ເງິນເຟີ້ຟີລິບປິນຫລຸດລົງເຖິງລະດັບ 3.7% ໃນເດືອນມິຖຸນາ ຫລັງລາຄາພະລັງງານຫລຸດລົງ

      ໜ່ວຍງານສະຖິຕິຟີລິບປິນ (PSA) ລາຍງານວ່າ: ອັດຕາເງິນເຟີ້ປະຈໍາປີໃນເດືອນມິຖຸນາຫລຸດລົງເຫລືອ 3.7% ເນື່ອງຈາກລາຄາຕົ້ນທຶນພະລັງງານ ແລະ ຂົນສົ່ງທີ່ຫລຸດລົງ. ຂະນະທີ່ອັດຕາເງິນເຟີ້ດ້ານອາຫານເພີ່ມຂຶ້ນເປັນ 6.5% ເນື່ອງຈາກຜັກ ແລະ ຊີ້ນສັດມີລາຄາສູງຂຶ້ນ.

      ວັນທີ 8 ກໍລະກົດ, ສໍານັກຂ່າວຕ່າງປະເທດລາຍງານວ່າ: ອັດຕາເງິນເຟີ້ປະຈໍາປີຂອງຟີລິບປິນຫລຸດລົງເຫລືອ 3.7% ໃນເດືອນມິຖຸນາຜ່ານມາ ຈາກ 3.9% ໃນເດືອນພຶດສະພາ ເນື່ອງຈາກຕົ້ນທຶນພະລັງງານ ແລະ ການຂົນສົ່ງທີ່ຫລຸດລົງ.

      ທ່ານ ເດນນິສ ມາປາ ຜູ້ອໍານວຍການ PSA ລະບຸວ່າ: ທ່າອ່ຽງຂາລົງຂອງອັດຕາເງິນເຟີ້ໂດຍລວມໃນເດືອນມິຖຸນາໄດ້ຮັບອິດທິພົນຫລັກມາຈາກການເພີ່ມຂຶ້ນຂອງລາຄາທີ່ຢູ່ອາໄສ, ນໍ້າ, ໄຟຟ້າ, ແກັສ ແລະ ເຊື້ອໄຟອື່ນໆ ຕໍ່ປີທີ່ຊ້າລົງ 0.1% ຈາກ 0.9% ໃນເດືອນພຶດສະພາ, ຍິ່ງໄປກວ່ານັ້ນ ຄ່າໃຊ້ຈ່າຍດ້ານການຂົນສົ່ງ, ຮ້ານອາຫານ ແລະ ທີ່ພັກທີ່ເພີ່ມຂຶ້ນຊ້າລົງໃນແຕ່ລະປີ ສົ່ງຜົນຕໍ່ທ່າອ່ຽງຂາລົງເຊັ່ນດຽວກັນ.

      ຂະນະທີ່ອັດຕາເງິນເຟີ້ສະເລ່ຍຂອງຟີິລິບປິນ ລະຫວ່າງເດືອນມັງກອນ-ມິຖຸນາປີນີ້ ຢູ່ລະດັບ 3.5%. ກົງກັນຂ້າມກັບປີ 2023 ເຊິ່ງອັດຕາເງິນເຟີ້ໃນເດືອນມິຖຸນາຢູ່ລະດັບ 5.4%. ທ່ານ ມາປາ ໃຫ້ຂໍ້ມູນວ່າ: ອັດຕາເງິນເຟີ້ພື້ນຖານ ເຊິ່ງບໍ່ລວມລາຍການອາຫານ ແລະ ພະລັງງານ ຢູ່ລະດັບ 3.1% ໃນເດືອນມິຖຸນາ ທຽບໃສ່ສະຖິຕິໃນໄລຍະເວລາດຽວກັນຂອງປີ 2023 ເຊິ່ງອັດຕາເງິນເຟີ້ສູງເຖິງ 7.4%.

     ໃນທາງກົງກັນຂ້າມ, ທ່ານ ອາຣເຊນິໂອ ບາລິຊາກັນ ເລຂາທິການສໍານັກງານເສດຖະກິດ ແລະ ການພັດທະນາແຫ່ງຊາດຟີລິບປິນ ກ່າວວ່າ: ອັດຕາເງິນເຟີ້ດ້ານອາຫານເພີ່ມຂຶ້ນເປັນ 6.5% ຈາກ 6.1% ໃນເດືອນພຶດສະພາຜ່ານມາ ເນື່ອງຈາກລາຄາຜັກ ແລະ ຊີ້ນສັດທີ່ສູງຂຶ້ນ.

     ເຖິງຢ່າງໃດກໍຕາມ, ກະຊວງການຄ້າຟີລິບປິນຍັງເຮັດວຽກຢູ່ໃກ້ຊິດກັບລັດຖະບານ, ຜູ້ມີສ່ວນໄດ້ສ່ວນເສຍ ແລະ ພາກສ່ວນອື່ນໆ ເພື່ອດໍາເນີນມາດຕະການທີ່ຈໍາເປັນເພື່ອໃຫ້ແນ່ໃຈວ່າ: ປະຊາຊົນຈະມີອາຫານທີ່ພຽງພໍ ແລະ ລາຄາບໍ່ແພງເພື່ອບໍລິໂພກ ໂດຍໃນວັນທີ 27 ມິຖຸນາຜ່ານມາ, ຄະນະກໍາມະການປະສານງານງົບປະມານເພື່ອການພັດທະນາ ສະແດງຄວາມມຸ້ງໝັ້ນຈະບັນລຸສະຖຽນລະພາບດ້ານລາຄາ ແລະ ຫລຸດອັດຕາເງິນເຟີ້ໃຫ້ຫລຸດລົງເຫລືອຕາມເປົ້າໝາຍສະເລ່ຍ 2-4% ລະຫວ່າງປີ 2025-2028.