ພະແນກກະສິກຳ ແລະ ປ່າໄມ້ ນະຄອນຫລວງວຽງຈັນ ຈະສຸມໃສ່ຈັດຕັ້ງປະຕິບັດ ວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກຂອງປະຊາຊົນ

ທ່ານ ແສງອາລຸນ ສຸລິຍະວົງ ຫົວໜ້າພະແນກກະສິກຳ ແລະ ປ່າໄມ້ ນະຄອນຫລວງວຽງຈັນ (ນວ) ຊີ້ແຈງຕໍ່ຄຳຊັກຖາມຂອງສະມາຊິກສະພາປະຊາຊົນ ນະຄອນຫລວງວຽງຈັນ ແລະ ສະມາຊິກສະພາແຫ່ງຊາດ ປະຈຳເຂດເລືອກຕັ້ງ ທີ 1 ນະຄອນຫລວງວຽງຈັນ ໃນກອງປະຊຸມສະໄໝສາມັນເທື່ອທີ 7 ຂອງ ສະພາປະຊາຊົນ ນວ ຊຸດທີ II ວັນທີ 9 ກໍລະກົດ 2024 ໂດຍສະເພາະ ວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກຂອງປະຊາຊົນ ເຊິ່ງພະແນກກະສິກຳ ແລະ ປ່າໄມ້ ນວ ຈະສຸມໃສ່ແກ້ໄຂຫລາຍບັນຫາສຳຄັນ ເປັນຕົ້ນ ອໍານວຍຄວາມສະດວກໃນ ການແລກປ່ຽນຊື້-ຂາຍສິນຄ້າ ຢູ່ເຂດຈຸດສຸມ ໃຫ້ເປັນລະບົບ ເຊັ່ນ: ມີກຸ່ມຜະລິດ, ມີກຸ່ມເກັບຊື້ ແລະ ກຸ່ມປຸງແຕ່ງຢ່າງເປັນຕ່ອງໂສ້; ຈະປະສານສົມ ທົບກັບພາກສ່ວນທີ່ກ່ຽວຂ້ອງ ຊຸກຍູ້ສົ່ງເສີມການຜະລິດກະສິກໍາ ທີ່ມີທ່າແຮງ ເປັນຕົ້ນ ແມ່ນການປູກ-ການລ້ຽງ ເພື່ອຄໍ້າປະກັນສະບຽງອາຫານ ແລະ ຜະລິດເປັນສິນຄ້າເທື່ອລະກ້າວ, ພ້ອມທັງ ຫັນພະນັກ ງານວິຊາການ ທີ່ກ່ຽວຂ້ອງລົງຮາກຖານ ແນະນຳທາງດ້ານວິຊາການໃຫ້ແກ່ປະຊາຊົນ ໃນການປູກ-ການລ້ຽງ ໃນເຂດຈຸດສຸມ, ສືບຕໍ່ປັບປຸງກຸ່ມການຜະລິດກະສິກຳ ແລະ ສະຫະກອນ ໃຫ້ມີຄວາມເຂັ້ມແຂງ ໃນການຄຸ້ມຄອງບໍລິຫານລະບົບການຜະລິດໃຫ້ມີຄວາມຍືນຍົງ, ສຸມໃສ່ພັດທະນາຮອບດ້ານ ຢູ່ໜຶ່ງຈຸດສຸມພັດທະນາທີ່ເປັນບຸລິມະສິດ ລະຫວ່າງ ສູນກາງ ແລະ ທ້ອງຖິ່ນ ໄປພ້ອມກັບການສືບຕໍ່ຈັດຕັ້ງປະຕິບັດໂຄງການຕ່າງໆ, ປະສານກັບພາກສ່ວນທີ່ກ່ຽວຂ້ອງຍົກສູງ ແລະ ພັດທະນາສີມື ແຮງງານຕາມຄວາມຕ້ອງການ ຂອງຕະຫລາດແຮງງານ, ຝຶກວິຊາຊີບ ແລະ ສົ່ງເສີມການປະກອບອາຊີບທີ່ໝັ້ນຄົງ, ປະສານກັບພາກສ່ວນທີ່ກ່ຽວຂ້ອງ ສຸມໃສ່ປັບປຸງຄຸນນະພາບການສຶກສາ ແລະ ສາຂາອາຊີບ ຢູ່ໂຮງຮຽນວິຊາຊີບຕ່າງໆ ໃຫ້ແທດເໝາະກັບຄວາມຕ້ອງການຢູ່ແຕ່ລະທ້ອງຖິ່ນ ແລະ ຍົກສູງສະມັດຕະພາບໂຮງໝໍນ້ອຍ, ສຸກສາລາ, ຖົງຢາພື້ນເມືອງປະຈຳບ້ານ ໃຫ້ສາມາດຮັບປະກັນການບໍລິການສາທາລະນະສຸກຂັ້ນພື້ນຖານ.

ພ້ອມນີ້, ຍັງຈະສຸມໃສ່ ຊຸກຍູ້ສົ່ງເສີມ ສິນຄ້າກະສິກຳທີ່ເຮົາສາມາດຜະລິດໄດ້ພາຍໃນ ໂດຍຈະສົມທົບກັບ ພະແນກອຸດສາຫະກຳ ແລະ ການຄ້າ ນະຄອນຫລວງວຽງຈັນ ເພື່ອປຶກສາຫາລື ແລະ ກຳນົດບັນດາພືດຜັກທີ່ສາມາດຜະລິດ ເພື່ອສະໜອງສະບຽງອາຫານໃນນະຄອນຫລວງວຽງຈັນ ຈໍານວນ 7 ຊະນິດພືດຜັກ(ບໍ່ລວມເຂົ້າ) ຄື: ຜັກບົວໃບ, ຫອມປ້ອມ, ຫອມລາບ, ໝາກເຂືອ, ໝາກແຕງ, ໝາກເຜັດ ແລະ ຜັກບົ້ງ ໂດຍສົມທົບກັບຫ້ອງການກະສິກໍາ ແລະ ປ່າໄມ້ ເມືອງ 6 ຕົວເມືອງ ເປັນຕົ້ນ ເມືອງສີໂຄດຕະບອງ, ໄຊເສດຖາ, ນາຊາຍທອງ, ໄຊທານີ, ສັງທອງ ແລະ ເມືອງປາກງື່ມ ແລະ ບັນດາໂຄງ ການຮ່ວມມືສາກົນຕ່າງໆ. ແລະ ໄດ້ຊຸກຍູ້ສົ່ງເສີມເມືອງເປົ້າໝາຍທີ່ມີທ່າແຮງ ແລະ ສາມາດຜະ ລິດພືດຜັກ ສະເລ່ຍໄດ້ 6,900 ໂຕນຕໍ່ເດືອນ ແລະ ຊີ້ນສັດ ປະກອບມີ ຊີ້ນໝູ, ປານິນລ້ຽງໃນກະຊັງ, ໄກ່ລາດ ແລະ ໄຂ່ ສະເລ່ຍ ທາດຊີ້ນໄດ້ 6,500 ກວ່າໂຕນ ເຊິ່ງເຫັນວ່າສາມາດເປັນສິນຄ້າ ແລະ ທົດແທນການນຳເຂົ້າໄດ້ໂດຍພື້ນຖານ.