ປກສ ເມືອງໂຂງ ສຶກສາອົບຮົມກຸ່ມມົ້ວສຸມສິ່ງເສບຕິດ 20 ຄົນ

ວັນທີ 9 ກໍລະກົດ 2024, ກອງບັນຊາການ ປກສ ເມືອງໂຂງ ແຂວງຈຳປາສັກ ໄດ້ສຶກສາອົບຮົມກຸ່ມມົ້ວສຸມເສບສິ່ງເສບຕິດ 20 ຄົນ, ຍິງ 2 ຄົນ ພ້ອມທັງເຊັນບົດບັນທຶກ ຕໍ່ໜ້າອໍານາດການປົກຄອງ ແລະ ປະຕິຍານຕົນວ່າຈະບໍ່ກັບໄປພົວພັນກັບສິ່ງເສບຕິດອີກ ແລະ ໄດ້ມອບໃຫ້ອໍານາດການປົກຄອງບ້ານ ກໍຄື ພໍ່-ແມ່ ຜູ້ປົກຄອງເປັນຜູ້ສືບຕໍ່ສຶກສາອົບຮົມ ແລະ ຕິດຕາມການເຄື່ອນໄຫວຂອງລູກຫລານ ກໍຄື ກຸ່ມເປົ້າໝາຍ ຕື່ມອີກ. ຖ້າວ່າພວກກ່ຽວຍັງບໍ່ຢຸດ ພົວພັນກັບຢາເສບຕິດຄືເກົ່າ ແມ່ນຈະໄດ້ປະຕິບັດຕາມລະບຽບກົດໝາຍ.

ໂອກາດນີ້, ພາກສ່ວນກ່ຽວຂ້ອງ ໄດ້ເຜີຍແຜ່ເອກະສານທີ່ສຳຄັນຈໍານວນໜຶ່ງ ໃຫ້ຜູ້ຖືກສຶກສາອົບຮົມໄດ້ຮັບຮູ້ເຂົ້າໃຈ ເປັນຕົ້ນ: ເອກະສານສິດ ແລະ ພັນທະຂອງພົນລະເມືອງລາວ, ເອກະສານປະກົດການຫຍໍ້ທໍ້ທີ່ເກີດຂຶ້ນໃນສັງຄົມລາວ, ເອກະສານຜົນຮ້າຍຂອງຢາເສບຕິດ, ປະມວນກົດໝາຍອາຍາມາດຕາ 315, 319 ແລະ 321. ເພື່ອແນ່ໃສ່ກຸ່ມເປົ້າໝາຍດັ່ງກ່າວ ຮັບຮູ້ໄດ້ເຖິງຄວາມໝາຍຄວາມສຳຄັນຂອງລະບຽບການຕ່າງໆ, ຮູ້ ແລະ ຈຳແນກໄດ້ສິ່ງທີ່ ຜີດ, ຖືກ ແລະ ແນວທາງນະໂຍບາຍຂອງພັກ-ລັດໃນໄລຍະໃໝ່.