ປກສ ເມືອງທ່າແຂກ ກັກຕົວຜູ້ຄ້າ-ຂາຍຢາເສບຕິດ 4 ຄົນ ພ້ອມຂອງກາງຢາບ້າ
ວັນທີ 22 ມິຖຸນາ 2024 ຜ່ານມາ, ເຈົ້າໜ້າທີ່ຕຳຫລວດວິຊາສະເພາະ ປກສ ເມືອງທ່າແຂກ ແຂວງຄຳມ່ວນ ລົງມ້າງຄະດີຢາເສບຕິດ ຢູ່ເຂດບ້ານຕານ ເມືອງທ່າແຂກ ແຂວງຄຳມ່ວນ ສາມາດກັກຕົວເປົ້າໝາຍ 3 ຄົນ ຊື້-ຂາຍຢາເສບຕິດ ຢູ່ເຮືອນແຫ່ງໜຶ່ງພາຍໃນບ້ານດັ່ງກ່າວ, ພ້ອມຢືດຂອງກາງຢາບ້າທັງໝົ້ດ 19.306 ເມັດ ທີ່ຊຸກເຊື່ອງໄວ້ໃນເຮືອນຫລັງດັ່ງກ່າວ.
ຜ່ານການສືບສວນ – ສອບສວນ ຂອງເຈົ້າໜ້າທີ່ ຮູ້ວ່າ: ຜູ້ຖືກຫາຊື່ ທ້າວ ທອງສະຫວັນ ຄຳສຸກຖາວົງ ຫລື ປັອກ (ເຈົ້າຂອງເຮືອນ) ອາຍຸ 49 ປີ ປະຊາຊົນ ບ້ານຕານ, ທ້າວ ອຸດົມສັກ ແສງມະນີ ອາຍຸ 40 ປີ ປະຊາຊົນ ບ້ານຈອມທອງ ແລະ ທ້າວ ຄຳສະຫວັນ ເທບປານີ ບ້ານ ໂພນສະອາດ ທັງສາມ ຢູ່ເມືອງທ່າແຂກ ແຂວງຄຳມ່ວນ.
ນອກນັ້ນ ທ້າວ ທອງສະຫວັນ ຮັບສາລະພາບຕື່ມອີກວ່າ: ຢາບ້າຈຳນວນດັ່ງກ່າວທີ່ຜູ້ກ່ຽວຊຸກເຊື່ອງໄວ້ໃນເຮືອນ ແມ່ນໄດ້ຊື້ມາຈາກ ທ້າວ ອ໋ອດ ສີສະຫລາດ ອາຍຸ 29 ປີ ປະຊາຊົນ ບ້ານດອນລັບ ເມືອງຫີນບູນ ແຂວງຄຳມ່ວນ.ຈາກນັ້ນທາງເຈົ້າໜ້າທີ່ຈຶ່ງໄດ້ປະສານສົມທົບກັບພາກສ່ວນທີ່ກ່ຽວຂ້ອງ ຕິດຕາມ ແລະ ນຳກັກຕົວທ້າວ ອ໋ອດ ສີສະຫຼາດ ໄດ້ຢູ່ໂຮງແຮມ ແຫ່ງໜຶ່ງພາຍໃນເທດສະບານ ເມືອງທ່າແຂກ ແຂວງຄຳມ່ວນ.
ປັດຈຸບັນຄະດີດັ່ງກ່າວຍັງຢູ່ໃນຂັ້ນຕອນການສືບສວນ – ສອບສວນ ເພື່ອຂະຫຍາຍຜົນຫາກຸ່ມແກ້ງຜູ້ຮ່ວມຂະບວນການມາດຳເນີນຄະດີຕາມຂັ້ນຕອນຂອງກົດໝາຍ.
