຊິມີເງິນຊື້ຊີ້ນກິນໄດ້ນີ່ ພະນັກງານ ທະຫານ ຕຳຫຼວດ ພໍ່ແມ່ປະຊາຊົນ ຜູ້ທຸກຍາກ 2/3 ຍັງທຸກຢູ່ເດ ວິເຄາະວິໄຈຄັກແນ່ແລ້ວບໍວ່າ ໄຂ່ເປັນຫຍັງຈຶ່ງຂຶ້ນ ເຂົ້າມັນເປັນຫຍັງຈຶ່ງຂຶ້ນ ຊີ້ນງົວຊີ້ນຄວາຍເປັນຫຍັງຈຶ່ງຂຶ້ນ ດຽວນີ້ລາຄາມັນຂື້ນໄປ ແສນປາຍແລ້ວ ເຂົາເຈົ້າຕ້ອງການແຕ່ອັນນີ້ຄຸມແຕ່ອັນນີ້ໃຫ້ມັນໄດ້ ຫຼຸດລົງໄດ້ແຮ່ງດີ ຖ້າວ່າເຮົາຂາດອາຫາານນີ້ແນ່ນອນລະເນາະເບື້ອງສຸຂະພາບຂອງຄົນເຮົານີ້ການພັດທະນາປະເທດຊາດຕ້ອງການບຸກຄະລາກອນທີ່ມີຄວາມຮູ້ຄວາມສາມາດ ຖ້າວ່າເຮົາຂາດທາດຊີ້ນທາດໄຂແລ້ວຄົນມັນກະຊິເປັນມາລ່ອງຈ່ອງຈ່ອຍ ທໍ່ນັ້ນແລ່ວແນວໃດຊິພັດທະນາປະເທດຊາດໄດ້ແນວໃດ?
ລາວເປັນຊາດໜຶ່ງມີສະກຸນເງິນເປັນຂອງຕົນເອງ ຄືສະກຸນເງິນກີບ ແລ້ວຈະເຮັດແນວໃດ ຈຶ່ງຈະບໍ່ໃຫ້ສະກຸນເງິນຂອງຕ່າງປະເທດມາຄອບຄອງສະກຸນເງິນຂອງເຮົາ ພໍ່ແມ່ປະຊາຊົນບໍ່ໄດ້ສົນດອກວ່າຊິໄປແລ່ນແລກປ່ຽນເງິນຂ້າມໄປຝັ່ງນັ້ນຝັ່ງນີ້ ເຂົາເຈົ້າມີແຕ່ ຕ້ອງການພຽງແຕ່ວ່າ ເຮັດແນວໃດລາຄາສິນຄ້າເປັນ ຕົ້ນແມ່ນເຂົ້າກິນ ຈະມີລາຄາຖືກ ສາມາດຊື້ໄດ້ຢູ່ໃນເກນລາຄາຕ່ຳກວ່າ 100,000ກີບ ຫຼືຕ່ຳກວ່ານັ້ນກໍຍິ່ງດີ, ຊີ້ນໝູ, ຊີ້ນງົວ ຢູ່ໃນລາຄາ ແຕ່ 60,000 – 70,000 ກີບ ກໍຢູ່ໄດ້ແລ້ວ ຄັນຖ້າຫາກມີການສົ່ງເສີມການຜະລິດຢ່າງຈິງຈັງ ພະນັກງານທະຫານຕຳຫຼວດ ພໍ່ແມ່ປະຊາຊົນບັນດາ ເຜົ່າຈະບໍ່ເວົ້າຮອດ ເຄື່ອງປຸງອາຫານລົດດີເບາະ ນ້ຳມັນຫອຍເບາະ ນັ້ນເຂົາເຈົ້າບໍ່ສົນໃຈ, ແຕ່ມີຄວາມສົນໃຈ ແລະ ມີຄວາມຕ້ອງການວ່າ ເຮັດແນວໃດຊິມີເງິນຊືຊີ້ນກິນໄດ້, ເຮັດແນວໃດໃຫ້ລາຄາຊີ້ນ ລາຄາໄຂ່ ລາຄາເຂົ້າຫຼຸດລົງ ແລະ ສາມາດ ຄວບຄຸມໃຫ້ຄົງຕົວໄດ້”.

ແນວໃດກໍດີ ຖ້າອີງໃສ່ຄວາມເປັນຈິງແລ້ວ ບັນຫາເສດຖະກິດຂອງປະເທດເຮົາເວົ້າລວມ ເວົ້າສະເພາະ ແມ່ນນະຄອນຫຼວງວຽງຈັນ ໄລຍະນີ້ຍັງຢູ່ໃນພາວະທີ່ຫຍຸ້ງຍາກສັບສົນຫຼາຍ ຍ້ອນໄດ້ຮັບຜົນກະທົບຈາກພາວະເສດຖະກິດໂລກມີການເໜັງຕີງແຮງສົມຄວນຊຶ່ງສົ່ງຜົນກະທົບໄປທຸກໆປະເທດແຕ່ຜົນກະທົບນັ້ນອາດຕ່າງກັນໄປຕາມສະພາບເສດຖະກິດຂອງໃຜມັນ.

ການປະກອບຄຳຄິດຄຳເຫັນຂອງສະມາຊິກສະພາປະຊາຊົນນະຄອນຫຼວງວຽງຈັນມັນເປັນສິ່ງສະທ້ອນໜຶ່ງທີ່ຊີ້ໃຫ້ອົງການປົກຄອງນະຄອນຫຼວງວຽງຈັນເຫັນໄດ້ບັນຫາຂອງປະຊາຊົນ ໂດຍສະເພາະແມ່ນບັນຫາເລື່ອງປາກເລື່ອງທ້ອງ ສຳຄັນແມ່ນການຄວບຄຸມລາຄາສິນຄ້າໃຫ້ຄົງຕົວ ບໍ່ໃຫ້ເໜັງຕີງແຮງຈົນເກີນໄປດັ່ງທີ່ເປັນຢູ່ປັດຈຸບັນນີ້.

ຢ່າງໃດກໍຕາມ ແກ້ໄຂຄວາມທຸກຍາກນັ້ນຕ້ອງໄປຕາມແນວທາງ ວິເຄາະວິໄຈບັນຫາໃຫ້ຄັກແນ່ ແກ້ຖືກປະເດັນ ເກົາຖືກບ່ອນຄັນ ສຸມໃສ່ແກ້ໄຂບັນຫາເສດຖະກິດປາກທ້ອງຂອງປະຊາຊົນໃຫ້ກິນອີ່ມນຸ່ງອຸ່ນຕໍ່ໄປ ແລ້ວບັນຫາອື່ນໆກໍຈະດີຂຶ້ນຢ່າງແນ່ນອນ.