ກະຊວງການຕ່າງປະເທດ ມອບ-ຮັບ ໃບຢັ້ງຢືນໜ່ວຍພັກປອດໃສ ເຂັ້ມແຂງ ໜັກແໜ້ນ ປີ 2023
ກະຊວງການຕ່າງປະເທດ ຈັດພິທີມອບ-ຮັບ ໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2023 ໃຫ້ແກ່ບັນດາໜ່ວຍພັກທີ່ຂຶ້ນກັບອົງຄະນະພັກກະຊວງການຕ່າງປະເທດ ໃນວັນທີ 26 ມິຖຸນາ 2024 ພາຍໃຕ້ການເປັນປະທານຂອງ ສະຫາຍ ສະເຫລີມໄຊ ກົມມະສິດ ກຳມະການກົມການເມືອງສູນກາງພັກ, ເລຂາຄະນະບໍລິຫານງານພັກກະຊວງ, ຮອງນນາຍົກລັດຖະມົນ ຕີ, ລັດຖະມົນຕີກະຊວງການຕ່າງປະເທດ, ມີບັນດາສະຫາຍຄະນະພັກ-ຄະນະນໍາກະຊວງ, ຄະນະໜ່ວຍພັກ, ສະມາຊິກພັກ-ຄະນະກົມ ແລະ ພະນັກງານ-ລັດຖະກອນ ເຂົ້າຮ່ວມ.
ໃນພິທີ ສະຫາຍ ໄມທອງ ທໍາມະວົງສາ ກຳມະການຄະນະພັກກະຊວງ, ຫົວໜ້າກົມຈັດຕັ້ງ ແລະ ພະນັກງານ ກະຊວງການຕ່າງປະເທດ ໄດ້ຍົກໃຫ້ເຫັນເຖິງຄວາມເອົາໃຈໃສ່ດ້ວຍຄວາມຮັບຜິດ ຊອບສູງຂອງບັນດາໜ່ວຍພັກ ແລະ ສະມາຊິກພັກ ໃນການປະຕິບັດບັນດາຄາດໝາຍສູ້ຊົນໃນມະຕິຂອງກອງປະຊຸມໃຫຍ່ຜູ້ແທນອົງຄະນະພັກກະຊວງ ການຕ່າງປະເທດ ຄັ້ງທີ IV ທີ່ໄດ້ຮັບຜົນສຳເລັດ. ພ້ອມທັງໄດ້ຍົກໃຫ້ເຫັນດ້ານຄົງຄ້າງ ທີ່ບັນດາໜ່ວຍພັກຈະຕ້ອງໄດ້ເອົາໃຈໃສ່ແກ້ໄຂ ແລະ ປັບປຸງໃຫ້ດີຂຶ້ນກວ່າເກົ່າໃນຕໍ່ໜ້າ ເຊິ່ງການຮັບຮອງໃນຄັ້ງນີ້, ແມ່ນໄດ້ຜ່ານການກວດກາ ແລະ ປະເມີນໜ່ວຍພັກ ຂອງຄະນະພັກກະຊວງການຕ່າງປະເທດ ໃນຈຳນວນ 49 ໜ່ວຍພັກ ທີ່ສະເໜີແຜນສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ໂດຍໄດ້ຜ່ານການປະເມີນ ແລະ ຮັບຮອງ ຈຳນວນ 44 ໜ່ວຍພັກ, ໃນນີ້ ໄດ້ປະເມີນສະມາຊິກພັກ ຈຳນວນ 707 ສະຫາຍ, ຍິງ 215 ສະຫາຍ ໄດ້ຮັບຮອງເປັນສະມາຊິກ ປອດໃສ, ເຂັ້ມແຂງ, ໜັກແໜ້ນ ຈຳນວນ 670 ສະຫາຍ, ຍິງ 206 ສະຫາຍ ແລະ ສະມາຊິກພັກປະເພດ ກາງ 5 ສະຫາຍ.
ໃນພິທີ, ສະຫາຍ ສະເຫລີມໄຊ ກົມມະສິດ ໄດ້ໃຫ້ກຽດຂຶ້ນມອບໃບຢັ້ງຢືນ ແລະ ໂອ້ລົມເພື່ອໃຫ້ທິດຊີ້ນໍາໃນການຈັດຕັ້ງປະຕິບັດໃນຕໍ່ໜ້າ ໂດຍສະຫາຍໄດ້ສະແດງຄວາມຊົມເຊີຍ ແລະ ຕີລາຄາສູງຕໍ່ຄວາມເອົາໃຈໃສ່ຂອງບັນດາສະຫາຍຄະນະໜ່ວຍພັກ ແລະ ສະມາຊິກພັກ-ພະນັກງານ ທີ່ໄດ້ບຸກບືນ ແລະ ຍາດມາໄດ້ນາມມະຍົດໜ່ວຍພັກປອດໃສ, ເຂັ້ມແຂງ, ໜັກແໜ້ນ. ພ້ອມດຽວກັນ ກໍໄດ້ຍົກໃຫ້ເຫັນເຖິງຄວາມໝາຍ ແລະ ຄວາມສໍາຄັນ ຂອງວຽກງານການປັບປຸງກໍ່ສ້າງຮາກຖານພັກ ໃຫ້ມີຄວາມປອດໃສ, ເຂັ້ມແຂງ, ໜັກແໜ້ນ ເຊິ່ງແມ່ນຄວາມຮຽກຮ້ອງຕ້ອງການທີ່ຈຳເປັນຢ່າງພາວະວິໄສ, ໃນການຄົງຕົວ ແລະ ຂະຫຍາຍຕົວ ຂອງການຈັດຕັ້ງພັກ ໃນການນໍາພາ-ຊີ້ນໍາໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ເຊິ່ງແມ່ນໜ້າທີ່ ແລະ ຄວາມຮັບຜິດຊອບໂດຍກົງຂອງຄະນະພັກ ແລະ ສະມາຊິກພັກ-ພະນັກງານທຸກຄົນ ທີ່ຈະຕ້ອງຮ່ວມແຮງຮ່ວມໃຈກັນສຸມໃສ່ປະຕິບັດໜ້າທີ່ຢ່າງມີຄວາມຮັບຜິດຊອບສູງ.
ໂອກາດດຽວກັນ, ກະຊວງການຕ່າງປະເທດ ກໍໄດ້ມີການປະກາດການສັບຊ້ອນພະນັກງານ-ນຳ ພາຄຸ້ມຄອງຂັ້ນຕ່າງໆຄື: ຫົວໜ້າກົມ ຈຳນວນ 3 ທ່ານ, ຮອງຫົວໜ້າກົມ ຈຳນວນ 8 ທ່ານ, ຍິງ 2 ທ່ານ, ຫົວໜ້າພະແນກຈຳນວນ 9 ທ່ານ, ຍິງ 2 ທ່ານ, ຮອງຫົວໜ້າພະແນກ 25, ຍິງ 11 ທ່ານ.
