ຣັດເຊຍໂຈມຕີທາງອາກາດ ຖະຫລົ່ມໂຮງໝໍເດັກໃຫຍ່ສຸດຢູ່ອູແກຣນ
ໂຮງໝໍເດັກ Ohmatdyt ຢູ່ນະຄອນຫລວງກຽບ ເຊິ່ງຖືເປັນສະຖານທີ່ພະຍາບານສໍາລັບເດັກໃຫຍ່ທີ່ສຸດຂອງອູແກຣນ ຖືກລູກສອນໄຟຂອງຣັດເຊຍໂຈມຕີໃນວັນທີ 8 ກໍລະກົດ ສົ່ງຜົນເຮັດໃຫ້ອາຄານບາງສ່ວນພັງຖະຫລົ່ມ ແລະ ມີຜູ້ເສຍຊີວິດຢ່າງໜ້ອຍ 2 ຄົນ ໂດຍເປັນສ່ວນໜຶ່ງຂອງການລະດົມຍິງລູກສອນໄຟໂຈມຕີຫລາຍເມືອງທົ່ວອູແກຣນ ເຊິ່ງສົ່ງຜົນເຮັດໃຫ້ມີຜູ້ເສຍຊີວິດແລ້ວຢ່າງໜ້ອຍ 41 ຄົນ, ບາດເຈັບ 166 ຄົນ ຖືເປັນການໂຈມຕີທາງອາກາດຄັ້ງຮຸນແຮງທີ່ສຸດຂອງຣັດເຊຍໃນຮອບຫລາຍເດືອນ.
ພາຍຫລັງເກີດເຫດ, ທາງການ ແລະ ປະຊາຊົນໃນພື້ນທີ່ພະຍາຍາມຄົ້ນຫາ ແລະ ຊ່ວຍເຫລືອຜູ້ລອດຊີວິດ ເຊິ່ງການຄົ້ນຫາດໍາເນີນຕໍ່ເນື່ອງໝົດຄືນ.
ຂະນະທີ່ຣັດເຊຍປະຕິເສດວ່າບໍ່ໄດ້ຕັ້ງເປົ້າໂຈມຕີໂຮງໝໍເດັກດັ່ງກ່າວ ແລະ ອ້າງວ່າໂຮງໝໍຖືກໂຈມຕີໂດຍຊິ້ນສ່ວນລູກສອນໄຟປ້ອງກັນໄພທາງອາກາດຂອງອູແກຣນ. ຂະນະທີ່ທາງການອູແກຣນລະບຸວ່າ: ພົບເສດຊາກລູກສອນໄຟຂອງຣັດເຊຍທີ່ໂຈມຕີໂຮງໝໍແຫ່ງນີ້.
ເຫດໂຈມຕີດັ່ງກ່າວເກີດຂຶ້ນກ່ອນຈະມີກອງປະຊຸມສຸດຍອດຜູ້ນໍາຂອງອົງການ NATO ຢູ່ນະຄອນຫລວງວໍຊິງຕັນ ໂດຍປະທານາທິບໍດີ ໂວໂລດິເມຍ ເຊເລນສກີ ກ່າວວ່າ: ມີອາຄານ 100 ກວ່າຫລັງ ຖືກທໍາລາຍຈາກການໂຈມຕີທີ່ເກີດຂຶ້ນ ແລະ ປະນາມການໂຈມຕີຄັ້ງນີ້ວ່າເປັນການກະທໍາອັນໂຫດຫ້ຽມ.
ອ້າງອີງ:
- https://www.reuters.com/world/europe/ukrainian-air-defence-engaged-repelling-russian-missile-attack-kyiv-officials-2024-07-08/
- https://www.bbc.com/news/articles/cd162vj804go
