ການວິໄຈຊີ້ ເມືອງໃຫຍ່ທົ່ວໂລກຜະເຊີນຄື້ນຄວາມຮ້ອນຮຸນແຮງຂຶ້ນ ໂດຍສະເພາະຢູ່ອາຊີ
ສະຖາບັນເພື່ອສິ່ງແວດລ້ອມ ແລະ ການພັດທະນາເມືອງລະຫວ່າງປະເທດ (IIED) ເປີດເຜີຍວ່າ: ເມືອງໃຫຍ່ຫລາຍແຫ່ງທົ່ວໂລກ ກໍາລັງຜະເຊີນຈໍານວນວັນທີ່ມີອາກາດຮ້ອນທີ່ສຸດຫລາຍກວ່າໃນອະດີດເຖິງ 52% ເມື່ອທຽບໃສ່ 30 ປີຜ່ານມາ.
ວັນທີ 1 ກໍລະກົດ, ສໍານັກຂ່າວຕ່າງປະເທດລາຍງານວ່າ: ບັນດາເມືອງໃຫຍ່ຂອງໂລກກໍາລັງຜະເຊີນໄລຍະເວລາທີ່ມີອາກາດຮ້ອນຫລາຍກວ່າໃນອະດີດ ເນື່ອງຈາກອິດທິພົນຂອງຄື້ນຄວາມຮ້ອນ ໂດຍສະເພາະຢູ່ທະວີບອາຊີ.
IIED ລາຍງານວ່າ: ເມືອງທີ່ມີປະຊາກອນຫລາຍທີ່ສຸດໃນໂລກ 20 ແຫ່ງ ເຊິ່ງມີປະຊາກອນອາໄສລວມກັນຫລາຍກວ່າ 300 ລ້ານຄົນ ມີຈໍານວນວັນອຸນຫະພູມສູງເກີນ 35 ອົງສາ ສູງຂຶ້ນເຖິງ 52% ໃນໄລຍະ 30 ປີຜ່ານມາ ນັບແຕ່ນະຄອນຫລວງບົວໂນສໄອເຣສ ປະເທດອາກຊັງຕິນ ໄປຈົນຮອດນະຄອນຫລວງປາຣີສ ປະເທດຝຣັ່ງ ແລະ ນະຄອນຫລວງໄຄໂຣ ປະເທດອີຢິບ.
ໃນແຕ່ລະທົດສະວັດຜ່ານມາ ການປ່ອຍແກັສເຮືອນແກ້ວທີ່ເກີດຈາກມະນຸດ ສົ່ງຜົນເຮັດໃຫ້ມີການບັນທຶກວັນທີ່ອາກາດຮ້ອນເພີ່ມຂຶ້ນຕາມເມືອງໃຫຍ່ເພີ່ມຂຶ້ນເລື້ອຍໆ ເຊິ່ງສົ່ງຜົນຕໍ່ສຸຂະພາບຂອງມະນຸດ, ເສດຖະກິດ ແລະ ໂຄງລ່າງພື້ນຖານ “ການປ່ຽນແປງສະພາບອາກາດບໍ່ໄດ້ເປັນພຽງໄພຄຸກຄາມໃນອະນາຄົດ, ແຕ່ມັນກໍາລັງເກີດຂຶ້ນແລ້ວ ແລະ ຮ້າຍແຮງອີກ” ທ່ານ ທັກເກີ ແລນເດສແມນ ນັກວິໄຈອາວຸໂສຂອງ IIED ກ່າວ.
ທັງນີ້, ເມືອງຕ່າງໆຢູ່ອາຊີ ເຊິ່ງມີອັດຕາສ່ວນປະມານເຄິ່ງໜຶ່ງຂອງເມືອງຫລວງທີ່ມີປະຊາກອນຫລາຍທີ່ສຸດໃນໂລກ ມີອຸນຫະພູມເພີ່ມຂຶ້ນຫລາຍທີ່ສຸດແຫ່ງໜຶ່ງ ເຊິ່ງເປັນທ່າອ່ຽງທີ່ເຫັນໄດ້ຢ່າງຊັດເຈນຈາກຄື້ນຄວາມຮ້ອນຮອບຫລ້າສຸດ ນັບແຕ່ອາຊີຕາເວັນອອກສຽງໃຕ້ໄປຈົນຮອດຈີນ ແລະ ອິນເດຍ.
ທະວີບອາຊີມີຄວາມສ່ຽງເປັນພິເສດ ຕໍ່ການປ່ຽນແປງດ້ານສະພາບອາກາດ ເນື່ອງຈາກມີປະຊາກອນຈໍານວນຫລາຍ, ທຸກຍາກ ແລະ ປະຊາຊົນມີທ່າອ່ຽງຈະອາໄສຢູ່ໃນພື້ນທີ່ຮາບລຸ່ມ ເຊິ່ງມີຄວາມສ່ຽງຕໍ່ການເກີດນໍ້າຖ້ວມ, ລະດັບນໍ້າທະເລສູງຂຶ້ນ ແລະ ໄພພິບັດທາງທໍາມະຊາດ.
ນະຄອນຫລວງນິວເດລີ ເມືອງຫລວງຂອງອິນເດຍ ຕິດອັນດັບເມືອງຮ້ອນທີ່ສຸດ ດ້ວຍອຸນຫະພູມສູງກວ່າ 35 ອົງສາ ໃນໄລຍະ 30 ປີຜ່ານມາເຖິງ 4,222 ວັນ ຫລາຍກວ່າເມືອງອື່ນໆໃນໄລຍະ 2014-2023 ໂດຍເມືອງທີ່ອຸນຫະພູມສູງເຖິງເກນຄິດເປັນ 44% ທຽບໃສ່ 35% ລະຫວ່າງປີ 1994-2003 ແລະ 37% ໃນໄລຍະປີ 2004-2013. ໃນທ້າຍເດືອນພຶດສະພາຜ່ານມາ ນະຄອນຫລວງມີອຸນຫະພູມສູງເປັນປະຫວັດສາດເຖິງ 49.9 ອົງສາ.
ສະບາຍອາກາດຮ້ອນເຮັດໃຫ້ເກີດຄວາມຄຽດຕໍ່ໂຄງລ່າງພື້ນຖານ ລວມທັງທາງຫລວງ, ຖະໜົນ, ສາຍໄຟ ແລະ ທາງລົດໄຟ ຕະຫລອດຈົນເກີດການຢຸດສະງັກຂອງຕ່ອງໂສ້ອຸປະທານ, ໄຟດັບ ແລະ ໂຣກໄພໄຂ້ເຈັບ.
